ಯುಎಸ್ ಓಪನ್ ಟೆನ್ನಿಸ್: ಮಂಡಿ ನೋವಿನ ಸಮಸ್ಯೆಯಿಂದಾಗಿ ಟೂರ್ನಿಯಿಂದ ಹಿಂದೆ ಸರಿದ ವಿಶ್ವದ ನಂ.1 ಆಟಗಾರ ಜಾನಿಕ್ ಸಿನ್ನರ್!

ವಾಷಿಂಗ್ಟನ್: ವಿಶ್ವದ ನಂ.1 ಟೆನ್ನಿಸ್ ಆಟಗಾರ ಜಾನಿಕ್ ಸಿನ್ನರ್ ಅವರು ನಿರಂತರವಾಗಿ ಕಾಡುತ್ತಿರುವ ಬಲ ಮಂಡಿ ನೋವಿನ ಕಾರಣ 2026ರ ಯುಎಸ್ ಓಪನ್ ಟೂರ್ನಿಯಿಂದ ಹಿಂದೆ ಸರಿದಿದ್ದಾರೆ. ಈ ಋತುವಿನ ಅಂತಿಮ ಗ್ರಾಂಡ್ ಸ್ಲಾಮ್ ಆರಂಭಕ್ಕೂ ಮುನ್ನವೇ ಪುರುಷರ ಸಿಂಗಲ್ಸ್ ವಿಭಾಗಕ್ಕೆ ಇದು ದೊಡ್ಡ ಹೊಡೆತವಾಗಿದೆ.
25 ವರ್ಷದ ಇಟಲಿಯ ಆಟಗಾರ ಜಾನಿಕ್ ಸಿನ್ನರ್ ಅವರು, ಪಂದ್ಯಾವಳಿ ಆರಂಭವಾಗಲು ಕೆಲವೇ ದಿನಗಳು ಬಾಕಿ ಇರುವಾಗ, ಶುಕ್ರವಾರ (ಆಗಸ್ಟ್ 21) ಈ ನಿರ್ಧಾರವನ್ನು ಪ್ರಕಟಿಸಿದರು.
ಈ ಬಗ್ಗೆ ಎಕ್ಸಲ್ಲಿ ಪ್ರಕಟಿಸಿರುವ ಅವರು, “ನನ್ನ ತಂಡ ಮತ್ತು ವೈದ್ಯಕೀಯ ಸಿಬ್ಬಂದಿಯೊಂದಿಗೆ ಸಾಕಷ್ಟು ಶ್ರಮಿಸಿದ್ದರೂ, ಈ ವರ್ಷದ ಯುಎಸ್ ಓಪನ್ನಲ್ಲಿ ಸ್ಪರ್ಧಿಸಲು ಸಾಧ್ಯವಾಗುವುದಿಲ್ಲ ಎಂಬ ಕಠಿಣ ನಿರ್ಧಾರವನ್ನು ಈಗ ತೆಗೆದುಕೊಳ್ಳಬೇಕಾಗಿದೆ ಎಂದು ತಿಳಿಸಿದ್ದಾರೆ.ಕಳೆದ ಕೆಲವು ದಿನಗಳಿಂದ ಮತ್ತೆ ಅಂಕಣಕ್ಕೆ ಮರಳಿದ್ದರೂ, ಬಲ ಮಂಡಿಯ ಸಮಸ್ಯೆಯಿಂದ ಸಂಪೂರ್ಣವಾಗಿ ಚೇತರಿಸಿಕೊಳ್ಳಲು ಇನ್ನೂ ಹೆಚ್ಚಿನ ಸಮಯ ಬೇಕಾಗಿದೆ ಎಂದು ಅವರು ತಿಳಿಸಿದ್ದಾರೆ. ನ್ಯೂಯಾರ್ಕ್ ತಮ್ಮ ಹೃದಯದಲ್ಲಿ ವಿಶೇಷ ಸ್ಥಾನವನ್ನು ಹೊಂದಿರುವುದರಿಂದ, ಈ ನಿರ್ಧಾರದಿಂದ ತಮಗೆ ನಿಜವಾಗಿಯೂ ತುಂಬಾ ಬೇಸರ ಮತ್ತು ನಿರಾಶೆಯಾಗಿದೆ ಎಂದು ಭಾವುಕವಾಗಿ ಬರೆದುಕೊಂಡಿದ್ದಾರೆ.
ಅದ್ಭುತವಾಗಿ ಸಾಗುತ್ತಿದ್ದ ಸಿನ್ನರ್ ಅವರ 2026ರ ಟೆನ್ನಿಸ್ ಋತುವಿಗೆ ಈ ನಿರ್ಗಮನವು ದೊಡ್ಡ ಹಿನ್ನಡೆ ತಂದೊಡ್ಡಿದೆ. ಈ ಇಟಾಲಿಯನ್ ಆಟಗಾರನು ಈ ಋತುವಿನಲ್ಲಿ 44-3 ಗೆಲುವು-ಸೋಲಿನ ದಾಖಲೆಯೊಂದಿಗೆ ಆರು ಪ್ರಶಸ್ತಿಗಳನ್ನು ಗೆದ್ದು, ಎಟಿಪಿ ಟೂರ್ನಲ್ಲಿ ತಮ್ಮ ಪ್ರಭುತ್ವ ಮೆರೆದಿದ್ದರು.
ಈ ವರ್ಷ ವಿಂಬಲ್ಡನ್ ಪ್ರಶಸ್ತಿಯನ್ನು ಯಶಸ್ವಿಯಾಗಿ ಉಳಿಸಿಕೊಂಡ ಬಳಿಕ ಸಿನ್ನ‌ರ್ ಯಾವುದೇ ಸ್ಪರ್ಧಾತ್ಮಕ ಪಂದ್ಯವನ್ನು ಆಡಿಲ್ಲ. ಯುಎಸ್ ಓಪನ್ನಿಂದ ಹೊರಗುಳಿದರೂ, ರ್ಯಾಂಕಿಂಗ್ ಅಂಕಗಳಲ್ಲಿ 5,000ಕ್ಕೂ ಅಧಿಕ ಬೃಹತ್ ಮುನ್ನಡೆ ಹೊಂದಿರುವುದರಿಂದ, ಟೂರ್ನಿ ಮುಗಿಯುವವರೆಗೂ ವಿಶ್ವದ ನಂ.1 ರ್ಯಾಂಕಿಂಗ್ ಅನ್ನು ಸಿನ್ನ‌ರ್ ಉಳಿಸಿಕೊಳ್ಳುವ ನಿರೀಕ್ಷೆಯಿದೆ. ಆದರೆ, ಕಳೆದ ವರ್ಷದ ಯುಎಸ್ ಓಪನ್ ಫೈನಲ್ ತಲುಪಿದ್ದಕ್ಕಾಗಿ ಗಳಿಸಿದ್ದ ರ್ಯಾಂಕಿಂಗ್ ಅಂಕಗಳನ್ನು ಅವರು ಕಳೆದುಕೊಳ್ಳಲಿದ್ದಾರೆ.