ಅರಬ್ ರಾಷ್ಟ್ರಗಳಲ್ಲಿ ಐದು ದಶಕಗಳ ‘ಆಧುನಿಕ ಗುಲಾಮಗಿರಿ’ಗೆ ತೆರೆ: ಸೌದಿ ಅರೇಬಿಯಾದಿಂದ ‘ಕಫಾಲಾ’ ಪ್ರಾಯೋಜಕತ್ವ ವ್ಯವಸ್ಥೆ ಅಧಿಕೃತವಾಗಿ ರದ್ದು!

ರಿಯಾದ್: ಅರಬ್ ರಾಷ್ಟ್ರಗಳಲ್ಲಿ ವಲಸೆ ಕಾರ್ಮಿಕರಿಗೆ ನರಕವಾಗಿದ್ದ “ಕಫಾಲ” ಎಂಬ ಪ್ರಾಯೋಜಕತ್ವ ಆಧಾರಿತ ಕಾರ್ಮಿಕ ವ್ಯವಸ್ಥೆಗೆ ಸೌದಿ ಅರೇಬಿಯಾ ಅಧಿಕೃತವಾಗಿ ತೆರೆ ಎಳೆದಿದೆ. ಸುಮಾರು ಐವತ್ತು ವರ್ಷಗಳಿಂದ ಜಾರಿಯಲ್ಲಿದ್ದ ಈ ಕಠಿಣ ನಿಯಮಗಳು ಇದೀಗ ಇತಿಹಾಸದ ಪುಟಗಳಲ್ಲಿ ಮಾಯವಾಗಿವೆ. 2025ರ ಜೂನ್‌ನಲ್ಲಿ ಈ ವ್ಯವಸ್ಥೆಯನ್ನು ನಿಲ್ಲಿಸುವ ನಿರ್ಧಾರ ಕೈಗೊಳ್ಳಲಾಗಿದ್ದು, ಇದೀಗ ಅದನ್ನು ಅಧಿಕೃತವಾಗಿ ಜಾರಿಗೆ ತರಲಾಗಿದೆ. ಈ ಮಹತ್ವದ ಹೆಜ್ಜೆಯಿಂದ ಸೌದಿಯಲ್ಲಿ ವಾಸಿಸುತ್ತಿರುವ 1.34 ಕೋಟಿ ವಲಸೆ ಕಾರ್ಮಿಕರ ಬದುಕಿಗೆ ಹೊಸ ಬೆಳಕು ಮೂಡಲಿದೆ. ವಿಶೇಷವಾಗಿ ಭಾರತ, ಬಾಂಗ್ಲಾದೇಶ, ಪಾಕಿಸ್ತಾನ, ನೇಪಾಳ ಮುಂತಾದ ದಕ್ಷಿಣ ಏಷ್ಯಾದ ದೇಶಗಳಿಂದ ಬಂದ ಕಾರ್ಮಿಕರು ಇದರ ಪ್ರಯೋಜನವನ್ನು ಅನುಭವಿಸಲಿದ್ದಾರೆ.

ಕಫಾಲ ಅಂದರೆ “ಪ್ರಾಯೋಜಕತ್ವ” ಎಂಬ ಅರ್ಥ. ವಿದೇಶಿ ಕಾರ್ಮಿಕರು ಸೌದಿಯಲ್ಲಿ ಕೆಲಸ ಮಾಡಲು ಸ್ಥಳೀಯ ಪ್ರಾಯೋಜಕನನ್ನು ಹೊಂದಿರಬೇಕಾಗಿತ್ತು. ಈ ಪ್ರಾಯೋಜಕರು ಕಾರ್ಮಿಕರ ವೀಸಾ, ವಾಸಸ್ಥಾನ ಮತ್ತು ಪಾಸ್‌ಪೋರ್ಟ್‌ನ ಮೇಲಿನ ಸಂಪೂರ್ಣ ನಿಯಂತ್ರಣವನ್ನು ಹೊಂದಿದ್ದರು. ಇದರ ಪರಿಣಾಮವಾಗಿ ಕಾರ್ಮಿಕರು ತಮ್ಮ ಉದ್ಯೋಗದಾತನ ಅನುಮತಿ ಇಲ್ಲದೆ ಕೆಲಸ ಬದಲಾಯಿಸಲು, ದೇಶ ತೊರೆಯಲು ಅಥವಾ ತಮ್ಮ ಹಕ್ಕುಗಳನ್ನು ಉಪಯೋಗಿಸಲು ಸಾಧ್ಯವಾಗುತ್ತಿರಲಿಲ್ಲ. ಬಹಳಷ್ಟು ಕಾರ್ಮಿಕರು ಈ ವ್ಯವಸ್ಥೆಯ ಒಳಗೆ ಸಿಕ್ಕಿ ಜೀತದಾಳುಗಳಾಗಿ ಬದುಕಬೇಕಾಗಿತ್ತು.ಈಗ ಹೊಸ ಕಾರ್ಮಿಕ ನೀತಿಯಲ್ಲಿ ಸೌದಿ ಸರ್ಕಾರವು ಗುತ್ತಿಗೆ ಆಧಾರಿತ ಉದ್ಯೋಗ ವ್ಯವಸ್ಥೆಯನ್ನು ಜಾರಿಗೆ ತಂದಿದೆ. ಈ ವ್ಯವಸ್ಥೆಯಲ್ಲಿ ಕಾರ್ಮಿಕರು ತಮ್ಮ ಕೆಲಸದ ಕುರಿತು ಹೆಚ್ಚು ಸ್ವಾತಂತ್ರ್ಯ ಮತ್ತು ನಿಯಂತ್ರಣ ಹೊಂದುತ್ತಾರೆ. ಅವರು ತಮ್ಮ ಹಾಲಿ ಉದ್ಯೋಗದಾತರ ಪೂರ್ವಾನುಮತಿ ಇಲ್ಲದೆ ಕೆಲಸ ಬದಲಾಯಿಸಲು ಸಾಧ್ಯವಾಗುತ್ತದೆ. ಅಲ್ಲದೆ, ಪ್ರಾಯೋಜಕರ ಅನುಮತಿ ಅಥವಾ ಎಕ್ಸಿಟ್ ವೀಸಾ ಇಲ್ಲದೇ ದೇಶ ತೊರೆಯಲು ಅವಕಾಶ ನೀಡಲಾಗಿದೆ. ಇದರ ಪರಿಣಾಮವಾಗಿ ವಲಸೆ ಕಾರ್ಮಿಕರ ಜೀವನದಲ್ಲಿ ಬಹುಮುಖ್ಯ ಬದಲಾವಣೆ ಸಂಭವಿಸುವ ನಿರೀಕ್ಷೆಯಿದೆ.ಸೌದಿ ಅರೇಬಿಯಾ ಸರ್ಕಾರದ ಈ ನಿರ್ಧಾರವು ಕಾರ್ಮಿಕರ ಹಕ್ಕುಗಳನ್ನು ರಕ್ಷಿಸಲು ಮತ್ತು ವಿಶ್ವ ವೇದಿಕೆಯಲ್ಲಿ ಸೌದಿಯ ಬದಲಾಗುತ್ತಿರುವ ಮಾನವೀಯ ಮುಖವನ್ನೂ ತೋರಿಸಲು ಒಂದು ಮಹತ್ವದ ಹೆಜ್ಜೆಯಾಗಿದೆ. ಐದು ದಶಕಗಳಿಂದ ಕಾಡುತ್ತಿದ್ದ ಆಧುನಿಕ ಗುಲಾಮಗಿರಿಯಂತಹ ವ್ಯವಸ್ಥೆ ಇದೀಗ ಕೊನೆಗೊಂಡಿದ್ದು, ಲಕ್ಷಾಂತರ ಕಾರ್ಮಿಕರ ಬದುಕಿಗೆ ಹೊಸ ನಿರಾಳತೆಯ ಕಿರಣ ತಂದುಕೊಟ್ಟಿದೆ.