ಎಂಡಿಎಂಎ ಡ್ರಗ್ಸ್ ಸಾಗಾಟ – ಸೋಶಿಯಲ್ ಮೀಡಿಯಾ ಇನ್ಫ್ಲುಯೆನ್ಸರ್ ಯುವತಿ ಸೇರಿದಂತೆ ನಾಲ್ವರು ಅರೆಸ್ಟ್!

ಮಲಪ್ಪುರಂ: ವೆಂಗಾರ ಹಾಗೂ ಮಂಕಡ ಪ್ರದೇಶಗಳಲ್ಲಿ ಸಕ್ರಿಯವಾಗಿದ್ದ ಎಂಡಿಎಂಎ (MDMA) ಮಾದಕವಸ್ತು ಕಳ್ಳಸಾಗಣೆ ಜಾಲದ ವಿರುದ್ಧ ಮಲಪ್ಪುರಂ ಪೊಲೀಸರು ಭರ್ಜರಿ ಕಾರ್ಯಾಚರಣೆ ನಡೆಸಿದ್ದಾರೆ. ಕಾರಿನಲ್ಲಿ ಸಾಗಿಸುತ್ತಿದ್ದ ಲಕ್ಷಾಂತರ ರೂ. ಮೌಲ್ಯದ ಸಿಂಥೆಟಿಕ್ ಡ್ರಗ್ಸ್ ವಶಪಡಿಸಿಕೊಂಡಿದ್ದು, 23 ವರ್ಷದ ಮಹಿಳಾ ಸಾಮಾಜಿಕ ಮಾಧ್ಯಮ ಪ್ರಭಾವಿ (Social Media Influencer) ಸೇರಿದಂತೆ ಒಟ್ಟು ನಾಲ್ವರು ಆರೋಪಿಗಳನ್ನು ಬಂಧಿಸಲಾಗಿದೆ.

ಬಂಧಿತ ಆರೋಪಿಗಳ ವಿವರ: ಕೂಡಿಲಂಗಡಿ ಮೂಲದ ಸಾಮಾಜಿಕ ಮಾಧ್ಯಮ ಪ್ರಭಾವಿ ಮಿನು ಜಾಸ್ಮಿನ್ (23), ಮಲ್ಲಪ್ಪುರಂ ನಿವಾಸಿ ಅನಾಸ್ (24), ಮಂಕಡ ನಿವಾಸಿ ಶಬೀರ್ ಟಿ.ಪಿ. (24), ಕೊರಿಯಾಡ್ ನಿವಾಸಿ ಸಜ್ಜದ್ (21), ಎಂದು ಗುರುತಿಸಲಾಗಿದೆ. ಬಂಧಿತರ ಪೈಕಿ ಅನಾಸ್, ಶಬೀರ್ ಹಾಗೂ ಸಜ್ಜದ್ ವಿರುದ್ಧ ಈ ಹಿಂದೆಯೂ ವಿವಿಧ ಪೊಲೀಸ್ ಠಾಣೆಗಳಲ್ಲಿ ಎಂಡಿಎಂಎ ಪ್ರಕರಣಗಳು ದಾಖಲಾಗಿರುವುದು ತನಿಖೆಯಿಂದ ತಿಳಿದುಬಂದಿದೆ.

ಖಚಿತ ಮಾಹಿತಿಯ ಮೇರೆಗೆ ಮಲಪ್ಪುರಂ ಪೊಲೀಸರು ಹಾಗೂ ಜಿಲ್ಲಾ ಮಾದಕವಸ್ತು ವಿರೋಧಿ ವಿಶೇಷ ಕಾರ್ಯಪಡೆ (DANSAF), ‘ಆಪರೇಷನ್ ತೂಫಾನ್’ ಭಾಗವಾಗಿ ಮಲಪ್ಪುರಂ ಪಟ್ಟಣದ ಕಿಝಕ್ಕೆತಲ-ವೆಂಗಾರ ರಸ್ತೆಯಲ್ಲಿ ತಡರಾತ್ರಿ ಹಠಾತ್ ತಪಾಸಣೆ ನಡೆಸಿ ಕಾರನ್ನು ಅಡ್ಡಗಟ್ಟಿದ್ದಾರೆ.

ಆರೋಪಿಗಳು ವೆಂಗಾರ ಹಾಗೂ ಮಂಕಡ ಸುತ್ತಮುತ್ತಲಿನ ಕಾಲೇಜು ವಿದ್ಯಾರ್ಥಿಗಳು ಹಾಗೂ ಯುವಜನರನ್ನು ಗುರಿಯಾಗಿಸಿಕೊಂಡು ಎಂಡಿಎಂಎ ಮಾರಾಟ ಮಾಡುತ್ತಿದ್ದರು ಎಂಬುದು ಪ್ರಾಥಮಿಕ ತನಿಖೆಯಿಂದ ಬಹಿರಂಗವಾಗಿದೆ. ಚಿಲ್ಲರೆ ಮಾರುಕಟ್ಟೆಯಲ್ಲಿ ಅಂದಾಜು ₹50,000 ಮೌಲ್ಯದ 10.5 ಗ್ರಾಂ ಎಂಡಿಎಂಎ. ಡ್ರಗ್ಸ್ ಸೇವನೆಗೆ ಬಳಸುತ್ತಿದ್ದ ಸಿರಿಂಜ್‌ಗಳು. ತೂಕ ಮಾಡುವ ಡಿಜಿಟಲ್ ತೂಕದ ಮಾಪಕ. ಪ್ಯಾಕಿಂಗ್‌ಗಾಗಿ ಬಳಸುತ್ತಿದ್ದ ಜಿಪ್-ಲಾಕ್ ಕವರ್‌ಗಳ ಪ್ಯಾಕೆಟ್‌ಗಳು. ಮಾದಕ ದ್ರವ್ಯ ಮಾರಾಟದಿಂದ ಸಂಗ್ರಹಿಸಲಾಗಿದೆ ಎನ್ನಲಾದ ನಗದು ₹25,000. ಕೃತ್ಯಕ್ಕೆ ಬಳಸಿದ್ದ ಕಾರು.
ಮಲಪ್ಪುರಂ ಡಿವೈಎಸ್ಪಿ ಸುಭಾಷ್ ಬಾಬು ನೇತೃತ್ವದಲ್ಲಿ, ಮಲಪ್ಪುರಂ ಪೊಲೀಸ್ ಇನ್ಸ್‌ಪೆಕ್ಟರ್ ಶಾಜಿಮೋನ್ ಬಿ ಮತ್ತು ಸಬ್ ಇನ್ಸ್‌ಪೆಕ್ಟರ್ ಸನಲ್ ನೇತೃತ್ವದ ತಂಡ ಈ ಕಾರ್ಯಾಚರಣೆಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದು, ಕರಾವಳಿ ಭಾಗದಲ್ಲಿ ವ್ಯಾಪಿಸುತ್ತಿರುವ ಡ್ರಗ್ಸ್ ಜಾಲದ ಹಿಂದೆ ಬೇರೆ ಯಾರ್ಯಾರ ಕೈವಾಡವಿದೆ ಎಂಬುದರ ಕುರಿತು ತೀವ್ರ ವಿಚಾರಣೆ ಮುಂದುವರಿಸಿದೆ.