ಬಿಎಂಟಿಸಿ ಚಾಲಕರಿಗೆ ಕಠಿಣ ಎಚ್ಚರಿಕೆ: ಬಸ್ ಚಲಾಯಿಸುವಾಗ ಮೊಬೈಲ್ ಬಳಸಿದರೆ ಸಸ್ಪೆಂಡ್‌, ಸಂಬಳ ಕಟ್, ವರ್ಗಾವಣೆ

ಬೆಂಗಳೂರು: ವಾಹನಗಳನ್ನ ಚಲಾಯಿಸುವಾಗ ರೀಲ್ಸ್​ ಮಾಡೋದು, ಮೊಬೈಲ್​ ಬಳಸೋದು ಅಪರಾಧವಾದ್ರೂ ಇತ್ತೀಚೆಗೆ ಅವು ಮಾಮೂಲು ಎಂಬಂತಾಗಿವೆ. ಅದರಲ್ಲೂ ಪ್ರಯಾಣಿಕರ ಸುರಕ್ಷತೆಯ ಹೊಣೆ ಹೊತ್ತ ಸಾರಿಗೆ ವಾಹನಗಳ ಚಾಲಕರ ಮೊಬೈಲ್​ ಗೀಳು ಸಾಕಷ್ಟು ಅನಾಹುತಕ್ಕೆ ಕಾರಣವಾಗ್ತಿದೆ. ಹೀಗಾಗಿ ಎಚ್ಚೆತ್ತಿರೋ ಬಿಎಂಟಿಸಿ, ಸಂಸ್ಥೆಯ ಚಾಲಕರಿಗೆ ಖಡಕ್​ ಎಚ್ಚರಿಕೆ ರವಾನಿಸಿದೆ. ಬಸ್​ ಚಾಲನೆ ವೇಳೆ ಮೊಬೈಲ್​ ಬಳಸಿದ್ರೆ ಅಮಾನತು, ವರ್ಗಾವಣೆ ಶಿಕ್ಷೆ ಕನ್ಫರ್ಮ್​ ಎಂಬ ಸಂದೇಶ ನೀಡಿದೆ.

ನಗರದಲ್ಲಿ ಬಿಎಂಟಿಸಿ ಬಸ್​ ಅಪಘಾತಗಳು ಹೆಚ್ಚಾಗುತ್ತಿರುವ ಹಿನ್ನೆಲೆ, ಬಸ್​ ಚಾಲನೆ ವೇಳೆ ಚಾಲಕರು ಕಡ್ಡಾಯವಾಗಿ ಮೊಬೈಲ್​ ಬಳಸಬಾರದು. ಫೋನ್​ನಲ್ಲಿ ಮಾತಾಡಿದ್ರೆ, ಹೆಡ್​ ಫೋನ್​ ಬಳಕೆ ಅಥವಾ ಚಾಟಿಂಗ್​ ಮಾಡಿದ್ರೆ ಸಸ್ಪೆಂಡ್​ ಅಥವಾ ಟ್ರಾನ್ಸ್ಫರ್​ ಜೊತೆಗೆ ಸಂಬಳದಲ್ಲಿಯೂ ಕಡಿತಗೊಳಿಸುವ ಶಿಕ್ಷೆ ನೀಡಲು ತೀರ್ಮಾನಿಸಲಾಗಿದೆ. ಬಿಎಂಟಿಸಿ ಬಸ್​ ಅಪಘಾತಗಳ ತಡೆಗೆ ಕಠಿಣ ಕ್ರಮಕ್ಕೆ ಮುಂದಾಗಿರೋ ಅಧಿಕಾರಿಗಳು, ಇದರ ಭಾಗವಾಗಿ ಚಾಲಕರಿಗೆ ಖಡಕ್​ ಸೂಚನೆ ರವಾನಿಸಿದ್ದಾರೆ.

ಚಾಲನೆ ವೇಳೆ ಮೊಬೈಲ್​ ಬಳಸಿದ್ರೆ ಶಿಕ್ಷೆ ಏನು?

ಮೊದಲನೇ ಬಾರಿ:

• 15 ದಿನಗಳ ಅಮಾನತ್ತು
• ಶಿಸ್ತು ಕ್ರಮ (ನಿಯಮ-23)
• ಅಮಾನತ್ತು ತೆರವು ನಂತರ ಬೇರೆ ಘಟಕಕ್ಕೆ ವರ್ಗಾವಣೆ
•  ವೇತನದಿಂದ ₹5000 ಕಡಿತ

ಎರಡನೇ ಬಾರಿ: 

• 15 ದಿನಗಳ ಅಮಾನತ್ತು
• ಶಿಸ್ತು ಕ್ರಮ (ನಿಯಮ-23)
• ವರ್ಗಾವಣೆ
• ವಾರ್ಷಿಕ ಬಡ್ತಿ 1 ವರ್ಷಕ್ಕೆ ತಡೆ ಅಥವಾ ₹5000 ಕಡಿತ

ಮೂರನೇ ಬಾರಿ:

• 15 ದಿನಗಳ ಅಮಾನತ್ತು
• ಶಿಸ್ತು ಕ್ರಮ
• ವರ್ಗಾವಣೆ
• ವಾರ್ಷಿಕ ಬಡ್ತಿ 2 ವರ್ಷಕ್ಕೆ ತಡೆ ಅಥವಾ ₹10,000 ಕಡಿತ

ನಾಲ್ಕನೇ ಬಾರಿ:

• 15 ದಿನಗಳ ಅಮಾನತ್ತು
• ಶಿಸ್ತು ಕ್ರಮ
• ವರ್ಗಾವಣೆ
• ಶಾಶ್ವತ ಬಡ್ತಿ ಇಳಿಕೆ / 2 ವರ್ಷ ತಡೆ ಅಥವಾ ₹20,000 ಕಡಿತ

ಐದನೇ ಬಾರಿ:

• 15 ದಿನಗಳ ಅಮಾನತ್ತು
• ಶಿಸ್ತು ಕ್ರಮ
•  ವರ್ಗಾವಣೆ
• ವಾರ್ಷಿಕ ಬಡ್ತಿಗೆ ಶಾಶ್ವತ ತಡೆ ಅಥವಾ ₹25,000 ಕಡಿತ

ಆರು ಅಥವಾ ಅದಕ್ಕಿಂತ ಹೆಚ್ಚು ಸಲ

• 15 ದಿನಗಳ ಅಮಾನತ್ತು
• ಶಿಸ್ತು ಕ್ರಮ
• ವರ್ಗಾವಣೆ
• 2 ವಾರ್ಷಿಕ ಬಡ್ತಿ ಶಾಶ್ವತ ಇಳಿಕೆ/ತಡೆ ಅಥವಾ ₹30,000 ಕಡಿತ
• ಸಂಸ್ಥೆಯ ಶಿಸ್ತು ನಿಯಮಾವಳಿ 1971 ರ ನಿಯಮ 18(b) ಅನ್ವಯ ಹೆಚ್ಚುವರಿ ಶಿಕ್ಷೆ