ಹೈದರಾಬಾದ್‌ನಲ್ಲಿ ಭೀಕರ ಆಹಾರ ಕಲಬೆರಕೆ ಜಾಲ ಪತ್ತೆ: ಕೊಳೆತ ಮೊಟ್ಟೆ, ಕಪ್ಪು ಎಣ್ಣೆಯಲ್ಲಿ ತಯಾರಾಗ್ತಿತ್ತು ಸಮೋಸಾ

ಹೈದರಾಬಾದ್‌ನ ಜಿಯಗುಡದಲ್ಲಿ ಸಾರ್ವಜನಿಕರ ಆರೋಗ್ಯಕ್ಕೆ ಮಾರಕವಾಗುವ ರೀತಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಅಕ್ರಮ ಸಮೋಸಾ ಉತ್ಪಾದನಾ ಘಟಕದ ಮೇಲೆ ಪೊಲೀಸರು ಭರ್ಜರಿ ದಾಳಿ ನಡೆಸಿದ್ದಾರೆ. ಹೈದರಾಬಾದ್ ನಗರ ಪೊಲೀಸರ ‘H-FAST’ (ಆಹಾರ ಕಲಬೆರಕೆ ಕಣ್ಗಾವಲು ತಂಡ) ಮತ್ತು ಕುಲ್ಸುಂಪುರ ಪೊಲೀಸರು ಜಂಟಿಯಾಗಿ ನಡೆಸಿದ ಈ ಕಾರ್ಯಾಚರಣೆಯಲ್ಲಿ, ಅಬ್ದುಲ್ ರಶೀದ್ ಎಂಬ 73 ವರ್ಷದ ಆರೋಪಿಯನ್ನು ಬಂಧಿಸಲಾಗಿದೆ. ಈ ಘಟಕದಲ್ಲಿ ಯಾವುದೇ ಮಾನ್ಯ FSSAI ಪರವಾನಗಿ ಅಥವಾ ಅಗ್ನಿ ಸುರಕ್ಷತಾ ನಿಯಮಗಳನ್ನು ಪಾಲಿಸದೆ, ಅತ್ಯಂತ ಅನೈರ್ಮಲ್ಯದ ಸ್ಥಿತಿಯಲ್ಲಿ ಸಮೋಸಾಗಳನ್ನು ತಯಾರಿಸಲಾಗುತ್ತಿತ್ತು. ದಾಳಿಯ ವೇಳೆ 500ಕ್ಕೂ ಹೆಚ್ಚು ಹಾಳಾದ ಬೇಯಿಸಿದ ಮೊಟ್ಟೆಗಳು, ಪದೇ ಪದೇ ಬಳಸಿದ ಕಪ್ಪು ಬಣ್ಣಕ್ಕೆ ತಿರುಗಿದ್ದ ಅಡುಗೆ ಎಣ್ಣೆ ಹಾಗೂ ಸಾವಿರಾರು ಸಿದ್ಧಪಡಿಸಿದ ಸಮೋಸಾಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಸುಮಾರು 5 ಲಕ್ಷ ರೂಪಾಯಿ ಮೌಲ್ಯದ ಈ ಅಕ್ರಮ ಆಹಾರ ಪದಾರ್ಥಗಳು ಸಾರ್ವಜನಿಕರ ಆರೋಗ್ಯಕ್ಕೆ ತೀವ್ರ ಅಪಾಯವನ್ನುಂಟು ಮಾಡುವ ಸಾಧ್ಯತೆಯಿತ್ತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಪ್ರಸ್ತುತ ಆರೋಪಿಯ ವಿರುದ್ಧ ಕಾನೂನು ಕ್ರಮ ಜರುಗಿಸಲಾಗಿದ್ದು, ಕುಲ್ಸುಂಪುರ ಪೊಲೀಸ್ ಠಾಣೆಯಲ್ಲಿ ಹೆಚ್ಚಿನ ತನಿಖೆ ಮುಂದುವರಿದಿದೆ.