ಬಿಹಾರ: ಎಸಿ ರೈಲಿನಲ್ಲಿ ಅಕ್ರಮವಾಗಿ ಮದ್ಯ ಸಾಗಾಟ; ಇಂಗ್ಲಿಷ್‌ನಲ್ಲಿ ಮಾತನಾಡುವ ಯುವತಿ ಸೇರಿದಂತೆ ಇಬ್ಬರ ಬಂಧನ!

ಬಿಹಾರ : ನವದೆಹಲಿಯಿಂದ ಬಿಹಾರಕ್ಕೆ ಪ್ರಯಾಣಿಸುತ್ತಿದ್ದ ರೈಲಿನ ಫಸ್ಟ್ ಎಸಿ ಕಂಪಾರ್ಟ್‌ಮೆಂಟ್‌ನಲ್ಲಿ ಅಕ್ರಮವಾಗಿ ಸಾಗಿಸಲಾಗುತ್ತಿದ್ದ ಸುಮಾರು 1.5 ಲಕ್ಷ ರೂಪಾಯಿ ಮೌಲ್ಯದ 75 ಲೀಟರ್ ವಿದೇಶಿ ಮದ್ಯವನ್ನು ರೈಲ್ವೆ ರಕ್ಷಣಾ ಪಡೆ (RPF) ಹಾಗೂ ಸರ್ಕಾರಿ ರೈಲ್ವೆ ಪೊಲೀಸ್ (GRP) ಸಿಬ್ಬಂದಿ ಜಂಟಿ ಕಾರ್ಯಾಚರಣೆ ನಡೆಸಿ ವಶಪಡಿಸಿಕೊಂಡಿದ್ದಾರೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ 25 ವರ್ಷದ ನೇಹಾ ಝಾ ಹಾಗೂ ಆಕೆಯ ಸಂಬಂಧಿ ಇಶಾನ್ ಕುಮಾರ್ ಎಂಬುವವರನ್ನು ಬಂಧಿಸಲಾಗಿದೆ.

ರೈಲು ಸಮಷ್ಟಿಪುರ ಜಂಕ್ಷನ್ ತಲುಪಿದಾಗ H-1 ಫಸ್ಟ್ ಎಸಿ ಕೋಚ್‌ನ ಬಾಗಿಲು ಒಳಗಿನಿಂದ ಲಾಕ್ ಆಗಿರುವುದನ್ನು ಕಂಡು ಅನುಮಾನಗೊಂಡ ಪೊಲೀಸರು, ಬಾಗಿಲು ತೆರೆಸಿ ಪರಿಶೀಲಿಸಿದಾಗ ಈ ಅಕ್ರಮ ಮದ್ಯದ ಸರಕು ಪತ್ತೆಯಾಗಿದೆ. ಬಂಧಿತ ಇಶಾನ್ ಹೆಸರಿನಲ್ಲಿ ಬರ್ತ್ ಬುಕ್ ಆಗಿದ್ದರೆ, ನೇಹಾ ಝಾ ಟಿಕೆಟ್ ಇಲ್ಲದೆ ಪ್ರಯಾಣಿಸುತ್ತಿದ್ದರು ಎಂದು ತಿಳಿದುಬಂದಿದೆ.

ಆರಂಭಿಕ ವಿಚಾರಣೆ ವೇಳೆ ನೇಹಾ ಝಾ, “ಡಿಸೆಂಬರ್‌ನಲ್ಲಿ ನಮ್ಮ ಮನೆಯಲ್ಲಿ ನಡೆಯಲಿರುವ ಮದುವೆ ಸಮಾರಂಭಕ್ಕಾಗಿ ಹರಿಯಾಣದಿಂದ ಈ ಮದ್ಯವನ್ನು ತೆಗೆದುಕೊಂಡು ಹೋಗುತ್ತಿದ್ದೆ” ಎಂದು ಹೇಳಿಕೆ ನೀಡಿದ್ದಾರೆ. ಶೋಧ ಕಾರ್ಯಾಚರಣೆ ವೇಳೆ ಪೊಲೀಸರೊಂದಿಗೆ ಅತ್ಯಂತ ಶಾಂತವಾಗಿ, ನಿರರ್ಗಳವಾಗಿ ಇಂಗ್ಲಿಷ್‌ನಲ್ಲಿ ಸಂವಹನ ನಡೆಸಿದ ಆಕೆಯ ವೀಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ದರ್ಭಂಗಾದ ಕೆಎಸ್ ಕಾಲೇಜಿನಲ್ಲಿ ಪದವಿ ಮುಗಿಸಿರುವ ನೇಹಾ ಝಾ ಅವರ ಕುಟುಂಬ ಈ ಹಿಂದೆಯೂ ಇಂತಹ ಪ್ರಕರಣಗಳಲ್ಲಿ ಭಾಗಿಯಾಗಿರುವುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ:

ತಂದೆ: ಸಂಜಯ್ ಕುಮಾರ್ ಝಾ ಅವರನ್ನು ಎರಡು ವರ್ಷಗಳ ಹಿಂದೆ ಮದ್ಯ ಸಂಬಂಧಿತ ಪ್ರಕರಣದಲ್ಲೇ ಬಂಧಿಸಲಾಗಿತ್ತು. ಸಹೋದರಿ: ಅಕ್ಕ ನಿಶು ಝಾ ಅವರನ್ನು 21 ಲೀಟರ್ ವಿದೇಶಿ ಮದ್ಯ ಸಾಗಿಸುತ್ತಿದ್ದ ಆರೋಪದ ಮೇಲೆ ನವೆಂಬರ್ 30, 2025 ರಂದು ಅಬಕಾರಿ ಇಲಾಖೆ ಬಂಧಿಸಿತ್ತು.

ಸಹೋದರರು: ಒಬ್ಬ ಸಹೋದರ ಶಾಲೆಯಲ್ಲಿ ಓದುತ್ತಿದ್ದರೆ, ಮತ್ತೊಬ್ಬ ನೀಟ್ (NEET) ಪರೀಕ್ಷೆಯಲ್ಲಿ ಅನುತ್ತೀರ್ಣನಾದ ಬಳಿಕ ಮದ್ಯದ ವ್ಯಸನಕ್ಕೆ ಒಳಗಾಗಿ ಮುಜಫರ್ಪುರದ ವ್ಯಸನ ಮುಕ್ತಿ ಕೇಂದ್ರದಲ್ಲಿದ್ದಾನೆ.
ಸಮಷ್ಟಿಪುರ ರೈಲ್ವೆ ಪೊಲೀಸ್ ಠಾಣೆಯ ತನಿಖಾಧಿಕಾರಿ ಬಿರ್ಬಲ್ ಕುಮಾರ್ ಅವರು ಬಿಹಾರದ ಕಟ್ಟುನಿಟ್ಟಿನ ‘ಮದ್ಯ ನಿಷೇಧ ಕಾಯ್ದೆ’ಯಡಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ವಶಪಡಿಸಿಕೊಂಡಿರುವ ನೇಹಾ ಅವರ ಮೊಬೈಲ್‌ನಲ್ಲಿ ದರ್ಭಂಗಾದ ಪ್ರಮುಖ ಉದ್ಯಮಿಗಳು ಹಾಗೂ ವೈದ್ಯರ ಫೋನ್ ನಂಬರ್‌ಗಳು ಪತ್ತೆಯಾಗಿದ್ದು, ಆಕೆಯ ವಾಟ್ಸಾಪ್ ಸಂಭಾಷಣೆ ಮತ್ತು ಕರೆ ವಿವರಗಳನ್ನು (CDR) ಪೊಲೀಸರು ಜಾಲಾಡುತ್ತಿದ್ದಾರೆ. ಮದುವೆಯ ನೆಪ ಹೇಳಿ ಅಕ್ರಮ ಮದ್ಯ ಜಾಲ ನಡೆಸಲಾಗುತ್ತಿತ್ತೇ ಎಂಬ ಕೋನದಲ್ಲೂ ತನಿಖೆ ಮುಂದುವರಿದಿದೆ.