ಕರಾವಳಿಯ ಭಕ್ತರಿಂದ ಅಯ್ಯಪ್ಪ ಸನ್ನಿಧಾನಕ್ಕೆ ಮಹಾ ಯಾತ್ರೆ: ಧಾರ್ಮಿಕ ಶ್ರದ್ಧೆಗೆ ವ್ಯಾಪಕ ಜನ ಬೆಂಬಲ!

ಮಂಗಳೂರು :ಅಯೋಧ್ಯೆಯ ಶ್ರೀರಾಮ ಜನ್ಮಭೂಮಿಯಿಂದ ಕೇರಳದ ಪುಣ್ಯಕ್ಷೇತ್ರ ಶಬರಿಮಲೆ ಅಯ್ಯಪ್ಪ ಸ್ವಾಮಿ ಸನ್ನಿಧಾನದವರೆಗೆ ಸುಮಾರು 2,600 ಕಿಲೋಮೀಟರ್ ದೂರದ ಪಾದಯಾತ್ರೆಯನ್ನು ಕರ್ನಾಟಕದ ಮೂವರು ಅಯ್ಯಪ್ಪ ಭಕ್ತರು ಆರಂಭಿಸಿದ್ದಾರೆ.

ಮಂಗಳೂರಿನ ಕಿರಣ್ ಮತ್ತು ಸುಳ್ಯಪದವಿನ ರಜತ್ ಹಾಗೂ ವಿಜಿತ್ ಎಂಬ ಈ ಯುವಕರು ಧಾರ್ಮಿಕ ಶ್ರದ್ಧೆಯ ಸಂಕಲ್ಪದೊಂದಿಗೆ ಈ ‘ಪುಣ್ಯ ಕ್ಷೇತ್ರ ಯಾತ್ರೆ’ಯನ್ನು 13.10.2025 ರಂದು ಪ್ರಾರಂಭಿಸಿದ್ದಾರೆ. ಅಂದಾಜು 3 ತಿಂಗಳುಗಳ ಕಾಲ ನಡೆಯುವ ಈ ಪಾದಯಾತ್ರೆಯು 14.01.2026 ರಂದು ಮುಕ್ತಾಯಗೊಳ್ಳುವ ನಿರೀಕ್ಷೆ ಇದೆ. ಈ ಅವಧಿಯು ಶಬರಿಮಲೆಯ ಪವಿತ್ರ ಮಕರವಿಳಕ್ಕು ಮತ್ತು ಮಂಡಲ ಪೂಜೆಗಳ ಸಂದರ್ಭದಲ್ಲಿ ಅಯ್ಯಪ್ಪನ ದರ್ಶನ ಪಡೆಯಲು ಅನುಕೂಲವಾಗುವಂತೆ ಯೋಜಿಸಲಾಗಿದೆ. ಉತ್ತರ ಪ್ರದೇಶದಿಂದ ಆರಂಭವಾಗಿ ಮಧ್ಯಪ್ರದೇಶ, ಮಹಾರಾಷ್ಟ್ರ, ಕರ್ನಾಟಕದ ಮೂಲಕ ಸಾಗುವ ಈ ಯಾತ್ರೆಯು ಹಿಂದೂ ಧಾರ್ಮಿಕ ಕೇಂದ್ರಗಳ ನಡುವಿನ ಅಚಲ ನಂಬಿಕೆ ಮತ್ತು ಸೌಹಾರ್ದತೆಯ ಸಂದೇಶವನ್ನು ಸಾರುತ್ತಿದೆ. ಈ ಭಕ್ತರ ಮಹಾಸಂಕಲ್ಪಕ್ಕೆ ಅನೇಕ ರಾಜ್ಯಗಳಿಂದ ಬೆಂಬಲ ವ್ಯಕ್ತವಾಗುತ್ತಿದೆ.