ಮುಂಬೈನಲ್ಲಿ ಪೊಲೀಸ್ ವ್ಯಾನ್ ತಡೆದು ನಿಂತ ರಿಯಾ ಆಹಿರ್ ಸಾಹಸದ ವಿಡಿಯೋ ವೈರಲ್!

ಮುಂಬೈ: ದಾದರ್‌ನ ಶಿವಸೇನಾ ಭವನದ ಬಳಿ ಬುಧವಾರ ನಡೆದ ಪ್ರತಿಭಟನೆಯ ವೇಳೆ ಪೊಲೀಸ್ ವಾಹನವೊಂದರ ಎದುರು ನಿಂತು ಅದನ್ನು ತಡೆದ 27 ವರ್ಷದ ಮಾಡೆಲ್ ರಿಯಾ ಆಹಿರ್ ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದ್ದಾರೆ. ದೆಹಲಿಯಲ್ಲಿ ಕಾಕ್ರೋಚ್ ಜನತಾ ಪಾರ್ಟಿ (ಸಿಜೆಪಿ) ನಡೆಸಿದ ಪ್ರತಿಭಟನೆಗೆ ಬೆಂಬಲ ಸೂಚಿಸಲು ಮುಂಬೈನಲ್ಲಿಯೂ ಹಲವು ವಿದ್ಯಾರ್ಥಿ ಸಂಘಟನೆಗಳು ಹಾಗೂ ಸಿಜೆಪಿ ಬೆಂಬಲಿಗರು ಜಮಾಯಿಸಿದ್ದರು.

ಕೋಹಿನೂರ್ ಸ್ಕ್ವೇರ್‌ನಿಂದ ಶಿವಾಜಿ ಪಾರ್ಕ್ ಕಡೆಗೆ ನಡೆಯುತ್ತಿದ್ದ ರಿಯಾ ಆಹಿರ್, ಪ್ರತಿಭಟನಾಕಾರರನ್ನು ತುಂಬಿಕೊಂಡು ಹೊರಟಿದ್ದ ಪೊಲೀಸ್ ವ್ಯಾನ್ ಅನ್ನು ಗಮನಿಸಿದರು. “ವ್ಯಾನ್ ತುಂಬಿ ತುಳುಕುತ್ತಿತ್ತು, ನಿಲ್ಲಲು ಕೂಡ ಜಾಗವಿರಲಿಲ್ಲ” ಎಂದು ಅವರು ಆ ಕ್ಷಣವನ್ನು ಸ್ಮರಿಸಿಕೊಂಡರು.

ಯಾವುದೇ ತಪ್ಪಿಲ್ಲದೆ ಪ್ರತಿಭಟನಾಕಾರರನ್ನು ಪೊಲೀಸರು ವಶಕ್ಕೆ ಪಡೆಯುತ್ತಿದ್ದಾರೆ ಎಂದು ಭಾವಿಸಿದ ಆಹಿರ್, ತಕ್ಷಣವೇ ಆ ವಾಹನದ ಎದುರು ಬಂದು ನಿಂತರು. “ನನ್ನನ್ನು ಅವರ ಘೋಷಣೆಗಳು ಸೆಳೆದವು. ಇದನ್ನು ನಾನು ಸುಮ್ಮನೆ ನೋಡಿಕೊಂಡು ಕೂರಲು ಸಾಧ್ಯವಿರಲಿಲ್ಲ” ಎಂದರು.

ಪೊಲೀಸರೊಂದಿಗೆ ವಾಗ್ವಾದ

ಪೊಲೀಸ್ ಅಧಿಕಾರಿಗಳೊಂದಿಗೆ ನಡೆದ ಮಾತಿನ ಚಕಮಕಿಯ ವೇಳೆ, ಸ್ವಲ್ಪ ದೂರ ಹೋದ ನಂತರ ಬಂಧಿತರನ್ನು ಬಿಡುಗಡೆ ಮಾಡುವುದಾಗಿ ಪೊಲೀಸರು ತಿಳಿಸಿದರು. ಆದರೆ ಇದಕ್ಕೆ ಒಪ್ಪದ ರಿಯಾ, “ನೀವು ಈಗಲೇ ಬಿಡುಗಡೆ ಮಾಡಬೇಕು” ಎಂದು ಪಟ್ಟು ಹಿಡಿದರು.

“ಒಳಗೆ ನಡುಕವಿದ್ದರೂ, ನನ್ನ ನಂಬಿಕೆ ನನ್ನ ಭಯವನ್ನು ಮೀರಿತು. ನಾನು ಮಾಡುತ್ತಿರುವುದು ಸರಿ ಎಂಬ ವಿಶ್ವಾಸವಿತ್ತು” ಎಂದು ಅವರು ತಿಳಿಸಿದರು. ಪೊಲೀಸರು ವಾಹನವನ್ನು ಮುಂದಕ್ಕೆ ಚಲಾಯಿಸಲು ಯತ್ನಿಸಿದರೂ ಅವರು ಜಗ್ಗಲಿಲ್ಲ. ಕೊನೆಗೆ ಪೊಲೀಸರು ಪ್ರತಿಭಟನಾಕಾರರನ್ನು ಬಿಡುಗಡೆ ಮಾಡಿದರು.

ಬಿಡುಗಡೆಯಾದವರು ರಿಯಾ ಅವರಿಗೆ ಧನ್ಯವಾದ ತಿಳಿಸಿದರು. ಈ ಘಟನೆಯು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಪ್ರಜೆಯಾಗಿ ತಮ್ಮ ಕರ್ತವ್ಯವನ್ನು ನಿರ್ವಹಿಸಿದ್ದಾಗಿ ರಿಯಾ ಆಹಿರ್ ತಿಳಿಸಿದ್ದಾರೆ.