ಸಾಧನೆಗೆ ವಯಸ್ಸಿನ ಹಂಗಿಲ್ಲ: 15ರ ಹರೆಯದ ಎಐ ಉದ್ಯಮಿಯಿಂದ 38ರ ಹರೆಯದ ವ್ಯಕ್ತಿಯ ನೇಮಕ!

ಹೊಸದಿಲ್ಲಿ: ಸಾಧನೆಗೆ ವಯಸ್ಸಿನ ಅಡ್ಡಿಯಿಲ್ಲ ಎಂಬ ಮಾತನ್ನು ಸಾಬೀತುಪಡಿಸುವ ಘಟನೆಯೊಂದು ನಡೆದಿದೆ. 15 ವರ್ಷದ ಥಾಮಸ್ ಗುತ್ರಿ ಕೃತಕ ಬುದ್ಧಿಮತ್ತೆ (ಎಐ) ಕ್ಷೇತ್ರದಲ್ಲಿ ‘ರನ್ ವೈಸ್ ಎಂಬ ಸಂಸ್ಥೆಯನ್ನು ಸ್ಥಾಪಿಸಿ ಗಮನ ಸೆಳೆದಿದ್ದಾನೆ. ಈತ ತನ್ನ ಸಂಸ್ಥೆಗೆ 38 ವರ್ಷದ ವ್ಯಕ್ತಿಯೊಬ್ಬರನ್ನು ಮೊದಲ ಉದ್ಯೋಗಿಯಾಗಿ ನೇಮಕ ಮಾಡಿಕೊಂಡಿರುವುದು ವಿಶೇಷವಾಗಿದೆ.
ಈ ವಿಚಾರ ಸಾಮಾಜಿಕ ಮಾಧ್ಯಮದ ಪೋಸ್ಟ್ ಮೂಲಕ ಬೆಳಕಿಗೆ ಬಂದಿದೆ. “ನಾನು ಈಗಷ್ಟೇ ನನ್ನ ಮೊದಲ ಉದ್ಯೋಗಿಯನ್ನು ನೇಮಕ ಮಾಡಿಕೊಂಡೆ. ಅವರಿಗೆ 38 ವರ್ಷ, ನನಗೆ 15 ವರ್ಷ” ಎಂದು ಥಾಮಸ್ ಗುತ್ರಿ ಬರೆದುಕೊಂಡಿದ್ದಾನೆ. ಜೊತೆಗೆ, “ಅಂತರ್ಜಾಲವು ಸಾಂಪ್ರದಾಯಿಕ ವೃತ್ತಿಪರ ಏಣಿಯನ್ನು ಮುರಿದಿದೆ” ಎಂಬ ಅಭಿಪ್ರಾಯವನ್ನೂ ವ್ಯಕ್ತಪಡಿಸಿದ್ದಾನೆ.
ಮಾಲಕ ಮತ್ತು ಉದ್ಯೋಗಿಯ ನಡುವಿನ ವಯಸ್ಸಿನ ದೊಡ್ಡ ಅಂತರವೇ ಈ ಘಟನೆಗೆ ಹೆಚ್ಚು ಗಮನ ಸೆಳೆಯುವಂತೆ ಮಾಡಿದೆ. ಡಿಜಿಟಲ್ ಯುಗದಲ್ಲಿ ವಯಸ್ಸಿಗಿಂತ ಸಾಮರ್ಥ್ಯ, ಕೌಶಲ್ಯ ಹಾಗೂ ಉತ್ಪಾದಕತೆಯೇ ಪ್ರಮುಖ ಎಂಬುದನ್ನು ಈ ಬೆಳವಣಿಗೆ ತೋರಿಸಿದೆ.
ಹಿರಿತನ, ಅನುಭವ ಹಾಗೂ ಸಾಂಪ್ರದಾಯಿಕ ಅಧಿಕಾರದ ಆಧಾರದ ಮೇಲೆ ರೂಪುಗೊಂಡಿದ್ದ ವೃತ್ತಿಪರ ವ್ಯವಸ್ಥೆಯಲ್ಲಿ ಬದಲಾವಣೆಗಳು ನಡೆಯುತ್ತಿರುವ ಲಕ್ಷಣಗಳು ಇದರಿಂದ ಗೋಚರಿಸುತ್ತಿವೆ. ಸಾಂಪ್ರದಾಯಿಕ, ರೇಖಾತ್ಮಕ ವೃತ್ತಿಪರ ಪ್ರಗತಿ ಮಾದರಿ ನಿಧಾನವಾಗಿ ಅಸ್ತಮಿಸುತ್ತಿದೆ ಎಂಬ ಅಭಿಪ್ರಾಯವೂ ವ್ಯಕ್ತವಾಗಿದೆ.
ಈ ವಿಷಯಕ್ಕೆ ಸಾಮಾಜಿಕ ಮಾಧ್ಯಮಗಳಲ್ಲಿ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಕೆಲವರು ಯುವ ಉದ್ಯಮಿಯ ಸಾಧನೆಯನ್ನು ಮೆಚ್ಚಿ ಬೆಂಬಲ ಸೂಚಿಸಿದ್ದರೆ, ಇನ್ನೂ ಕೆಲವರು ಅಚ್ಚರಿ ವ್ಯಕ್ತಪಡಿಸಿದ್ದಾರೆ. ವಯಸ್ಸಿಗಿಂತ ಸಾಮರ್ಥ್ಯ ಮತ್ತು ಉತ್ಪಾದಕತೆಯೇ ಮುಖ್ಯ ಎಂಬ ಅಭಿಪ್ರಾಯವನ್ನು ಹಲವರು ವ್ಯಕ್ತಪಡಿಸಿದ್ದಾರೆ.
“ವಯಸ್ಸು ಕೇವಲ ಅನುಭವದ ಛಾಯೆ ಮಾತ್ರ; ಅಂತರ್ಜಾಲವು ಅದನ್ನು ಅಪ್ರಸ್ತುತಗೊಳಿಸಿದೆ” ಎಂದು ಬಳಕೆದಾರರೊಬ್ಬರು ಪ್ರತಿಕ್ರಿಯಿಸಿದ್ದಾರೆ.