ಅಮೆರಿಕ ಸೆನೆಟರ್ ಪ್ರಶ್ನೆಗೆ ವೈದ್ಯೆ ನಿಶಾ ವರ್ಮಾ ಗರಂ!

ವಾಷಿಂಗ್ಟನ್‌ ಡಿಸಿ: ಅಮೆರಿಕದ ಸೆನೆಟ್ ಸಮಿತಿಯಲ್ಲಿ ನಡೆದ ಘಟನೆಯೊಂದು ಸದ್ಯ ಸೋಶಿಯಲ್‌ ಮೀಡಿಯಾದಲ್ಲಿ ಭಾರಿ ಚರ್ಚೆಯನ್ನುಟ್ಟು ಹಾಕಿದೆ. ಪುರುಷರು ಗರ್ಭಧರಿಸಲು ಸಾಧ್ಯವೇ ಎಂಬುದಾಗಿ ಬಹಿರಂಗವಾಗಿ ಕೇಳಿ ಬಂದ ಪ್ರಶ್ನೆಗೆ ಹೌದು ಅಥವಾ ಇಲ್ಲ ಎನ್ನದ ಭಾರತೀಯ ಮೂಲದ ಪ್ರಸೂತಿ ಮತ್ತು ಸ್ತ್ರೀರೋಗ ತಜ್ಞೆಯೊಬ್ಬರು ಸದ್ಯ ಚರ್ಚೆಯಲ್ಲಿದ್ದಾರೆ.

ರಾಸಾಯನಿಕ ಗರ್ಭಪಾತದ ಔಷಧಿಗಳ ಅಪಾಯಗಳನ್ನು ಬಯಲಿಗೆಳೆಯುವುದು ಎಂಬ ವಿಷಯದ ಕುರಿತಾದ ಸೆನೆಟ್ ಆರೋಗ್ಯ, ಶಿಕ್ಷಣ, ಕಾರ್ಮಿಕ ಮತ್ತು ಪಿಂಚಣಿ ಸಮಿತಿಯ ವಿಚಾರಣೆ ಸಂದರ್ಭದಲ್ಲಿ ಈ ಘಟನೆ ನಡೆದಿದೆ. ಡಾ. ನಿಶಾ ವರ್ಮಾ ಅವರು ಡೆಮೋಕ್ರಾಟ್ ಸಾಕ್ಷಿಯಾಗಿ ಈ ವಿಚಾರಣೆಯಲ್ಲಿ ಭಾಗವಹಿಸಿದ್ದರು.

ಗರ್ಭಪಾತ ಔಷಧಿ ಬಗ್ಗೆ ಸಮರ್ಥನೆ

ನಿಶಾ ವರ್ಮಾ ಅವರು ಅಮೆರಿಕದ ಸೆನೆಟ್‌ ವಿಚಾರಣೆಯಲ್ಲಿ ಭಾಗಿಯಾಗಿ, ವೈದ್ಯಕೀಯ ಗರ್ಭಪಾತದ ಸುರಕ್ಷತೆಗೆ ಬಗ್ಗೆ ಮಾತನಾಡಿದರು. ಗರ್ಭಪಾತದ ಔಷಧಿಯು 100 ಕ್ಕೂ ಹೆಚ್ಚು ಉನ್ನತ ಗುಣಮಟ್ಟದ ಅಧ್ಯಯನಗಳಿಂದ ಸುರಕ್ಷಿತ ಎಂದು ಸಾಬೀತಾಗಿದೆ. 2000ನೇ ಇಸವಿಯಿಂದ ಅಮೆರಿಕದಲ್ಲಿ 7.5 ಮಿಲಿಯನ್ ಜನರು ಇದನ್ನು ಬಳಸಿದ್ದಾರೆ ಎಂದು ಡಾ. ನಿಶಾವರ್ಮಾ ಸಮರ್ಥಿಸಿ ಕೊಂಡರು.

ಈ ಮಧ್ಯೆ ರಿಪಬ್ಲಿಕನ್ ಸೆನೆಟರ್ ಜೋಶ್ ಹಾಲೆ ಅವರು ಮಾತನಾಡಿ, ಪುರುಷರು ಗರ್ಭ ಧರಿಸಲು ಸಾಧ್ಯವೇ? ಎಂದು ಕೇಳಿದಾಗ. ಇದಕ್ಕೆ ಉತ್ತರಿಸಲು ಹಿಂಜರಿದ ಡಾ. ನಿಶಾ ವರ್ಮಾ, ನಾನು ಮಹಿಳೆಯರು ಎಂದು ಗುರುತಿಸಿಕೊಳ್ಳದ ಜನರಿಗೂ ಚಿಕಿತ್ಸೆ ನೀಡುತ್ತೇನೆ ಎಂದರು. ಹಾಲೆ ಅವರು ಪದೇ ಪದೇ ನೇರ ಉತ್ತರಕ್ಕಾಗಿ ಒತ್ತಾಯಿಸಿದಾಗ, ಡಾ. ವರ್ಮಾ ಅದನ್ನು ರಾಜಕೀಯ ಪ್ರೇರಿತ ಪ್ರಶ್ನೆ ಎಂದರು. ಆದರೆ, ಕೊನೆಗೂ ಅವರು ಹಾಲೆ ಅವರ ಪ್ರಶ್ನೆಗೆ ಯಾವ ವಿಧಾನದಲ್ಲಿಯೂ ಉತ್ತರ ಕೊಡಲೇ ಇಲ್ಲ.
ಯಾರು ಈ ಡಾ. ನಿಶಾ ವರ್ಮಾ?

ಡಾ. ನಿಶಾ ವರ್ಮಾ ಅವರು ಭಾರತೀಯ ಮೂಲದ ವಲಸೆ ದಂಪತಿಗಳ ಪುತ್ರಿ. ಈಕೆ ಉತ್ತರ ಕೆರೊಲಿನಾದ ಗ್ರೀನ್ಸ್‌ಬೊರೊದಲ್ಲಿ ಜನಿಸಿದರು. ಇವರು ಪ್ರಸೂತಿ ಮತ್ತು ಸ್ತ್ರೀರೋಗ ಶಾಸ್ತ್ರದಲ್ಲಿ ಮಂಡಳಿ-ಪ್ರಮಾಣೀಕೃತ ವೈದ್ಯರಾಗಿದ್ದಾರೆ . ‘ಕಾಂಪ್ಲೆಕ್ಸ್ ಫ್ಯಾಮಿಲಿ ಪ್ಲಾನಿಂಗ್’ನಲ್ಲಿಯೂ ಪರಿಣತಿ ಹೊಂದಿದ್ದಾರೆ.

ಉತ್ತರ ಕೆರೊಲಿನಾ ವಿಶ್ವವಿದ್ಯಾಲಯದಿಂದ ಜೀವಶಾಸ್ತ್ರ ಮತ್ತು ಮಾನವಶಾಸ್ತ್ರದಲ್ಲಿ ಪದವಿ ಹಾಗೂ ವೈದ್ಯಕೀಯ ಪದವಿ ಪಡೆದಿದ್ದಾರೆ. ಎಮೋರಿ ವಿಶ್ವವಿದ್ಯಾಲಯದಿಂದ ಸಾರ್ವಜನಿಕ ಆರೋಗ್ಯದಲ್ಲಿ ಸ್ನಾತಕೋತ್ತರ ಪದವಿ ಪಡೆದಿರುವ ನಿಶಾ ಅವರು ಬೆತ್ ಇಸ್ರೇಲ್ ಡೀಕೋನೆಸ್ ಮೆಡಿಕಲ್ ಸೆಂಟರ್‌ನಲ್ಲಿ ತರಬೇತಿ ಪಡೆದುಕೊಂಡಿದ್ದಾರೆ. ಸದ್ಯ ಅವರು ಅಮೆರಿಕನ್ ಕಾಲೇಜ್ ಆಫ್ ಅಬ್ಸ್ಟೆಟ್ರಿಶಿಯನ್ಸ್ ಅಂಡ್ ಗೈನೆಕಾಲಜಿಸ್ಟ್ಸ್ ನಲ್ಲಿ ಸಂತಾನೋತ್ಪತ್ತಿ ಆರೋಗ್ಯ ನೀತಿ ಮತ್ತು ಅಡ್ವೊಕಸಿಯ ಹಿರಿಯ ಸಲಹೆಗಾರರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಇವರು ಎಮೋರಿ ವಿಶ್ವವಿದ್ಯಾಲಯದ ವೈದ್ಯಕೀಯ ಶಾಲೆಯಲ್ಲಿ ಅಡ್ಜಂಕ್ಟ್ ಅಸಿಸ್ಟೆಂಟ್ ಪ್ರೊಫೆಸರ್ ಆಗಿಯೂ ಕಾರ್ಯನಿರ್ವಹಿಸುತ್ತಿದ್ದಾರೆ ಎನ್ನಲಾಗಿದೆ.

ಜಾರ್ಜಿಯಾ ಮತ್ತು ಮೇರಿಲ್ಯಾಂಡ್ ರಾಜ್ಯಗಳಲ್ಲಿ ಆರೋಗ್ಯ ಸೇವೆಯಲ್ಲಿ ತೊಡಗಿಸಿಕೊಂಡಿದ್ದಾರೆ ನಿಶಾ ವರ್ಮಾ. ಜಾರ್ಜಿಯಾದ ಆರು ವಾರಗಳ ಗರ್ಭಪಾತ ನಿಷೇಧವು ಹೆಚ್ಚಿನ ಅಪಾಯವಿರುವ ಗರ್ಭಧಾರಣೆಗಳ ಮೇಲೆ ಬೀರುವ ಪರಿಣಾಮಗಳ ಬಗ್ಗೆಯೂ ವರ್ಮಾ ಅವರು ಸಂಶೋಧನೆ ನಡೆಸುತ್ತಿದ್ದಾರೆ.