ಲೈಂಗಿಕ ಸಮಸ್ಯೆ ಪರಿಹಾರದ ಆಮಿಷ: ಟೆಕ್ಕಿಗೆ ₹48 ಲಕ್ಷ ವಂಚನೆ, ಕಿಡ್ನಿ ಸಮಸ್ಯೆ

ಬೆಂಗಳೂರು: ಲೈಂಗಿಕ ಸಮಸ್ಯೆಗೆ ಪರಿಹಾರ ನೀಡುವುದಾಗಿ ಟೆಕ್ಕಿಯೊಬ್ಬರಿಗೆ (Techie) 48 ಲಕ್ಷ ರೂ. ವಂಚನೆ ಮಾಡಿರುವುದು ಬೆಂಗಳೂರಿನಲ್ಲಿ (Bengaluru) ನಡೆದಿದೆ.

ಮೊದಲು ಟೆಕ್ಕಿ ಕೆಂಗೇರಿಯ (Kengeri) ಮಲ್ಟಿ ಸ್ಪೆಷಾಲಿಟಿ ಆಸ್ಪತ್ರೆಯೊಂದಕ್ಕೆ ಚಿಕಿತ್ಸೆಗೆ ತೆರಳಿದ್ದ. ಆಸ್ಪತ್ರೆಗೆ ಹೋಗಿ ಬರುವಾಗ ರಸ್ತೆಯ ಪಕ್ಕದ ಟೆಂಟ್ ಚಿಕಿತ್ಸೆ ನೀಡುವುದಾಗಿ ವಿಜಯ್ ಗುರೂಜಿ ಎಂಬಾತನ ಬಳಿ ಚಿಕಿತ್ಸೆ ಕೊಡಿಸುವುದಾಗಿ ಕರೆದೊಯ್ದು ವಂಚಿಸಲಾಗಿದೆ. ಔಷಧಿ ಕೊಡುವಾಗ ತಮ್ಮ ಬಳಿ ಮತ್ತೆ ಬರದೇ ಇದ್ದರೇ ಮತ್ತಷ್ಟು ಸಮಸ್ಯೆ ಆಗುವುದಾಗಿ ಗುರೂಜಿ ಬೆದರಿಕೆ ಹಾಕಿದ್ದನಂತೆ

ಟೆಕ್ಕಿಗೆ ಗುರೂಜಿ `ದೇವರಾಜ್ ಬೂಟಿ’ ಎಂದು ಕರೆಯುವ ಔಷಧಿ ಕೊಟ್ಟಿದ್ದ. 1 ಗ್ರಾಂ ಔಷಧಿಗೆ 1,60,000 ರೂ. ಬೆಲೆ ನಿಗದಿ ಮಾಡಿ ಯಶವಂತಪುರದ ಆಯುರ್ವೇದಿಕ್ ಶಾಪ್ ನಿಂದ ಮಾತ್ರ ಖರೀದಿಸಬೇಕೆಂದು ಹೇಳಿದ್ದ. ಅಲ್ಲದೇ ಆನ್‍ಲೈನ್ ಪೇಮೆಂಟ್ ಮಾಡಬಾರದು. ಯಾರು ಜೊತೆಗೆ ಬರಬಾರದು ಎಂದು ಷರತ್ತು ವಿಧಿಸಿದ್ದ.

ಹಲವು ಬಾರಿ ದೇವರಾಜ್ ಬೂಟಿ ಮತ್ತು ಭವನ ಬೂಟಿ ತೈಲ ಖರೀದಿಸಿದ್ದು ಒಟ್ಟು 17 ಲಕ್ಷ. ಖರ್ಚು ಮಾಡಿದ್ದ. ಸಮಸ್ಯೆ ಪರಿಹಾರವಾಗದೆ ಇದ್ದಾಗ ಹಣದ ಕೊರತೆಯಿಂದ ಬ್ಯಾಂಕ್‍ನಲ್ಲಿ 20 ಲಕ್ಷ ರೂ. ಸಾಲ ಪಡೆದು 18 ಗ್ರಾಂ ಔಷಧಿ ಖರೀದಿಸಿದ್ದ.

ಕೊನೆಗೆ ಆರೋಗ್ಯ ಸಮಸ್ಯೆ ಕಾಣಿಸಿಕೊಂಡಿದ್ದು, ರಕ್ತ ಪರೀಕ್ಷೆ ಮಾಡಿದಾಗ ಆಯುರ್ವೇದ ಚಿಕಿತ್ಸೆಯಿಂದ ಕಿಡ್ನಿಗೆ ಸಮಸ್ಯೆಗೆ ಆಗಿರುವುದು ಪತ್ತೆಯಾಗಿದೆ. ವಿಜಯ್ ಗೂರೂಜಿ, ಆಯುರ್ವೇದಿಕ್ ಮೆಡಿಕಲ್ ವಿರುದ್ಧ ಜಾನ್ಞಭಾರತಿ ಪೊಲೀಸ್ ಠಾಣೆಯಲ್ಲಿ ಟೆಕ್ಕಿ ದೂರು ನೀಡಿದ್ದು, ಪ್ರಕರಣ ದಾಖಲಾಗಿದೆ