‘ವಂದೇ ಮಾತರಂ’ ನಮ್ಮ ಇತಿಹಾಸ, ವರ್ತಮಾನ ಮತ್ತು ಭವಿಷ್ಯದ ಧೈರ್ಯ: 150ನೇ ವಾರ್ಷಿಕೋತ್ಸವದಲ್ಲಿ ಪ್ರಧಾನಿ ಮೋದಿ ಮಾತು

ನವದೆಹಲಿ: ವಂದೇ ಮಾತರಂ (Vande Mataram) ಗೀತೆಯಲ್ಲಿರುವ ಪ್ರತಿ ಪದಗಳು ಒಂದು ಮಂತ್ರ, ಒಂದು ಶಕ್ತಿ, ಒಂದು ಕನಸು, ಒಂದು ಸಂಕಲ್ಪ. ಈ ಪದಗಳು ಭಾರತ ಮಾತೆಯ ಮೇಲಿನ ಭಕ್ತಿ ತೋರುತ್ತದೆ. ಈ ಪದಗಳು ನಮ್ಮನ್ನು ಇತಿಹಾಸಕ್ಕೆ ಕರೆದೊಯ್ಯುತ್ತವೆ. ಅದು ನಮ್ಮ ವರ್ತಮಾನಕ್ಕೆ ಹೊಸ ವಿಶ್ವಾಸವನ್ನು ತುಂಬುತ್ತವೆ ಎಂದು ಪ್ರಧಾನಿ ನರೇಂದ್ರ ಮೋದಿ (PM Modi) ಹೇಳಿದರು.

ವಂದೇ ಮಾತರಂನ 150 ನೇ ವಾರ್ಷಿಕೋತ್ಸವದ ವರ್ಷಪೂರ್ತಿ ಸ್ಮರಣಾರ್ಥ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದ ಅವರು ಕಾರ್ಯಕ್ರಮವನ್ನುದ್ದೇಶಿಸಿ ಮಾತನಾಡಿದರು. ವಂದೇ ಮಾತರಂ ನಮ್ಮ ಭವಿಷ್ಯಕ್ಕೆ ಹೊಸ ಧೈರ್ಯವನ್ನು ನೀಡುತ್ತದೆ. ನಮಗೆ ಸಾಧಿಸಲಾಗದ ಯಾವುದೇ ಸಂಕಲ್ಪವಿಲ್ಲ. ನಾವು ಭಾರತೀಯರು ಸಾಧಿಸಲಾಗದ ಯಾವುದೇ ಗುರಿಯಿಲ್ಲ ಎಂದರು. 

ಗುಲಾಮಗಿರಿಯ ಕಾಲದಲ್ಲಿ ವಂದೇ ಮಾತರಂ ಸಂಕಲ್ಪದ ಘೋಷಣೆಯಾಯಿತು. ಆ ಘೋಷಣೆ ಭಾರತದ ಸ್ವಾತಂತ್ರ್ಯದ ಘೋಷಣೆಯಾಗಿತ್ತು. ಗುಲಾಮಗಿರಿಯ ಕಾಲದಲ್ಲಿ, ಬ್ರಿಟಿಷರು ಭಾರತವನ್ನು ಕೀಳು ಮತ್ತು ಹಿಂದುಳಿದವರು ಎಂದು ಚಿತ್ರಿಸುವ ಮೂಲಕ ತಮ್ಮ ಆಡಳಿತವನ್ನು ಸಮರ್ಥಿಸಿಕೊಂಡ ರೀತಿ, ಈ ಮೊದಲ ಸಾಲು ಆ ಪ್ರಚಾರವನ್ನು ಸಂಪೂರ್ಣವಾಗಿ ನಾಶಮಾಡಿತು. ಆದ್ದರಿಂದ, ‘ವಂದೇ ಮಾತರಂ’ ಸ್ವಾತಂತ್ರ್ಯದ ಗೀತೆಯಾಗಿ ಮಾರ್ಪಟ್ಟಿತು. ಅಲ್ಲದೇ, ‘ವಂದೇ ಮಾತರಂ’ ಕೋಟ್ಯಂತರ ದೇಶವಾಸಿಗಳಿಗೆ ‘ಸುಜ್ಲಾಮ್ ಸುಫ್ಲಾಮ್’ ಕನಸನ್ನು ಪ್ರಸ್ತುತಪಡಿಸಿತು ಎಂದು ಹೇಳಿದರು.

1927 ರಲ್ಲಿ ಮಹಾತ್ಮಾ ಗಾಂಧಿಯವರು ‘ವಂದೇ ಮಾತರಂ’ ಎಂದು ಹೇಳಿದರು. ಇದು ನಮ್ಮ ಮುಂದೆ ಇಡೀ ಭಾರತದ ಅವಿಭಾಜ್ಯ ಚಿತ್ರವನ್ನು ಪ್ರಸ್ತುತಪಡಿಸುತ್ತದೆ. ನಮ್ಮ ರಾಷ್ಟ್ರೀಯ ಧ್ವಜವು ಕಾಲಾನಂತರದಲ್ಲಿ ಅನೇಕ ಬದಲಾವಣೆಗಳಿಗೆ ಒಳಗಾಗಿದೆ. ಆದರೆ, ಅಂದಿನಿಂದ ಇಂದಿನವರೆಗೆ ರಾಷ್ಟ್ರಧ್ವಜವನ್ನು ಹಾರಿಸಿದಾಗಲೆಲ್ಲಾ, ‘ಭಾರತ್ ಮಾತಾ ಕಿ ಜೈ’ ಮತ್ತು ‘ವಂದೇ ಮಾತರಂ’ ತಂತಾನೆ ನಮ್ಮ ಬಾಯಲ್ಲಿ ಬರುತ್ತದೆ ಎಂದು ತಿಳಿಸಿದರು.

ಈ ಅವಧಿಯಲ್ಲಿ ಭಾರತದ ದೊಡ್ಡ ಸ್ವರೂಪದಲ್ಲಿ ಉದಯವಾಗಿದೆ. ನಾವು ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರದಲ್ಲಿ ಅಭೂತಪೂರ್ವ ಪ್ರಗತಿಯನ್ನು ಸಾಧಿಸಿದ್ದೇವೆ. ನಾವು ವಿಶ್ವದ ಐದನೇ ಅತಿದೊಡ್ಡ ಆರ್ಥಿಕತೆಯಾಗಿ ಹೊರಹೊಮ್ಮಿದ್ದೇವೆ. ಶತ್ರುಗಳು ಭಯೋತ್ಪಾದನೆಯ ಮೂಲಕ ಭಾರತದ ಭದ್ರತೆ ಮತ್ತು ಗೌರವದ ಮೇಲೆ ದಾಳಿ ಮಾಡಲು ಧೈರ್ಯ ಮಾಡಿದಾಗ, ಹೊಸ ಭಾರತವು ಭಯೋತ್ಪಾದನೆಯನ್ನು ನಾಶ ಮಾಡಲು ದುರ್ಗೆಯಾಗುವುದನ್ನು ಇಡೀ ಜಗತ್ತು ನೋಡಿದೆ ಎಂದರು.

ವಂದೇ ಮಾತರಂನ ಚೈತನ್ಯವು ಸ್ವಾತಂತ್ರ್ಯ ಹೋರಾಟದಲ್ಲಿ ಇಡೀ ರಾಷ್ಟ್ರವನ್ನು ಬೆಳಗಿಸಿತು. ಆದರೆ, ದುರದೃಷ್ಟವಶಾತ್ 1937 ರಲ್ಲಿ ಅದರ ಆತ್ಮದ ಒಂದು ಭಾಗವಾದ ವಂದೇ ಮಾತರಂನ ಪ್ರಮುಖ ಶ್ಲೋಕಗಳನ್ನು ಬೇರ್ಪಡಿಸಲಾಯಿತು. ವಂದೇ ಮಾತರಂ ಛಿದ್ರವಾಯಿತು. ಅದನ್ನು ತುಂಡುಗಳಾಗಿ ಹರಿದು ಹಾಕಲಾಯಿತು. ‘ವಂದೇ ಮಾತರಂ’ ನ ಈ ವಿಭಜನೆಯು ದೇಶದ ವಿಭಜನೆಯ ಬೀಜಗಳನ್ನು ಬಿತ್ತಿತು. ಈ ಅನ್ಯಾಯ ಏಕೆ ಸಂಭವಿಸಿತು ಎಂಬುದನ್ನು ಇಂದಿನ ಪೀಳಿಗೆ ತಿಳಿದುಕೊಳ್ಳುವುದು ಮುಖ್ಯವಾಗಿದೆ. ಏಕೆಂದರೆ ಅದೇ ವಿಭಜನಾ ಚಿಂತನೆಯು ಇಂದಿಗೂ ದೇಶಕ್ಕೆ ಸವಾಲಾಗಿ ಉಳಿದಿದೆ ಎಂದು ಕಾಂಗ್ರೆಸ್‌ ವಿರುದ್ಧ ಗುಡುಗಿದರು.