ಕೇರಳದ ನೂತನ ಸಿಎಂ ವಿ.ಡಿ. ಸತೀಶನ್ ಸೋಷಿಯಲ್ ಮೀಡಿಯಾದಲ್ಲಿ ಫುಲ್ ವೈರಲ್!: ನೆಟ್ಟಿಗರು ಪ್ರೀತಿಯಿಂದ ಇಟ್ಟ ಹೆಸರೇನು ಗೊತ್ತಾ?

ತಿರುವನಂತಪುರಂ: ಕೇರಳದಲ್ಲಿ ಕಾಂಗ್ರೆಸ್ ನೇತೃತ್ವದ ಯುಡಿಎಫ್ (UDF) ಮೈತ್ರಿಕೂಟ ಅಧಿಕಾರಕ್ಕೆ ಬಂದ ಬೆನ್ನಲ್ಲೇ, ರಾಜ್ಯದ ನೂತನ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಿರುವ ವಿ. ಡಿ. ಸತೀಶನ್ (V. D. Satheesan) ಅವರು ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸೌಂಡ್ ಮಾಡುತ್ತಿದ್ದಾರೆ. ಮುಖ್ಯಮಂತ್ರಿಯಾಗಿ ಅಧಿಕಾರ ವಹಿಸಿಕೊಂಡ ನಂತರ ಅವರ ವಿಭಿನ್ನ ಹಾವಭಾವ ಹಾಗೂ ಮುಗುಳ್ನಗೆಯ ವಿಡಿಯೋಗಳು ಇಂಟರ್ನೆಟ್‌ನಲ್ಲಿ ತರಂಗ ಎಬ್ಬಿಸಿದ್ದು, ನೆಟ್ಟಿಗರು ಅವರನ್ನು ಪ್ರೀತಿಯಿಂದ ‘ಪೂಕಿ ಸಿಎಂ’ (Pookie CM) ಎಂದು ಕರೆಯುತ್ತಿದ್ದಾರೆ.ಕಳೆದ ಕೆಲವು ದಿನಗಳಿಂದ ದೆಹಲಿ ಮಟ್ಟದಲ್ಲಿ ನಡೆದ ಸುದೀರ್ಘ ಹೈಡ್ರಾಮಾಕ್ಕೆ ತೆರೆ ಎಳೆದು ಮುಖ್ಯಮಂತ್ರಿ ಗದ್ದುಗೆ ಏರಿರುವ ಸತೀಶನ್, ಪ್ರಮಾಣ ವಚನ ಸ್ವೀಕಾರ ಸಮಾರಂಭದ ಬಳಿಕ ಮಾಧ್ಯಮಗಳೊಂದಿಗೆ ಹಾಗೂ ಪಕ್ಷದ ನಾಯಕರೊಂದಿಗೆ ಅತ್ಯಂತ ಹಸನ್ಮುಖಿಯಾಗಿ ಸಂವಹನ ನಡೆಸಿದ್ದರು. ರಾಹುಲ್ ಗಾಂಧಿ ಮತ್ತು ಪ್ರಿಯಾಂಕಾ ಗಾಂಧಿ ಸಮ್ಮುಖದಲ್ಲಿ ನಡೆದ ಈ ಸಮಾರಂಭದ ವೇಳೆ ಸತೀಶನ್ ಅವರ ಮುದ್ದಾದ ಮುಖಭಾವದ (Cute Expression) ತುಣುಕುಗಳನ್ನು ನೆಟ್ಟಿಗರು ‘ರೀಲ್ಸ್’ ಹಾಗೂ ‘ಶಾರ್ಟ್ಸ್’ ರೂಪದಲ್ಲಿ ವೈರಲ್ ಮಾಡುತ್ತಿದ್ದಾರೆ.ಏನಿದು ‘ಪೂಕಿ’ ಟ್ರೆಂಡ್?
ಸಾಮಾಜಿಕ ಜಾಲತಾಣಗಳ ಇಂದಿನ ಯುವ ಪೀಳಿಗೆಯಲ್ಲಿ (Gen Z) ಅತ್ಯಂತ ಸೌಮ್ಯ, ಮುದ್ದಾದ ಹಾಗೂ ಎಲ್ಲರ ಪ್ರೀತಿಪಾತ್ರರಾದ ವ್ಯಕ್ತಿಗಳನ್ನು ವರ್ಣಿಸಲು ‘ಪೂಕಿ’ (Pookie) ಎಂಬ ಪದವನ್ನು ಬಳಸಲಾಗುತ್ತದೆ. ಸದ್ಯ ಮಲಯಾಳಂ ಸೈಬರ್ ಲೋಕದಲ್ಲಿ ಸತೀಶನ್ ಅವರ ನಗುವಿನ ವಿಡಿಯೋಗಳಿಗೆ “ಸಾಹೇಬ್ರು ಈಗ ನಮ್ಮ ಪೂಕಿ ಸಿಎಂ” ಎಂಬ ಕ್ಯಾಪ್ಷನ್‌ಗಳು ಹರಿದಾಡುತ್ತಿವೆ. ರಾಜಕೀಯದ ಗಂಭೀರತೆಯ ನಡುವೆಯೂ ಅವರ ಈ ‘ವೈರಲ್ ಸ್ಟೈಲ್’ ಭಾರಿ ಜನಪ್ರಿಯತೆ ಗಳಿಸುತ್ತಿದೆ.
ಒಟ್ಟಾರೆಯಾಗಿ, ಇಂದಿರಾ ಗ್ಯಾರಂಟಿ ಸೇರಿದಂತೆ ಹಲವು ಉಚಿತ ಯೋಜನೆಗಳ ಜಾರಿಯ ಸವಾಲು ಹೊತ್ತಿರುವ 65 ವರ್ಷದ ಹಿರಿಯ ನಾಯಕ ವಿ. ಡಿ. ಸತೀಶನ್, ಅಧಿಕಾರ ವಹಿಸಿಕೊಳ್ಳುತ್ತಿದ್ದಂತೆಯೇ ಕೇರಳದ ಯುವ ಜನತೆಯ ‘ಡಿಜಿಟಲ್ ಐಕಾನ್’ ಆಗಿ ಹೊರಹೊಮ್ಮಿರುವುದು ರಾಜಕೀಯ ವಲಯದಲ್ಲಿ ಕುತೂಹಲ ಮೂಡಿಸಿದೆ.