ಫ್ಲೋರಿಡಾ: ಜೆಫ್ ಬೆಜೋಸ್ ಅವರ 321 ಅಡಿ ಎತ್ತರದ ‘ನ್ಯೂ ಗ್ಲೆನ್’ ರಾಕೆಟ್ ಪರೀಕ್ಷೆ ವೇಳೆ ಭೀಕರ ಸ್ಫೋಟ!

ಫ್ಲೋರಿಡಾದ ಕೇಪ್ ಕೆನಾವೆರಲ್ ಬಾಹ್ಯಾಕಾಶ ನಿಲ್ದಾಣದಲ್ಲಿ ಘಟಿಸಿದ ಮಹಾ ದುರಂತ321 ಅಡಿ ಎತ್ತರದ ದೈತ್ಯ ರಾಕೆಟ್ ಕ್ಷಣಾರ್ಧದಲ್ಲಿ ಭಸ್ಮ; ಇಂಜಿನಿಯರ್‌ಗಳು ಅದೃಷ್ಟವಶಾತ್ ಪಾರು
ಬಿಲಿಯನೇರ್ ಬೆಜೋಸ್‌ಗೆ ತಟ್ಟಿದ ಭಾರಿ ಆಘಾತ; ಸಾಂತ್ವನ ಹೇಳಿದ ಕಡು ಎದುರಾಳಿ ಎಲೋನ್ ಮಸ್ಕ್!

ಫ್ಲೋರಿಡಾ (ಅಮೆರಿಕ): ಜಗತ್ತಿನ ಮುಂಚೂಣಿ ಕೋಟ್ಯಧಿಪತಿ, ಅಮೆಜಾನ್ ಸಂಸ್ಥಾಪಕ ಜೆಫ್ ಬೆಜೋಸ್ ಅವರ ಮಹತ್ವಾಕಾಂಕ್ಷೆಯ ಬಾಹ್ಯಾಕಾಶ ಸಂಸ್ಥೆ ‘ಬ್ಲೂ ಒರಿಜಿನ್’ (Blue Origin) ಗೆ ಜಾಗತಿಕ ಮಟ್ಟದಲ್ಲಿ ಭಾರಿ ಹಿನ್ನಡೆಯಾಗಿದೆ. ಸಂಸ್ಥೆಯ ಅತ್ಯಂತ ಶಕ್ತಿಶಾಲಿ ಮತ್ತು ದೈತ್ಯ ರಾಕೆಟ್ ಆದ ‘ನ್ಯೂ ಗ್ಲೆನ್’ (New Glenn), ಅಮೆರಿಕದ ಫ್ಲೋರಿಡಾದಲ್ಲಿ ನಡೆದ ಹಾರ್ಟ್‌ಫೈರ್ (Hotfire) ಪರೀಕ್ಷೆಯ ವೇಳೆ ಉಡಾವಣಾ ಪ್ಯಾಡ್‌ನಲ್ಲೇ ಭೀಕರವಾಗಿ ಸ್ಫೋಟಗೊಂಡು ಉರಿದು ಬೂದಿಯಾಗಿದೆ. ರಾಕೆಟ್‌ನ ತಳಭಾಗದಿಂದ ದಟ್ಟವಾದ ಹೊಗೆ ಕಾಣಿಸಿಕೊಂಡ ಕೆಲವೇ ಕ್ಷಣಗಳಲ್ಲಿ ಇಡೀ ರಾಕೆಟ್ ದೈತ್ಯ ಬೆಂಕಿಯ ಉಂಡೆಯಾಗಿ ಮಾರ್ಪಡುವ ಲೈವ್ ವಿಡಿಯೋ ಇಡೀ ವಿಶ್ವವನ್ನೇ ಬೆಚ್ಚಿಬೀಳಿಸಿದೆ.

ಸುಮಾರು 98 ಮೀಟರ್ (321 ಅಡಿ) ಎತ್ತರ ಹೊಂದಿದ್ದ ಈ ದೈತ್ಯ ರಾಕೆಟ್‌ಗೆ ಇಂಜಿನ್ ಪರೀಕ್ಷೆಯ ಸಂದರ್ಭದಲ್ಲಿ ಬೆಂಕಿ ಹೊತ್ತಿಕೊಂಡಿದೆ. ಇಂಜಿನ್‌ಗಳು ಪೂರ್ಣ ಪ್ರಮಾಣದಲ್ಲಿ ಕಾರ್ಯನಿರ್ವಹಿಸುವ ಮುನ್ನವೇ ತಾಂತ್ರಿಕ ವೈಪರೀತ್ಯ (Anomaly) ಎದುರಾಗಿದ್ದು, ಇಡೀ ನೌಕೆ ಸ್ಫೋಟಗೊಂಡಿದೆ. “ಇಂದಿನ ಹಾಟ್‌ಫೈರ್ ಪರೀಕ್ಷೆಯ ಸಂದರ್ಭದಲ್ಲಿ ದುರಂತ ಸಂಭವಿಸಿದೆ. ಆದರೆ, ನಮ್ಮ ಸ್ವಯಂಚಾಲಿತ ರಕ್ಷಣಾ ವ್ಯವಸ್ಥೆ ಹಾಗೂ ಇಂಜಿನಿಯರ್‌ಗಳ ಸಮಯಪ್ರಜ್ಞೆಯಿಂದಾಗಿ ಯಾವುದೇ ಜೀವಹಾನಿ ಸಂಭವಿಸಿಲ್ಲ. ಸಿಬ್ಬಂದಿ ಸುರಕ್ಷಿತವಾಗಿದ್ದಾರೆ,” ಎಂದು ಬ್ಲೂ ಒರಿಜಿನ್ ಸಂಸ್ಥೆ ಅಧಿಕೃತವಾಗಿ ಪ್ರಕಟಿಸಿದೆ.
ಈ ಭೀಕರ ಸ್ಫೋಟದ ಬೆನ್ನಲ್ಲೇ ಎಕ್ಸ್ (X) ಖಾತೆಯಲ್ಲಿ ತೀವ್ರ ಬೇಸರ ವ್ಯಕ್ತಪಡಿಸಿರುವ ಜೆಫ್ ಬೆಜೋಸ್, “ಇದು ನಮ್ಮ ಇಡೀ ತಂಡಕ್ಕೆ ಅತ್ಯಂತ ಕಠಿಣವಾದ ದಿನ. ಸ್ಫೋಟಕ್ಕೆ ನಿಖರವಾದ ಕಾರಣವೇನೆಂದು ತಿಳಿಯಲು ತನಿಖೆ ಆರಂಭಿಸಿದ್ದೇವೆ. ಬಾಹ್ಯಾಕಾಶದ ಹಾದಿ ಕಠಿಣವಾದದ್ದು ಎಂದು ನಮಗೆ ಗೊತ್ತು. ಆದರೆ ನಾವು ಧೃತಿಗೆಡುವುದಿಲ್ಲ, ಏನನ್ನು ಮರುನಿರ್ಮಾಣ ಮಾಡಬೇಕೋ ಅದನ್ನು ಮತ್ತೆ ಕಟ್ಟಿ, ಶೀಘ್ರದಲ್ಲೇ ಹಾರಾಟಕ್ಕೆ ಸಿದ್ಧವಾಗುತ್ತೇವೆ,” ಎಂದು ಶಪಥ ಮಾಡಿದ್ದಾರೆ. ಇದೇ ವೇಳೆ ಬೆಜೋಸ್ ಅವರ ಕಡು ಎದುರಾಳಿ, ಸ್ಪೇಸ್ಎಕ್ಸ್ (SpaceX) ಮುಖ್ಯಸ್ಥ ಎಲೋನ್ ಮಸ್ಕ್ ಕೂಡ ಟ್ವೀಟ್ ಮಾಡಿ, “ಇದು ಅತ್ಯಂತ ದುರದೃಷ್ಟಕರ ಘಟನೆ, ಬಾಹ್ಯಾಕಾಶ ತಂತ್ರಜ್ಞಾನದ ಹಾದಿ ಸುಲಭವಲ್ಲ” ಎಂದು ಸಹಾನುಭೂತಿ ವ್ಯಕ್ತಪಡಿಸಿದ್ದಾರೆ.

ಬ್ಲೂ ಒರಿಜಿನ್ ಸಂಸ್ಥೆಗೆ ಇತ್ತೀಚಿನ ದಿನಗಳಲ್ಲಿ ಎದುರಾಗುತ್ತಿರುವ ಎರಡನೇ ದೊಡ್ಡ ಕಂಟಕ ಇದಾಗಿದೆ. ಕಳೆದ ತಿಂಗಳಷ್ಟೇ ನ್ಯೂ ಗ್ಲೆನ್ ರಾಕೆಟ್ ಸಂವಹನ ಉಪಗ್ರಹವೊಂದನ್ನು ತಪ್ಪು ಕಕ್ಷೆಗೆ ತಲುಪಿಸಿ ವಿಫಲವಾಗಿತ್ತು. ಅಮೆರಿಕದ ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್ (FAA) ಆ ಬಗ್ಗೆ ತನಿಖೆ ನಡೆಸುತ್ತಿರುವಾಗಲೇ ಈ ಹೊಸ ದುರಂತ ಸಂಭವಿಸಿದೆ. ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ (NASA) ತನ್ನ ಮಹತ್ವದ ‘ಆರ್ಟೆಮಿಸ್’ ಚಂದ್ರನ ಮಿಷನ್‌ಗಾಗಿ ಚಂದ್ರಾನ್ವೇಷಕ ನೌಕೆಯನ್ನು (Lunar Lander) ಅಭಿವೃದ್ಧಿಪಡಿಸಲು ಬ್ಲೂ ಒರಿಜಿನ್ ಜೊತೆ ಮಲ್ಟಿ-ಬಿಲಿಯನ್ ಡಾಲರ್ ಒಪ್ಪಂದ ಮಾಡಿಕೊಂಡಿತ್ತು. ಆದರೆ ಪ್ರಸ್ತುತ ಸ್ಫೋಟದಿಂದಾಗಿ ನಾಸಾದ ಭವಿಷ್ಯದ ಯೋಜನೆಗಳು ಮತ್ತಷ್ಟು ತಡವಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ.