ಚಲಿಸುವ ರೈಲಿನಲ್ಲೇ ಮಗುವಿಗೆ ಜನ್ಮ ನೀಡಿದ ಗರ್ಭಿಣಿ; ದೇವದೂತರಂತೆ ಬಂದ ಆರ್‌ಪಿಎಫ್ ಸಿಬ್ಬಂದಿ!

ಚಲಿಸುತ್ತಿದ್ದ ಪುಣೆ-ಸುಪೌಲ್ ಎಕ್ಸ್‌ಪ್ರೆಸ್ ರೈಲಿನಲ್ಲಿ ರೈಲ್ವೆ ಸುರಕ್ಷಾ ಪಡೆ (RPF) ಸಿಬ್ಬಂದಿ ಮತ್ತು ಸಹ ಪ್ರಯಾಣಿಕರ ಸಮಯೋಚಿತ ಸಾಹಸದಿಂದ ಗರ್ಭಿಣಿಯೊಬ್ಬರು ಸುರಕ್ಷಿತವಾಗಿ ಮಗುವಿಗೆ ಜನ್ಮ ನೀಡಿದ್ದಾರೆ. ಶನಿವಾರ ಸಂಜೆ ಪುಣೆಯಿಂದ ಬಿಹಾರದ ಸುಪೌಲ್ ಜಿಲ್ಲೆಗೆ ತೆರಳುತ್ತಿದ್ದ ಈ ರೈಲಿನ ಕಿಕ್ಕಿರಿದು ತುಂಬಿದ್ದ ಜನರಲ್ ಬೋಗಿಯಲ್ಲಿ ಉತ್ತರ ಪ್ರದೇಶದ ರುಖ್ಸಾನಾ ಖಾತುನ್ ಮತ್ತು ಆಕೆಯ ಪತಿ ಜಮೀಲ್ ಬೆಲವಾರ್ ಪ್ರಯಾಣಿಸುತ್ತಿದ್ದರು. ರೈಲು ಅಹಲ್ಯಾನಗರ ನಿಲ್ದಾಣದ ಸಮೀಪಿಸುತ್ತಿದ್ದಂತೆ ರುಖ್ಸಾನಾ ಅವರಿಗೆ ತೀವ್ರ ಹೆರಿಗೆ ನೋವು ಕಾಣಿಸಿಕೊಂಡಿದ್ದು, ರೈಲ್ವೆ ಇಲಾಖೆ ತಕ್ಷಣವೇ ‘ಆಪರೇಷನ್ ಮಾತೃಶಕ್ತಿ’ಯನ್ನು ಸಕ್ರಿಯಗೊಳಿಸಿತು.
ಆರ್‌ಪಿಎಫ್ ಕಾನ್ಸ್‌ಟೇಬಲ್ ಸೋಮನಾಥ್ ಪಾಠಡೆ ಮತ್ತು ಹೆಡ್ ಕಾನ್ಸ್‌ಟೇಬಲ್ ವಿಶ್ವಜೀತ್ ಕಾಕಡೆ ತಕ್ಷಣವೇ ಬೋಗಿಗೆ ಧಾವಿಸಿದರಾದರೂ, ತೀವ್ರ ನೋವಿನ ಕಾರಣ ಮಹಿಳೆಯನ್ನು ಆಸ್ಪತ್ರೆಗೆ ಸ್ಥಳಾಂತರಿಸಲು ಸಾಧ್ಯವಾಗಲಿಲ್ಲ. ಈ ಸಂದರ್ಭದಲ್ಲಿ ರೈಲ್ವೆ ಪೊಲೀಸರು ಮತ್ತು ಬೋಗಿಯಲ್ಲಿದ್ದ ಮಹಿಳಾ ಪ್ರಯಾಣಿಕರು ಸೇರಿ ಸುರಕ್ಷಿತ ಹೆರಿಗೆಗೆ ಬೇಕಾದ ಪೂರಕ ವಾತಾವರಣ ನಿರ್ಮಿಸಿದರು. ಕೆಲವೇ ಕ್ಷಣಗಳಲ್ಲಿ ರುಖ್ಸಾನಾ ಆರೋಗ್ಯವಂತ ಮಗುವಿಗೆ ಜನ್ಮ ನೀಡಿದ್ದು, ಮಗುವಿನ ಅಳುವಿನ ಶಬ್ದ ಆತಂಕದಲ್ಲಿದ್ದ ಪ್ರಯಾಣಿಕರಲ್ಲಿ ಸಂತಸ ತಂದಿತು. ರೈಲು ಅಹಲ್ಯಾನಗರ ನಿಲ್ದಾಣ ತಲುಪುತ್ತಿದ್ದಂತೆ ಮುನ್ನೆಚ್ಚರಿಕೆಯಾಗಿ ಸಿದ್ಧಪಡಿಸಲಾಗಿದ್ದ 108 ಆಂಬ್ಯುಲೆನ್ಸ್ ಮೂಲಕ ತಾಯಿ-ಮಗುವನ್ನು ಸಿವಿಲ್ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಸದ್ಯ ಇಬ್ಬರೂ ಆರೋಗ್ಯವಾಗಿದ್ದಾರೆ ಎಂದು ವೈದ್ಯರು ಖಚಿತಪಡಿಸಿದ್ದಾರೆ.