ಬಾರ್ಮರ್: ಪ್ರೇಮ ವಿವಾಹಕ್ಕೆ ರಕ್ತಸಿಕ್ತ ತಿರುವು; ವರನ ಅಣ್ಣನ ಮೂಗು ಕತ್ತರಿಸಿದ ವಧುವಿನ ಕಡೆಯವರು, ಪ್ರತೀಕಾರವಾಗಿ ಚಿಕ್ಕಪ್ಪನ ಕಾಲು ಮುರಿದ ವರನ ಕುಟುಂಬ!

ಬಾರ್ಮರ್: ರಾಜಸ್ಥಾನದ ಬಾರ್ಮರ್ ಜಿಲ್ಲೆಯಲ್ಲಿ ಪ್ರೇಮ ವಿವಾಹದ ವಿಚಾರವಾಗಿ ಎರಡು ಕುಟುಂಬಗಳ ನಡುವೆ ಉಂಟಾದ ಜಗಳವು ವಿಕೋಪಕ್ಕೆ ತಿರುಗಿದ್ದು, ಅತ್ಯಂತ ಅಮಾನವೀಯ ಕೃತ್ಯವೊಂದು ಸಂಭವಿಸಿದೆ. ಗ್ರಾಮದ ಶ್ರವಣ್ ಸಿಂಗ್ (25) ಮತ್ತು ಅದೇ ಗ್ರಾಮದ ಯುವತಿಯ ಪ್ರೇಮ ವಿವಾಹವನ್ನು ಯುವತಿಯ ಮನೆಯವರು ತೀವ್ರವಾಗಿ ವಿರೋಧಿಸಿದ್ದರು. ಮದುವೆಯ ನಂತರ ದಂಪತಿಗಳು ಗುಜರಾತ್‌ನಲ್ಲಿ ನೆಲೆಸಿದ್ದರೂ, ಗ್ರಾಮದಲ್ಲಿದ್ದ ಅವರ ಕುಟುಂಬಗಳ ನಡುವೆ ದ್ವೇಷದ ಕಿಚ್ಚು ಆರಿರಲಿಲ್ಲ.

ಶ್ರವಣ್ ಸಿಂಗ್ ಅವರ ಅಣ್ಣ ಯುಕೆ ಸಿಂಗ್ (35) ಹೊಲದಿಂದ ಮನೆಗೆ ಹಿಂದಿರುಗುತ್ತಿದ್ದಾಗ, ಯುವತಿಯ ಚಿಕ್ಕಪ್ಪ ಧರ್ಮ್ ಸಿಂಗ್ ಮತ್ತು ಅವರ ಸಹಚರರು ಹೊಂಚು ಹಾಕಿ ದಾಳಿ ನಡೆಸಿದ್ದಾರೆ. ಈ ವೇಳೆ ಹರಿತವಾದ ಆಯುಧದಿಂದ ಯುಕೆ ಸಿಂಗ್ ಅವರ ಮೂಗನ್ನು ಕ್ರೂರವಾಗಿ ಕತ್ತರಿಸಲಾಗಿದ್ದು, ಈ ಘಟನೆ ಇಡೀ ಗ್ರಾಮವನ್ನೇ ಬೆಚ್ಚಿಬೀಳಿಸಿದೆ.

ಈ ಭೀಕರ ದಾಳಿಯಿಂದ ಆಕ್ರೋಶಗೊಂಡ ಯುಕೆ ಸಿಂಗ್ ಅವರ ಕುಟುಂಬಸ್ಥರು ತಕ್ಷಣವೇ ಪ್ರತೀಕಾರಕ್ಕೆ ಇಳಿದಿದ್ದಾರೆ. ಅವರು ಯುವತಿಯ ಚಿಕ್ಕಪ್ಪ ಧರ್ಮ್ ಸಿಂಗ್ ಅವರ ಮನೆಗೆ ನುಗ್ಗಿ ಅವರ ಮೇಲೆ ತೀವ್ರವಾಗಿ ಹಲ್ಲೆ ನಡೆಸಿದ್ದು, ಪರಿಣಾಮವಾಗಿ ಧರ್ಮ್ ಸಿಂಗ್ ಅವರ ಕಾಲು ಮುರಿದು ಹೋಗಿದೆ. ಸದ್ಯ ಇಬ್ಬರೂ ಸಂತ್ರಸ್ತರು ಗಂಭೀರವಾಗಿ ಗಾಯಗೊಂಡಿದ್ದು, ಯುಕೆ ಸಿಂಗ್ ಅವರನ್ನು ಸಂಚೋರ್ ಆಸ್ಪತ್ರೆಗೆ ಹಾಗೂ ಧರ್ಮ್ ಸಿಂಗ್ ಅವರನ್ನು ಹೆಚ್ಚಿನ ಚಿಕಿತ್ಸೆಗಾಗಿ ಜೋಧ್‌ಪುರಕ್ಕೆ ರವಾನಿಸಲಾಗಿದೆ. ಘಟನಾ ಸ್ಥಳಕ್ಕೆ ಗುಡಮಲನಿ ಡಿಎಸ್‌ಪಿ ಮತ್ತು ಹಿರಿಯ ಅಧಿಕಾರಿಗಳು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಈ ಸಂಬಂಧ ಎರಡೂ ಕಡೆಯವರು ನೀಡಿದ ದೂರಿನ ಆಧಾರದ ಮೇಲೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ತಲೆಮರೆಸಿಕೊಂಡಿರುವ ಆರೋಪಿಗಳನ್ನು ಬಂಧಿಸಲು ಪ್ರತ್ಯೇಕ ತಂಡಗಳನ್ನು ರಚಿಸಿದ್ದಾರೆ. ಇತ್ತೀಚೆಗೆ ಮಹಾರಾಷ್ಟ್ರದ ಮದುವೆಯೊಂದರಲ್ಲಿ ವರನ ಮೇಲೆ ನಡೆದ ದಾಳಿಯ ಬೆನ್ನಲ್ಲೇ, ರಾಜಸ್ಥಾನದಲ್ಲಿ ಕುಟುಂಬದವರ ಮೇಲೆಯೇ ಇಂತಹ ಕ್ರೂರ ದಾಳಿ ನಡೆದಿರುವುದು ನಾಗರಿಕ ಸಮಾಜವನ್ನು ಆತಂಕಕ್ಕೀಡು ಮಾಡಿದೆ.