ಗ್ಲಾಸ್ಕೋ ಕಾಮನ್ವೆಲ್ತ್ ಗೇಮ್ಸ್ 2026: ಜೂಡೋದಲ್ಲಿ ಇತಿಹಾಸ ಸೃಷ್ಟಿಸಿದ ಹರ್ಷ್ ಸಿಂಗ್!

ಗ್ಲಾಸ್ಕೋ : ಕಾಮನ್ವೆಲ್ತ್ ಗೇಮ್ಸ್ 2026 ರಲ್ಲಿ ಭಾರತದ ಹರ್ಷ್ ಸಿಂಗ್ ಚಿನ್ನವನ್ನು ಗೆಲ್ಲುವುದರ ಮೂಲಕ ಜೂಡೋದಲ್ಲಿ ಮತ್ತೊಂದು ಚಿನ್ನವನ್ನು ಗೆದ್ದಿದೆ. ಜೂಡೋ ಮತ್ತು ಅಥ್ಲೆಟಿಕ್ಸ್ ವಿಭಾಗದಲ್ಲಿ ಒಟ್ಟು 6 ಪದಕಗಳನ್ನು ಗೆಲ್ಲುವುದರ ಜೊತೆಗೆ, ಬಾಕ್ಸಿಂಗ್‌ನಲ್ಲಿ ಸೆಮಿಫೈನಲ್ ತಲುಪಿದ್ದ ಎಲ್ಲಾ ಬಾಕ್ಸರ್‌ಗಳು ಫೈನಲ್‌ಗೆ ತಲುಪಿದರು.
ಜೂಡೊ ಪುರುಷರ 60 ಕೆಜಿ ವಿಭಾಗದ ಫೈನಲ್‌ನಲ್ಲಿ ಆಸ್ಟ್ರೇಲಿಯಾದ ಜೋಶುವಾ ಕಟ್ ಅವರನ್ನು 10-0 ಅಂತರದಿಂದ ಸಂಪೂರ್ಣವಾಗಿ ನಿಯಂತ್ರಣದಲ್ಲಿಟ್ಟುಕೊಂಡ ಹರ್ಷ್ ಸಿಂಗ್, ಪಂದ್ಯದ ಕೊನೆಯ ಹಂತದಲ್ಲಿ ಅದ್ಭುತ ಥೋ ಮೂಲಕ ಜಯಗಳಿಸಿದರು. ಈ ಮೂಲಕ ಜೂಡೋ ಕಾಮನ್ವೆಲ್ತ್ ಗೇಮ್ಸ್ ಇತಿಹಾಸದಲ್ಲೇ ಚಿನ್ನದ ಪದಕ ಗೆದ್ದ ಮೊದಲ ಭಾರತೀಯ ಪುರುಷ ಜೂಡೋ ಪಟು ಎಂಬ ಹೊಸ ಇತಿಹಾಸ ನಿರ್ಮಿಸಿದರು.

ಮಹಿಳೆಯರ 57 ಕೆಜಿ ವಿಭಾಗದಲ್ಲಿ ಯಾಮಿನಿ ಮೌರ್ಯ ಬೆಳ್ಳಿ ಪದಕ ಗೆಲ್ಲುವುದರೊಂದಿಗೆ ಜೂಡೋದಲ್ಲಿ ಭಾರತ ಮತ್ತೊಂದು ಪದಕದ ಸಾಧನೆ ಮಾಡಿತು. ಇಂಗ್ಲೆಂಡ್‌ನ ಅಸೆಲ್ಯಾ ಟೋಪ್ರಾಕ್ ವಿರುದ್ಧದ ರೋಮಾಂಚಕ ಫೈನಲ್ ಪಂದ್ಯವನ್ನು ಗೋಲ್ಡನ್ ಸ್ಕೋರ್ ಹಂತದವರೆಗೆ ಕೊಂಡೊಯ್ದ ಮೌರ್ಯ, ಕೊನೆಯಲ್ಲಿ ವೀರೋಚಿತವಾಗಿ ಸೋತು ಬೆಳ್ಳಿಗೆ ತೃಪ್ತಿಪಟ್ಟುಕೊಂಡರು.
ತೇಜಸ್ವಿನ್ ಶಂಕರ್ ಡೆಕಾಥಾನ್ ವಿಭಾಗದಲ್ಲಿ 7,976 ಪಾಯಿಂಟ್‌ಗಳೊಂದಿಗೆ ಕಂಚು ಗೆಲ್ಲುವ ಮೂಲಕ ಕಾಮನ್ವೆಲ್ತ್ ಗೇಮ್ಸ್ ಡೆಕಾಥಾನ್‌ನಲ್ಲಿ ಪದಕ ಗೆದ್ದ ಮೊದಲ ಭಾರತೀಯ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.

ಜಾವೆಲಿನ್ ಥೋ ಸ್ಪರ್ಧೆಯಲ್ಲಿ ನೀರಜ್ ಚೋಪ್ರಾ 85.83 ಮೀಟರ್‌ಗಳ ಸಾಧನೆಯೊಂದಿಗೆ ಬೆಳ್ಳಿ ಪದಕ ಗೆದ್ದರು. 85.41 ಮೀಟರ್‌ಗಳ ವೈಯಕ್ತಿಕ ಅತ್ಯುತ್ತಮ ಸಾಧನೆಯೊಂದಿಗೆ ಯಶ್ವೇರ್ ಸಿಂಗ್ ಕಂಚು ಗೆದ್ದರು. ಈ ವಿಭಾಗದಲ್ಲಿ ಶ್ರೀಲಂಕಾದ ರಮೇಶ್ ತರಂಗ ಪತಿರಾಜ್ 89.75 ಮೀಟರ್ ಎಸೆದು ಚಿನ್ನ ಗೆದ್ದರು.
ಇನ್ನೊಂದೆಡೆ, ಸೆಮಿಫೈನಲ್ ತಲುಪಿದ್ದ ಭಾರತದ ಎಲ್ಲಾ 10 ಬಾಕ್ಸರ್‌ಗಳು ತಮ್ಮ ಪಂದ್ಯಗಳನ್ನು ಗೆದ್ದು ಫೈನಲ್‌ ಪ್ರವೇಶಿಸಿದ್ದಾರೆ. ಇದರೊಂದಿಗೆ ಕನಿಷ್ಠ ಬೆಳ್ಳಿ ಪದಕ ಖಚಿತವಾಗಿದ್ದು, ಚಿನ್ನದ ಪದಕದ ನಿರೀಕ್ಷೆ ಜೀವಂತವಾಗಿದೆ.
ದಿನದ ಅಂತ್ಯಕ್ಕೆ 5 ಚಿನ್ನ, 12 ಬೆಳ್ಳಿ 6 ಕಂಚು ಸಾಧನೆಯೊಂದಿಗೆ ಭಾರತ ಒಟ್ಟು ಪದಕಗಳ ಸಂಖ್ಯೆ 23ಕ್ಕೆ ಏರಿದ್ದು, ಪ್ರಸ್ತುತ ಅಂಕಪಟ್ಟಿಯಲ್ಲಿ 10ನೇ ಸ್ಥಾನದಲ್ಲಿದೆ.