ಅಮೆರಿಕ: ಟ್ರಂಪ್ ಆಡಳಿತದ ಬಿಗ್ ಆಪರೇಷನ್; ಭಾರತೀಯ ಮೂಲದ ಉದ್ಯಮಿ ಸೇರಿ 17 ಮಂದಿಯ ಪೌರತ್ವ ರದ್ದು!

ವಾಷಿಂಗ್ಟನ್: ವೀಸಾ ಹಗರಣದ ತನಿಖೆಯಲ್ಲಿ ಸಿಕ್ಕಿಬಿದ್ದಿರುವ ನ್ಯೂಜೆರ್ಸಿಯ ಉದ್ಯಮಿ ಹಾಗೂ ಭಾರತೀಯ ಮೂಲದ CEO ನೀರಜ್ ಶರ್ಮಾ ಅವರ ಅಮೆರಿಕದ ಪೌರತ್ವವನ್ನು ರದ್ದುಗೊಳಿಸಲು ಅಮೆರಿಕದ ನ್ಯಾಯಾಂಗ ಇಲಾಖೆ ಮುಂದಾಗಿದೆ.
ಅಮೆರಿಕದ ಇತಿಹಾಸದಲ್ಲೇ ಅತಿದೊಡ್ಡ ಪೌರತ್ವ ತಪಾಸಣಾ ಅಭಿಯಾನಗಳಲ್ಲಿ ಒಂದೆಂದು ಟ್ರಂಪ್ ಆಡಳಿತ ಹೇಳಿಕೊಂಡಿರುವ ಕ್ರಮದ ಭಾಗವಾಗಿ, ಅಮೆರಿಕದ ಪೌರತ್ವ ಕಳೆದುಕೊಳ್ಳಲಿರುವ 17 ಮಂದಿಯ ಪೈಕಿ ಶರ್ಮಾ ಕೂಡ ಸೇರಿದ್ದಾರೆ.
ಈ ತಪಾಸಣಾ ಅಭಿಯಾನವು ವಿದೇಶಗಳಲ್ಲಿ ಜನಿಸಿ ಬಳಿಕ ಅಮೆರಿಕದ ಪೌರತ್ವ ಪಡೆದವರನ್ನು ಗುರಿಯಾಗಿಸಿಕೊಂಡಿದೆ.
ವಂಚನೆ, ಮಾಹಿತಿಯನ್ನು ಮರೆಮಾಚುವಿಕೆ ಅಥವಾ ತಪ್ಪು ಮಾಹಿತಿ ನೀಡಿ ಪೌರತ್ವ ಪಡೆದಿರುವ ವಿದೇಶಿ ಮೂಲದ ಅಮೆರಿಕನ್ನರ ಜೊತೆಗೆ ಲೈಂಗಿಕ ಅಪರಾಧಗಳಿಗೆ ಶಿಕ್ಷೆಗೆ ಒಳಗಾದವರ ವಿರುದ್ಧವೂ ಕ್ರಮ ಕೈಗೊಳ್ಳಲಾಗುತ್ತಿದೆ.ಸೋಮವಾರ ಅಮೆರಿಕದ ನ್ಯಾಯಾಂಗ ಇಲಾಖೆ ನೀಡಿದ ಮಾಹಿತಿಯ ಪ್ರಕಾರ, 17 ಮಂದಿಯ ವಿರುದ್ಧ ಪೌರತ್ವ ರದ್ದತಿ ಕ್ರಮ ಆರಂಭಿಸಲಾಗಿದೆ. ಈ ಪಟ್ಟಿಯಲ್ಲಿ ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯ ಮಾದಕವಸ್ತು ಕಳ್ಳಸಾಗಣೆ ಹಾಗೂ ವಲಸೆ ವಂಚನೆ ಪ್ರಕರಣಗಳಲ್ಲಿ ಭಾಗಿಯಾಗಿರುವವರೂ ಸೇರಿದ್ದಾರೆ.
50 ವರ್ಷದ ನೀರಜ್ ಶರ್ಮಾ ಅವರು ನ್ಯೂಜೆರ್ಸಿ ಮೂಲದ ಸಿಬ್ಬಂದಿ ನೇಮಕಾತಿ ಸಂಸ್ಥೆ ಮ್ಯಾಗ್ನವಿಷನ್ LLCಯ ಮಾಲೀಕ ಹಾಗೂ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (CEO) ಆಗಿ ಕಾರ್ಯನಿರ್ವಹಿಸಿದ್ದರು. ನ್ಯಾಯಾಂಗ ಇಲಾಖೆಯ ಪ್ರಕಾರ, ಹನ್ನೊಂದು H-1B ವೀಸಾ ಅರ್ಜಿಗಳನ್ನು ವಂಚನೆಯ ಉದ್ದೇಶದಿಂದ ಸಿದ್ಧಪಡಿಸಿ ಸಲ್ಲಿಸಲಾಗಿತ್ತು. ಅವುಗಳಿಗೆ ಶರ್ಮಾ ಸಹಿ ಹಾಕಿದ್ದರು.

H-1B ವೀಸಾ ಅರ್ಜಿಗಳಲ್ಲಿ ವಿದೇಶಿ ಕಾರ್ಮಿಕರಿಗೆ ಪ್ರಮುಖ ಜಾಗತಿಕ ಹಣಕಾಸು ಸಂಸ್ಥೆಯೊಂದರಲ್ಲಿ ಉದ್ಯೋಗ ನೀಡಲಾಗುವುದು ಎಂದು ಸುಳ್ಳು ಮಾಹಿತಿ ನೀಡಲಾಗಿತ್ತು. ಜೊತೆಗೆ, ನಕಲಿ ಅಧಿಕಾರಿಗಳ ಸಹಿಗಳು ಮತ್ತು ನಕಲಿ ಬೆಂಬಲ ದಾಖಲೆಗಳನ್ನು ಅರ್ಜಿಗಳೊಂದಿಗೆ ಸಲ್ಲಿಸಲಾಗಿತ್ತು ಎಂದು ನ್ಯಾಯಾಂಗ ಇಲಾಖೆ ಆರೋಪಿಸಿದೆ.
ಶರ್ಮಾ ಅವರು 2017ರಲ್ಲಿ ಅಮೆರಿಕದ ಪೌರತ್ವ ಪಡೆದಿದ್ದರು. ಪೌರತ್ವಕ್ಕಾಗಿ ಅರ್ಜಿ ಸಲ್ಲಿಸುವ ಸಂದರ್ಭದಲ್ಲಿ, ವಲಸೆ ಸೌಲಭ್ಯ ಪಡೆಯಲು ತಾವು ಸುಳ್ಳು ಹೇಳಿಲ್ಲ, ಅಧಿಕಾರಿಗಳಿಗೆ ತಪ್ಪು ಮಾಹಿತಿ ನೀಡಿಲ್ಲ ಹಾಗೂ ಯಾವುದೇ ನಿಯಮ ಉಲ್ಲಂಘಿಸಿಲ್ಲ ಎಂದು ಘೋಷಿಸಿದ್ದರು. ಆದರೆ ಈ ಹೇಳಿಕೆಗಳು ಸುಳ್ಳಾಗಿದ್ದವು ಎಂದು ನ್ಯಾಯಾಂಗ ಇಲಾಖೆ ಆರೋಪಿಸಿದೆ.

ನಂತರ ಅವರನ್ನು ವೀಸಾ ಹಗರಣ ಪ್ರಕರಣದಲ್ಲಿ ದೋಷಿ ಎಂದು ಘೋಷಿಸಲಾಗಿದೆ. ಈ ಹಿನ್ನೆಲೆಯಲ್ಲಿ, ತಮ್ಮ ಅಪರಾಧಗಳನ್ನು ಮರೆಮಾಚಿ ಹಾಗೂ ತಪ್ಪು ಮಾಹಿತಿ ನೀಡಿ ಪೌರತ್ವ ಪಡೆದಿದ್ದಾರೆ ಎಂಬ ಆರೋಪದಡಿ ಅವರ ಅಮೆರಿಕದ ಪೌರತ್ವವನ್ನು ರದ್ದುಗೊಳಿಸಲು ಇಲಾಖೆ ಮುಂದಾಗಿದೆ.
ಶರ್ಮಾ ಅವರ ಜೊತೆಗೆ ಮಕ್ಕಳ ಮೇಲಿನ ಲೈಂಗಿಕ ಅಪರಾಧ ಸೇರಿದಂತೆ ಹಿಂಸಾತ್ಮಕ ಅಥವಾ ಗಂಭೀರ ಅಪರಾಧಗಳಿಗೆ ಶಿಕ್ಷೆಗೆ ಒಳಗಾದ ಇನ್ನೂ 16 ಮಂದಿಯ ಪೌರತ್ವವನ್ನೂ ರದ್ದುಗೊಳಿಸಲು ನ್ಯಾಯಾಂಗ ಇಲಾಖೆ ಪ್ರಯತ್ನಿಸುತ್ತಿದೆ.
ಅಮೆರಿಕದ ಪೌರತ್ವ ಕಳೆದುಕೊಳ್ಳಲಿರುವವರ ಪಟ್ಟಿಯಲ್ಲಿ ತನ್ನ ಮಗಳ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ ಹೈಟಿ ಮೂಲದ ವಲಸಿಗ, 15 ವರ್ಷದೊಳಗಿನ ಮಗುವಿನ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ ಯುಗೋಸ್ಲಾವಿಯ ಮೂಲದ ವ್ಯಕ್ತಿ, ಅಪ್ರಾಪ್ತ ವಯಸ್ಕರ ಲೈಂಗಿಕ ಚಿತ್ರಗಳನ್ನು ಪಡೆದ ಆರೋಪ ಹೊತ್ತಿರುವ ಮೆಕ್ಸಿಕೊ ಮೂಲದ ವಲಸಿಗ, ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯ ಪ್ರಕರಣದ ಆರೋಪಿ ಕೊಲಂಬಿಯಾ ಮೂಲದ ಮಾಜಿ ಕ್ಯಾಥೋಲಿಕ್ ಪಾದ್ರಿ, ಫಿಲಿಪಿನೋ ಮೂಲದ ಲೈಂಗಿಕ ಅಪರಾಧಿ, ಕೊಲಂಬಿಯಾದ ಮಾದಕವಸ್ತು ಕಳ್ಳಸಾಗಣೆದಾರರ ಮಗಳು, ಜಮೈಕಾದ ಸೈಬರ್ ವಂಚಕ ಹಾಗೂ ಕ್ಯೂಬಾ ಮೂಲದ ಕ್ಯಾಸಿನೊ ವಂಚಕರೂ ಸೇರಿದ್ದಾರೆ.