ದೆಹಲಿ: ಭಾರತದಲ್ಲಿ ಸಕ್ಕತ್ ಪ್ರಭಾವ ಬೀರಿದ ಈರುಳ್ಳಿ ಬೆಲೆಏರಿಕೆ ಸೆಪ್ಟೆಂಬರ್‌ನಲ್ಲಿ ಶೇ.7.74ಕ್ಕೆ ಜಿಗಿದ ಆಹಾರ ಹಣದುಬ್ಬರ!

ಹೊಸದಿಲ್ಲಿ: 2026ರ ಆಗಸ್ಟ್ ನಲ್ಲಿ ಶೇ.5.97ರಷ್ಟಿದ್ದ ಭಾರತದ ವಾರ್ಷಿಕ ಆಹಾರ ಹಣದುಬ್ಬರವು ಸೆಪ್ಟೆಂಬರ್‌ನಲ್ಲಿ ಶೇ.774ಕ್ಕೆ ಏರಿಕೆಯಾಗಿದೆ. ಕಳೆದ 12 ತಿಂಗಳುಗಳಲ್ಲಿ ಈರುಳ್ಳಿ ಬೆಲೆ ದ್ವಿಗುಣಗೊಂಡಿದ್ದು, ಈ ಏರಿಕೆಗೆ ಪ್ರಮುಖ ಕಾರಣವಾಗಿದೆ. ಆಹಾರ ಬೆಲೆಗಳ ಏರಿಕೆಯಿಂದಾಗಿ ಒಟ್ಟಾರೆ ಚಿಲ್ಲರೆ ಹಣದುಬ್ಬರವು ಶೇ.5.54ಕ್ಕೆ ತಲುಪಿದೆ. ಇದು 2024 ಅನ್ನು ಆಧಾರ ವರ್ಷವನ್ನಾಗಿ ಹೊಂದಿರುವ ಹೊಸ ಗ್ರಾಹಕ ಬೆಲೆ ಸೂಚ್ಯಂಕ (ಸಿಪಿಐ) ಸರಣಿಯಡಿ ಅಕ್ಟೋಬರ್ 2024ರ ನಂತರದ ಅತ್ಯಧಿಕ ಏರಿಕೆಯಾಗಿದೆ.

ಅಂಕಿಅಂಶ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯವು ಅಕ್ಟೋಬರ್ 12ರಂದು ಬಿಡುಗಡೆ ಮಾಡಿದ ದತ್ತಾಂಶದ ಪ್ರಕಾರ, ಆಗಸ್ಟ್‌ನಲ್ಲಿ ಶೇ.48.78ರಷ್ಟಿದ್ದ ಈರುಳ್ಳಿ ಹಣದುಬ್ಬರವು ಸೆಪ್ಟೆಂಬರ್ ನಲ್ಲಿ ಶೇ.108.09ಕ್ಕೆ ಏರಿಕೆಯಾಗಿದೆ. ಶುಂಠಿ ಬೆಲೆ ವಾರ್ಷಿಕವಾಗಿ ಶೇ.62.85, ಬೆಳ್ಳುಳ್ಳಿ ಬೆಲೆ ಶೇ.54.62 ಮತ್ತು ನಿಂಬೆಹಣ್ಣಿನ ಬೆಲೆ ಶೇ.36.41ರಷ್ಟು ಹೆಚ್ಚಾಗಿವೆ. ಆದರೆ, ಈ ಬೆಲೆ ಏರಿಕೆಯು ಎಲ್ಲ ಆಹಾರ ಪದಾರ್ಥಗಳಲ್ಲೂ ಒಂದೇ ರೀತಿಯಲ್ಲಿರಲಿಲ್ಲ. ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಆಲೂಗಡ್ಡೆ ಬೆಲೆ ಶೇ11.50ರಷ್ಟು ಮತ್ತು ಟೊಮೆಟೊ ಬೆಲೆ ಶೇ.8.62ರಷ್ಟು ಕುಸಿದಿವೆ.

ಗ್ರಾಮೀಣ ಭಾರತದಲ್ಲಿ ಬೆಲೆ ಏರಿಕೆಯ ಪರಿಣಾಮ ಮತ್ತಷ್ಟು ಹೆಚ್ಚಾಗಿದೆ. ಸೆಪ್ಟೆಂಬರ್‌ನಲ್ಲಿ ಗ್ರಾಮೀಣ ಪ್ರದೇಶಗಳಲ್ಲಿ ಆಹಾರ ಹಣದುಬ್ಬರವು ಶೇ.8.06ರಷ್ಟಿದ್ದರೆ, ನಗರ ಪ್ರದೇಶಗಳಲ್ಲಿ ಶೇ.7.18ರಷ್ಟಿತ್ತು. ಗ್ರಾಮೀಣ ಮತ್ತು ನಗರ ಪ್ರದೇಶಗಳ ನಡುವಿನ ಈ ಹಣದುಬ್ಬರದ ವ್ಯತ್ಯಾಸವು ಗಮನಾರ್ಹವಾಗಿದೆ. ಏಕೆಂದರೆ, ಕಡಿಮೆ ಆದಾಯದ ಕುಟುಂಬಗಳ ಒಟ್ಟು ವೆಚ್ಚದಲ್ಲಿ ಆಹಾರದ ಪಾಲು ಹೆಚ್ಚಾಗಿರುತ್ತದೆ.
ಅಂತರರಾಷ್ಟ್ರೀಯ ಮಾರುಕಟ್ಟೆಗಳಲ್ಲೂ ಬೆಲೆಗಳು ಹೆಚ್ಚಾಗುತ್ತಿವೆ. ವಿಶ್ವಸಂಸ್ಥೆಯ ಆಹಾರ ಮತ್ತು ಕೃಷಿ ಸಂಸ್ಥೆಯ ಆಹಾರ ಬೆಲೆ ಸೂಚ್ಯಂಕವು ಸೆಪ್ಟೆಂಬರ್‌ನಲ್ಲಿ ಸರಾಸರಿ 136.0 ಅಂಕಗಳಿಗೆ ತಲುಪಿದೆ. ಇದು ಆಗಸ್ಟ್ಗೆ ಹೋಲಿಸಿದರೆ ಶೇ.1.5ರಷ್ಟು ಮತ್ತು ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಶೇ.5.8ರಷ್ಟು ಹೆಚ್ಚಳವಾಗಿದೆ.