ಮೆಮೆಕಾಯಿನ್ ಪ್ರಚಾರಕ್ಕೆ ಮೃಗಾಲಯ ಟಾರ್ಗೆಟ್: ಎಮೋಜಿ ಮಾಸ್ಕ್ ಧರಿಸಿ ಬೇಲಿ ಜಿಗಿದ ಖದೀಮ

ಟೋಕಿಯೋ: ಜಪಾನಿನಲ್ಲಿ ಪಂಚ್ ಕೋತಿ ಇದ್ದ ಮೃಗಾಲಯಕ್ಕೆ ನುಗ್ಗಿದ್ದ ಇಬ್ಬರು ಅಮೆರಿಕನ್ನರನ್ನು ಬಂಧಿಸಲಾಗಿದೆ ಎನ್ನುವ ಮಾಹಿತಿ ಲಭ್ಯವಾಗಿದೆ. ಟೋಕಿಯೋ ಉಪನಗರ ಚಿಬಾದಲ್ಲಿರುವ ಪ್ರಸಿದ್ಧ ಇಚಿಕಾವಾ ಸಿಟಿ ಮೃಗಾಲಯದಲ್ಲಿ ಈ ಘಟನೆ ನಡೆದಿದ್ದು, ಕ್ರಿಪ್ಟೋಕರೆನ್ಸಿ ಪ್ರಚಾರಕ್ಕಾಗಿ ಇವರು ಈ ಹುಚ್ಚು ಸಾಹಸಕ್ಕೆ ಕೈಹಾಕಿದ್ದರು ಎನ್ನಲಾಗಿದೆ.
ಬಂಧಿತರನ್ನು 24 ವರ್ಷದ ರೀಡ್ ಜಹ್ನಾಯಿ ಡೇಸನ್ ಮತ್ತು 27 ವರ್ಷದ ನೀಲ್ ಜಬಾಹ್ರಿ ಡುವಾನ್ ಎಂದು ಗುರುತಿಸಲಾಗಿದೆ. ವೈರಲ್ ಆಗಿರುವ ವಿಡಿಯೋ ತುಣುಕುಗಳ ಪ್ರಕಾರ, ಡೇಸನ್ ನೀಲಿ ಬಣ್ಣದ ಸೂಟ್ ಧರಿಸಿ, ಮುಖಕ್ಕೆ ನಗುತ್ತಿರುವ ದೊಡ್ಡ ಎಮೋಜಿ ಹಾಕಿಕೊಂಡು ಮೃಗಾಲಯದ ರಕ್ಷಣಾ ಬೇಲಿಯನ್ನು ಜಿಗಿದು ಕೋತಿಗಳ ಆವರಣದೊಳಗೆ ನುಗ್ಗಿದ್ದರು, ಮತ್ತೊಬ್ಬ ಆರೋಪಿ ಡುವಾನ್ ಈ ಇಡೀ ದೃಶ್ಯವನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿಯುತ್ತಿದ್ದ.
ಡೇಸನ್ ಧರಿಸಿದ್ದ ವಿಚಿತ್ರ ಉಡುಗೆ ಮತ್ತು ಎಮೋಜಿ ಮಾಸ್ಕ್, ಡಿಜಿಟಲ್ ಹಣವಾದ ಮೆಮೆಕಾಯಿನ್ ಕ್ರಿಪ್ಟೋಕರೆನ್ಸಿಗಳನ್ನು ಪ್ರಚಾರ ಮಾಡಲು ಬಳಸುವ ಸಂಕೇತವಾಗಿತ್ತು. ಮೃಗಾಲಯದ ಭದ್ರತಾ ಸಿಬ್ಬಂದಿ ತಕ್ಷಣವೇ ಅಲರ್ಟ್ ಆಗಿ ಇಬ್ಬರನ್ನೂ ವಶಕ್ಕೆ ಪಡೆದಿದ್ದರಿಂದ, ಅವರು ಪಂಚ್ ಅಥವಾ ಅಲ್ಲಿನ ಇತರ ಯಾವುದೇ ಕೋತಿಗಳಿಗೆ ಹಾನಿ ಮಾಡಲು ಸಾಧ್ಯವಾಗಲಿಲ್ಲ.