ಪಾನೀಯದಲ್ಲಿ ಡ್ರಗ್ಸ್ ಬೆರೆಸಿ ಯುವತಿಗೆ ಕಿರುಕುಳ; ಹುಟ್ಟುಹಬ್ಬದ ಸಂಭ್ರಮದಲ್ಲೇ ನರಕಯಾತನೆ ಅನುಭವಿಸಿದ ಮಿಲ್ಲಿ!

ಲಂಡನ್: ಯುನೈಟೆಡ್ ಕಿಂಗ್‌ಡಂನಲ್ಲಿ ತನ್ನ 18ನೇ ವರ್ಷದ ಹುಟ್ಟುಹಬ್ಬದ ಸಂಭ್ರಮದಲ್ಲಿದ್ದ ಮಿಲ್ಲಿ ಟ್ಯಾಪ್ಲಿನ್ ಎಂಬ ಯುವತಿ, ನೈಟ್‌ಕ್ಲಬ್‌ನಲ್ಲಿ ಅಪರಿಚಿತ ವ್ಯಕ್ತಿಯೊಬ್ಬ ನೀಡಿದ ಪಾನೀಯವನ್ನು ಸೇವಿಸಿ ಗಂಭೀರ ಸ್ಥಿತಿಗೆ ತಲುಪಿದ ಘಟನೆ ವರದಿಯಾಗಿದೆ. “ವೋಡ್ಕಾ ಮತ್ತು ನಿಂಬೆ ಪಾನಕ” ಎಂದು ಹೇಳಿ ಆ ವ್ಯಕ್ತಿ ನೀಡಿದ ಕಾಕ್‌ಟೇಲ್‌ನಿಂದ ಕೇವಲ ಒಂದು ಸಿಪ್ ಕುಡಿದ ಕೆಲವೇ ಕ್ಷಣಗಳಲ್ಲಿ ಮಿಲ್ಲಿಯ ಇಡೀ ದೇಹವು ಸ್ತಬ್ಧಗೊಂಡಿದೆ. ಮುಖ ಮರಗಟ್ಟಿ, ಕೈಬೆರಳುಗಳು ಬಿಗಿದುಕೊಂಡು ಪಾರ್ಶ್ವವಾಯು ಪೀಡಿತರಂತೆ ಅವರು ಸ್ಥಳದಲ್ಲೇ ಕುಸಿದುಬಿದ್ದಿದ್ದಾರೆ.
ಆಸ್ಪತ್ರೆಗೆ ದಾಖಲಾದ ಮಿಲ್ಲಿ ತನ್ನ ಭೀಕರ ಅನುಭವವನ್ನು ವಿವರಿಸುತ್ತಾ, ಆ ಸಮಯದಲ್ಲಿ ತನಗೆ ಪ್ರಜ್ಞೆಯಿದ್ದರೂ ದೇಹವನ್ನು ಕಿಂಚಿತ್ತೂ ಚಲಿಸಲು ಸಾಧ್ಯವಾಗುತ್ತಿರಲಿಲ್ಲ ಮತ್ತು ತನ್ನ ದೇಹದೊಳಗೇ ತಾನು ಸಿಲುಕಿಕೊಂಡಂತೆ ಆಂತರಿಕವಾಗಿ ನರಳುತ್ತಿರುವುದಾಗಿ ತಿಳಿಸಿದ್ದಾರೆ. ಪಾನೀಯದಲ್ಲಿ ಪಾರ್ಶ್ವವಾಯು ಮತ್ತು ನಿದ್ರಾಜನಕ ಉಂಟುಮಾಡುವ ಎರಡು ಪ್ರಬಲ ರಾಸಾಯನಿಕಗಳನ್ನು ಬೆರೆಸಿರುವ ಸಾಧ್ಯತೆಯಿದೆ ಎಂದು ವೈದ್ಯರು ಅಭಿಪ್ರಾಯಪಟ್ಟಿದ್ದಾರೆ. ಈ ಆಘಾತಕಾರಿ ಘಟನೆಯ ನಂತರ, “ಯಾವುದೇ ಕಾರಣಕ್ಕೂ ಅಪರಿಚಿತರು ನೀಡುವ ಪಾನೀಯಗಳನ್ನು ಸ್ವೀಕರಿಸಬೇಡಿ” ಎಂದು ಮಿಲ್ಲಿಯ ತಾಯಿ ಸಾರ್ವಜನಿಕರಿಗೆ ಎಚ್ಚರಿಕೆಯ ಸಂದೇಶ ರವಾನಿಸಿದ್ದಾರೆ.