ಕಾಸರಗೋಡು: ಬಾಣಂತಿಯ ನಗ್ನ ಫೋಟೋ, ವಿಡಿಯೋಗಳನ್ನು ರಹಸ್ಯವಾಗಿ ರೆಕಾರ್ಡ್ ಮಾಡಿ ವೈರಲ್ ಮಾಡಿದ್ದ ಹೋಂ ನರ್ಸ್ ಬಂಧನ!

ಕಾಸರಗೋಡು : ಪ್ರಸವಪೂರ್ವ ಆರೈಕೆಗಾಗಿ ಮನೆಗೆ ಬಂದಿದ್ದ ಹೋಂ ನರ್ಸ್ ಒಬ್ಬಳು, 27 ವರ್ಷದ ಬಾಣಂತಿಯ ಖಾಸಗಿ ಕ್ಷಣಗಳ ನಗ್ನ ಫೋಟೋ ಹಾಗೂ ವಿಡಿಯೋಗಳನ್ನು ರಹಸ್ಯವಾಗಿ ರೆಕಾರ್ಡ್ ಮಾಡಿ, ಆಕೆಯ ಪತಿ ಸೇರಿದಂತೆ ಹಲವರಿಗೆ ವಾಟ್ಸಾಪ್‌ನಲ್ಲಿ ಹಂಚಿಕೊಂಡಿರುವ ಆಘಾತಕಾರಿ ಘಟನೆ ಕಾಸರಗೋಡಿನಲ್ಲಿ ಬೆಳಕಿಗೆ ಬಂದಿದೆ. ಸಂತ್ರಸ್ತ ಯುವತಿಯ ದೂರಿನ ಆಧಾರದ ಮೇಲೆ ಕಾಸರಗೋಡು ಪಟ್ಟಣ ಠಾಣೆ ಪೊಲೀಸರು ಕರ್ನಾಟಕ ಮೂಲದ, ಕಾಸರಗೋಡಿನಲ್ಲಿ ವಾಸವಿದ್ದ ಹೋಂ ನರ್ಸ್ ಸುಲೈಖಾ ರಸಿಯಾ (25) ಎಂಬಾಕೆಯನ್ನು ಬಂಧಿಸಿದ್ದಾರೆ.

ಬಾಣಂತಿಗೆ ಆರೈಕೆ ನೀಡುವ ನೆಪದಲ್ಲಿ ಸೆಪ್ಟೆಂಬರ್ 7 ರಿಂದ 20 ರವರೆಗಿನ ಅವಧಿಯಲ್ಲಿ ರಸಿಯಾ ಈ ಹೀನ ಕೃತ್ಯ ಎಸಗಿದ್ದಾಳೆ. ತಾಯಿಗೆ ಅರಿವಿಲ್ಲದಂತೆ ಆಕೆಯ ನಗ್ನ ವಿಡಿಯೋ ಹಾಗೂ ಫೋಟೋಗಳನ್ನು ತನ್ನ ಮೊಬೈಲ್‌ನಲ್ಲಿ ರೆಕಾರ್ಡ್ ಮಾಡಿಕೊಂಡಿದ್ದಳು. ಬಾಣಂತಿಯು ಹೋಂ ನರ್ಸ್‌ನ ಮೊಬೈಲ್ ನೋಡಿದಾಗ ಈ ರಹಸ್ಯ ರೆಕಾರ್ಡಿಂಗ್‌ಗಳು ಹಾಗೂ ಅವುಗಳನ್ನು ಹಲವರಿಗೆ ವಾಟ್ಸಾಪ್ ಮೂಲಕ ಶೇರ್ ಮಾಡಿರುವುದು ಬೆಳಕಿಗೆ ಬಂದಿದೆ.

ಇದೊಂದು ದೊಡ್ಡ ಬ್ಲ್ಯಾಕ್‌ಮೇಲಿಂಗ್ ಜಾಲದ ಕೃತ್ಯವಾಗಿರಬಹುದು, ರಸಿಯಾಳ ಪತಿ ಹಾಗೂ ಇತರರು ಇದರಲ್ಲಿ ಭಾಗಿಯಾಗಿರುವ ಶಂಕೆಯಿದೆ ಎಂದು ಸಂತ್ರಸ್ತೆಯ ಕುಟುಂಬಸ್ಥರು ಆರೋಪಿಸಿದ್ದಾರೆ. ಈ ಬಗ್ಗೆಯೂ ಆಳವಾದ ತನಿಖೆ ನಡೆಸಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ. ಕೃತ್ಯಕ್ಕೆ ಬಳಸಲಾದ ಮೊಬೈಲ್ ಫೋನ್ ಅನ್ನು ಪೊಲೀಸರು ವಶಪಡಿಸಿಕೊಂಡಿದ್ದು, ಡಿಜಿಟಲ್ ಸಾಕ್ಷ್ಯಾಧಾರಗಳಿಗಾಗಿ ವಿಧಿವಿಜ್ಞಾನ ತನಿಖೆಗೆ ಒಳಪಡಿಸಲಾಗಿದೆ.

ಆರೋಪಿ ರಸಿಯಾ ವಿರುದ್ಧ ಲೈಂಗಿಕ ದೌರ್ಜನ್ಯ (BNS ಸೆಕ್ಷನ್ 77), ಗೌಪ್ಯತೆಯ ಉಲ್ಲಂಘನೆ (IT ಕಾಯ್ದೆ ಸೆಕ್ಷನ್ 66E) ಹಾಗೂ ಮಹಿಳೆಯರ ಮೇಲಿನ ದೌರ್ಜನ್ಯ (ಕೇರಳ ಪೊಲೀಸ್ ಕಾಯ್ದೆ ಸೆಕ್ಷನ್ 119B) ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಕಾಸರಗೋಡು ಪಟ್ಟಣ ಠಾಣಾ ಇನ್‌ಸ್ಪೆಕ್ಟರ್ ಮೆಲ್ಬಿನ್ ಜೋಸ್ ಪ್ರಕರಣದ ಮುಂದಿನ ತನಿಖೆ ನಡೆಸುತ್ತಿದ್ದಾರೆ.