ಆರ್​ಸಿಬಿ ಮಿಸ್ಟರ್ ನಾಗ್ಸ್ ಮನಿ ಸೀಕ್ರೆಟ್: ಹಣದ ಬಗ್ಗೆ ಅಮ್ಮ ಹೇಳಿಕೊಟ್ಟ ಪಾಠ ನೆನೆದ ಡ್ಯಾನಿಶ್ ಸೇಠ್

ನವದೆಹಲಿ: ಕಲಾವಿದರ ಆರ್ಥಿಕ ಬದುಕು ಯಾವಾಗಲೂ ಅನಿಶ್ಚಿತ ಸ್ಥಿತಿಯಲ್ಲೇ ಇರುತ್ತದೆ. ಸಂಬಳದ ಕೆಲಸದಲ್ಲಿರುವವರಿಗೆ ತಿಂಗಳಿಗೆ ಇಂತಿಷ್ಟು ವರಮಾನ ಇರುತ್ತದೆ. ಆದರೆ, ಕಲಾವಿದರಿಗೆ ಹೀಗೇ ಎಂದು ಹೇಳಲು ಆಗುವುದಿಲ್ಲ. ನಟ, ಹಾಸ್ಯ ಕಲಾವಿದ, ಹಾಗೂ ಆರ್​ಸಿಬಿಯ ಮಿಸ್ಟರ್ ನಾಗ್ಸ್ (Mr Nags) ಎಂದೇ ಖ್ಯಾತರಾದ ದಾನಿಶ್ ಸೇಟ್ ಹಣದ ವಿಚಾರ ಬಂದಾಗ ತಮ್ಮ ನಟನೆಯ ಪ್ರತಿಭೆಯಂತೆಯೇ ಸ್ಮಾರ್ಟ್ ಆಗಿರುತ್ತಾರೆ. ಎಕನಾಮಿಕ್ ಟೈಮ್ಸ್​ಗೆ ಇತ್ತೀಚೆಗೆ ನೀಡಿದ ಸಂದರ್ಶನದಲ್ಲಿ ದಾನಿಶ್ ಸೇಟ್ (Danish Sait) ತಮ್ಮ ಹಣಕಾಸು ತಿಳಿವಳಿಕೆ ಬಗ್ಗೆ ಮಾಹಿತಿ ನೀಡಿದ್ದಾರೆ.

ಅಮ್ಮನಿಂದ ಕಲಿತ ಸೇವಿಂಗ್ಸ್ ಪಾಠ
ದಾನಿಶ್ ಸೇಠ್ ಪ್ರಕಾರ ಬಹಳ ಚಿಕ್ಕ ವಯಸ್ಸಿನಿಂದಲೇ ಹಣ ಉಳಿತಾಯ ಮತ್ತು ಹೂಡಿಕೆ ಮಾಡಲು ತೊಡಗಬೇಕು. ಅವರು 19-20ನೇ ವಯಸ್ಸಿನಿಂದಲೇ ಹಣವನ್ನು ಉಳಿಸಲು ಆರಂಭಿಸಿದ್ದರಂತೆ.

ದಾನಿಶ್ ಸೇಠ್ ಅವರಿಗೆ ಈ ಹಣದ ಅರಿವು ಮೂಡಿಸಿದ್ದು ಸ್ವತಃ ಅವರ ತಾಯಿಯೇ. ನಟರು ಮತ್ತು ಸೆಲಬ್ರಿಟಿಗಳ ಬದುಕಿನಲ್ಲಿ ಹಣವೇ ಅತ್ಯಂತ ಮಹತ್ವವಾದ ಅಂಶ ಎಂಬುದು ಆ ತಾಯಿಗೆ ಮನವರಿಕೆಯಾಗಿತ್ತು. ಹೀಗಾಗಿ, ತಮ್ಮ ಮಗನಿಗೆ ಹಣದ ಮಹತ್ವವನ್ನು ಯೌವ್ವನದ ಆರಂಭಿಕ ಹಂತದಲ್ಲೇ ತಿಳಿಸಿಕೊಟ್ಟಿದ್ದರು.

ವೆಚ್ಚ ಮಾಡಲು ಯಾವುದು ಅಗತ್ಯ ಮತ್ತು ಯಾವುದು ಆಸೆ, ಇವುಗಳ ವ್ಯತ್ಯಾಸವನ್ನು ಗುರುತಿಸುವುದು ಹೇಗೆ ಎಂಬುದನ್ನು ದಾನಿಶ್ ಸೇಠ್​ಗೆ ಅವರಿಗೆ ತಾಯಿ ಕಲಿಸಿದ್ದರು. ಅದೇ ಸ್ಫೂರ್ತಿಯಲ್ಲಿ ದಾನಿಶ್ ಸಣ್ಣ ವಯಸ್ಸಿನಲ್ಲೇ ತಿಂಗಳಿಗೆ 3,000 ರೂ ಹೂಡಿಕೆ ಮಾಡಲು ಆರಂಭಿಸಿದ್ದರು.

ಹಣವು ಕಾಂಪೌಂಡಿಂಗ್ ಗುಣ ಪಡೆಯಲು ಬಿಡಬೇಕು…
ಜನರು ದೀರ್ಘಾವಧಿ ಹೂಡಿಕೆ ಮಾಡಬೇಕು ಎಂದು ದಾನಿಶ್ ಸೇಠ್ ಸಲಹೆ ನೀಡುತ್ತಾರೆ. ಮಾರುಕಟ್ಟೆ ಬಿದ್ದಾಗ ಜನರು ಗಾಬರಿಯಾಗಬಾರದು. ಇಂಥ ಸಂದರ್ಭಗಳು ಬರುತ್ತವೆ ಹೋಗುತ್ತವೆ. ಆರ್ಥಿಕ ವ್ಯವಸ್ಥೆಯಲ್ಲಿ ಈ ಏರಿಳಿತ ಸಾಮಾನ್ಯ. ಆದರೆ, ದೇಶ ಹಾಗೂ ನೀವು ಹೂಡಿಕೆ ಮಾಡಿದ ಬ್ಯುಸಿನೆಸ್ ಬಗ್ಗೆ ನಂಬಿಕೆ ಇದ್ದರೆ ಆರಾಮವಾಗಿ ಇದ್ದುಬಿಡಿ. ದೀರ್ಘಾವಧಿಯಲ್ಲಿ ನಿಮ್ಮ ಹೂಡಿಕೆ ನೋಡನೋಡುತ್ತಿದ್ದಂತೆಯೇ ಜಿಗಿದು ಬೆಳೆಯುತ್ತಿರುತ್ತದೆ ಎಂದು ದಾನಿಶ್ ಸೇಠ್ ಹೇಳುತ್ತಾರೆ.

ದಾನಿಶ್ ಸೇಠ್ ಮೂರು ಅತ್ಯುತ್ತಮ ಹಣಕಾಸು ಗುಣವನ್ನು ಅಳವಡಿಸಿಕೊಳ್ಳುವಂತೆ ತಿಳಿಸುತ್ತಾರೆ. ಒಂದು, ಸರಿಯಾದ ಹೂಡಿಕೆ ಆಯ್ಕೆ ಮಾಡಿ. ಎರಡು, ಮಾರುಕಟ್ಟೆಯಿಂದ ನಿರ್ಗಮಿಸಬೇಡಿ. ಮೂರನೆಯದು, ಹಣವು ಬೆಳೆಯುತ್ತಲೇ ಇರಲು ಬಿಡಿ. ಇದು ದಾನಿಶ್ ಅವರು ಯುವಜನರಿಗೆ ಮಾಡುವ ಶಿಫಾರಸು.