ಸ್ಪೇನ್ ಕ್ವಾರ್ಟರ್ ಫೈನಲ್‌ಗೆ: ರೊನಾಲ್ಡೊ ವಿಶ್ವಕಪ್ ಕನಸು ಭಗ್ನ!

ಡಲ್ಲಾಸ್ : 16ರ ಘಟ್ಟದ ಪಂದ್ಯದಲ್ಲಿ ಯೂರೋಪಿಯನ್ ಚಾಂಪಿಯನ್ ಸ್ಪೇನ್ ತಂಡವು ಪೋರ್ಚುಗಲ್ ತಂಡದ ವಿರುದ್ಧ 1-0 ಅಂತರದ ನೀರಸ ಗೆಲುವು ಸಾಧಿಸಿದೆ. ಈ ಮೂಲಕ ಕ್ರಿಸ್ಟಿಯಾನೋ ರೊನಾಲ್ಲೊ ಅವರ ವಿಶ್ವಕಪ್ ಕನಸು ಕೊನೆಗೊಂಡಿದ್ದು, ಪೋರ್ಚುಗಲ್ ತಂಡದ ಮುಖ್ಯ ತರಬೇತುದಾರ ತಮ್ಮ ಸ್ಥಾನಕ್ಕೆ ರಾಜಿನಾಮೆ ಸಲ್ಲಿಸಿದ್ದಾರೆ.
ತಾರಾ ಆಟಗಾರರಿದ್ದರೂ ಪಂದ್ಯ ಅಷ್ಟೇನೂ ರೋಚಕತೆ ಪಡೆಯಲಿಲ್ಲ. ಈ ಪಂದ್ಯದಲ್ಲಿ ಮೂಡಿಬಂದ ಏಕೈಕ ಅತ್ಯುನ್ನತ ಗುಣಮಟ್ಟದ ಕ್ಷಣವೆಂದರೆ, ಅದು ಮೆರಿನೊ ಹೊಡೆದ ಪ್ರಶಾಂತ ಹಾಗೂ ನಿರ್ಣಾಯಕ ಗೋಲು ಮಾತ್ರವಾಗಿತ್ತು. ಆದರೆ, ಉಳಿದ ಯಾವುದೇ ಪ್ರಮುಖ ಆಟಗಾರರು ಸಹ ಇತರ ಪ್ರತಿಸ್ಪರ್ಧಿ ದೇಶಗಳ ಹೈ-ಪ್ರೊಫೈಲ್ ಆಟಗಾರರಂತೆ ಈ ಮಹತ್ವದ ಸಂದರ್ಭಕ್ಕೆ ತಕ್ಕ ಆಟವನ್ನು ಪ್ರದರ್ಶಿಸಲು ವಿಫಲರಾದರು.

ಈ ಪಂದ್ಯದಲ್ಲಿ ಮೈಕೆಲ್ ಮೆರಿನೊ ನಿರ್ಣಾಯಕ ಪಾತ್ರ ವಹಿಸಿದರು. ಪಂದ್ಯದ ದ್ವಿತೀಯಾರ್ಧದ ಹೆಚ್ಚುವರಿ ಸಮಯದಲ್ಲಿ ಬದಲಿ ಆಟಗಾರನಾಗಿ ಕಣಕ್ಕಿಳಿದ ಅವರು, ಫೆರಾನ್ ಟೊರೆಸ್ ನೀಡಿದ ಚತುರ ಪಾಸ್ ಅನ್ನು ಅದ್ಭುತವಾಗಿ ನಿಯಂತ್ರಿಸಿ ಗೋಲು ಗಳಿಸಿದರು.
ಪಂದ್ಯದಲ್ಲಿ ಪೋರ್ಚುಗಲ್ ಪರವಾಗಿ ಗೋಲು ಪೆಟ್ಟಿಗೆಯ ನೇರಕ್ಕೆ ಶಾಟ್ ಹೊಡೆದ ಏಕೈಕ ಆಟಗಾರನೆಂದರೆ ಅದು ರೊನಾಲ್ಲೊ ಮಾತ್ರ. ಆದರೆ, ಸ್ಪೇನ್ ತಂಡದ ಅದ್ಭುತ ನಿಯಂತ್ರಣ ಮತ್ತು ಪ್ರಭಾವಶಾಲಿ ರಕ್ಷಣಾತ್ಮಕ ಆಟದ ವೈಖರಿ ಅಂತಿಮವಾಗಿ ಜಯ ತಂದುಕೊಟ್ಟಿತು. ಸ್ಪೇನ್ ತಂಡವು ವಿಶ್ವಕಪ್ ಇತಿಹಾಸದಲ್ಲೇ ಸತತವಾಗಿ ಆರು ಪಂದ್ಯಗಳಲ್ಲಿ ಎದುರಾಳಿಗಳಿಗೆ ಒಂದು ಗೋಲನ್ನೂ ಬಿಟ್ಟುಕೊಡದ ಮೊದಲ ತಂಡ ಎಂಬ ದಾಖಲೆ ಬರೆದಿದೆ. ಅಷ್ಟೇ ಅಲ್ಲದೆ, ಈ ಪ್ರಸಕ್ತ ಟೂರ್ನಿಯಲ್ಲಿ ಅವರು ಇದುವರೆಗೆ ಒಂದೂ ಗೋಲನ್ನು ಬಿಟ್ಟುಕೊಟ್ಟಿಲ್ಲ.
ಲೂಯಿಸ್ ಡಿ ಲಾ ಫ್ಯುಯೆಂಟೆ ಅವರ ನೇತೃತ್ವದ ಸ್ಪೇನ್ ತಂಡವು, 2010 ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ತನ್ನ ಏಕೈಕ ವಿಶ್ವಕಪ್ ಪ್ರಶಸ್ತಿಯನ್ನು ಗೆದ್ದ ನಂತರ ಇದೇ ಮೊದಲ ಬಾರಿಗೆ ಕ್ವಾರ್ಟರ್ ಫೈನಲ್ ಹಂತಕ್ಕೆ ಪ್ರವೇಶಿಸಿದೆ. ಅವರು ಬರುವ ಶುಕ್ರವಾರದಂದು ಅಮೇರಿಕಾ ಅಥವಾ ಬೆಳ್ಳಿಯಂ ತಂಡವನ್ನು ಎದುರಿಸಲಿದ್ದಾರೆ.
ಪಂದ್ಯದ ಬಳಿಕ ಪೋರ್ಚುಗಲ್ ತಂಡದ ಮ್ಯಾನೇಜರ್ ರಾಬರ್ಟೊ ಮಾರ್ಟಿನೆಜ್ ತಮ್ಮ ಸ್ಥಾನದಿಂದ ಕೆಳಗಿಳಿದಿದ್ದಾರೆ.