ಬೆಂಗಳೂರು ಟ್ರಾಫಿಕ್​ನಿಂದ ವರ್ಷಕ್ಕೆ 2.5 ತಿಂಗಳು ನಷ್ಟ”

ಬೆಂಗಳೂರು: ಬೆಂಗಳೂರು ನಗರದಲ್ಲಿ ಟ್ರಾಫಿಕ್ ಸಮಸ್ಯೆ ಹೊಸದೇನಲ್ಲ. ನಗರದಲ್ಲಿ ಹೆಚ್ಚುತ್ತಿರುವ  ಜನಸಂಖ್ಯೆ ಮತ್ತು ಉದ್ಯೋಗಾವಕಾಶಗಳು ಲಕ್ಷಾಂತರ ಜನರನ್ನು ತನ್ನತ್ತ ಸೆಳೆಯುತ್ತಿದೆ. ಕಳೆದ ಒಂದು ವರ್ಷದಲ್ಲಿ ಬೆಂಗಳೂರಿನಲ್ಲಿ 7 ಲಕ್ಷಕ್ಕೂ ಹೆಚ್ಚು ಹೊಸ ವಾಹನಗಳು ನೋಂದಣಿಯಾಗಿವೆ. ಹೀಗಿರುವಾಗ ಪ್ರತಿನಿತ್ಯ ಓಡಾಡುವ ಜನರು ಟ್ರಾಫಿಕ್ ಸಮಸ್ಯೆ ಎದುರಿಸುವುದು ಸಾಮಾನ್ಯ. ಈ ಬಗ್ಗೆ ಟೆಕ್ಕಿಯೊಬ್ಬರು ಹಂಚಿಕೊಂಡ ರೆಡ್ಡಿಟ್ ಪೋಸ್ಟ್ ಇದೀಗ ವೈರಲ್​ ಆಗುತ್ತಿದೆ. .

ಬೆಂಗಳೂರಿನ ಜೆ.ಪಿ ನಗರದ ನಿವಾಸಿಯಾಗಿರುವ ಈ ಟೆಕ್ಕಿ ದಿನನಿತ್ಯ ನಗರದಲ್ಲಿ ಸಂಚರಿಸುವಾಗ ಅವರು ಎದುರಿಸುವ ಸಮಸ್ಯೆಗಳನ್ನು ರೆಡ್ಡಿಟ್​ನಲ್ಲಿ ಹಂಚಿಕೊಂಡಿದ್ದಾರೆ. ಇವರ ವಾರ್ಷಿಕ ಆದಾಯ 28 ಲಕ್ಷ ರೂಪಾಯಿಗಳಾಗಿದ್ದು, ಅದರಲ್ಲಿ 6.5  ಲಕ್ಷ ರೂ.ಗಳಷ್ಟು ತೆರಿಗೆ ಕಟ್ಟುತ್ತಾರೆ. ಇದರೊಂದಿಗೆ ದಿನನಿತ್ಯದ ಖರ್ಚು ವೆಚ್ಚದಲ್ಲಿ ವರ್ಷಕ್ಕೆ  1.4 ಲಕ್ಷ ರೂ.ಗಳಷ್ಟು GST ಪಾವತಿಸುತ್ತಾರೆ.

ಅವರ ಆಫೀಸು ಔಟರ್ ರಿಂಗ್​ ರೋಡ್​ನಲ್ಲಿರುವ ಕಾರಣ ದಿನಾಲೂ ಅವರು ಮನೆಯಿಂದ  14 ಕಿ.ಮೀ ಚಲಿಸಬೇಕು. ಇಷ್ಟು ದೂರ ಚಲಿಸಲು ಸಾಮಾನ್ಯವಾಗಿ 30 ನಿಮಿಷಗಳು ಸಾಕು. ಆದರೆ ಟ್ರಾಫಿಕ್​ನ ಕಾರಣದಿಂದಾಗಿ ಪ್ರತಿದಿನ ಮನೆಯಿಂದ ಆಫೀಸು ತಲುಪಲು 90 ನಿಮಿಷಗಳ ಕಾಲಾವಧಿ ತೆಗೆದುಕೊಳ್ಳುತ್ತಾರೆ. ಮರಳಿ ಮನೆಗೆ ಬರುವಾಗಲೂ ಮತ್ತದೇ 90 ನಿಮಿಷ ಟ್ರಾಫಿಕ್​ನಲ್ಲಿ ಕಳೆಯುತ್ತಾರೆ. ‘ಬೆಂಗಳೂರಿನ ಈ ಟ್ರಾಫಿಕ್​ನಿಂದ ನನ್ನ ಒಂದು ವರ್ಷದಲ್ಲಿ ಎರಡೂ ವರೆ ತಿಂಗಳುಗಳು ಟ್ರಾಫಿಕ್​ನಲ್ಲೇ ಕಳೆದು ಹೋಗುತ್ತಿವೆ ‘ಎಂದು ರೆಡ್ಡಿಟ್​ನಲ್ಲಿ ಬರೆದು ಬೇಸರ ವ್ಯಕ್ತಪಡಿಸಿದ್ದಾರೆ.

ಇವರ ಈ ಪೋಸ್ಟ್​ಗೆ ರೆಡ್ಡಿಟ್ ಬಳಕೆದಾರರ ಪ್ರತಿಕ್ರಿಯೆ ಹೇಗಿತ್ತು?

ಟೆಕ್ಕಿಯ ಟ್ರಾಫಿಕ್ ಬಗೆಗಿನ ಈ ಪೋಸ್ಟ್ ಹಲವಾರು ನೆಟ್ಟಿಗರ ಗಮನ ಸೆಳೆದಿದೆ. ಹಲವರು ಪೋಸ್ಟ್​ಗೆ ಕಾಮೆಂಟ್ ಮಾಡಿ ತಮಗಾದ ಅನುಭವವನ್ನು ಹಂಚಿಕೊಂಡಿದ್ದಾರೆ. ಒಬ್ಬ ಬಳಕೆದಾರರು ‘ಬೆಂಗಳೂರಿನಲ್ಲಿ ಕೆಲಸ ಮಾಡುತ್ತಿರುವ ಇಂಜಿನಿಯರುಗಳನ್ನು ಸ್ವಚ್ಛವಾದ ಗಾಳಿಯಿರುವ ಮತ್ತು ಟ್ರಾಫಿಕ್ ಇಲ್ಲದ ದೇಶಗಳಿಗೆ ವರ್ಗಾಯಿಸಿದರೆ ಅವರ ಕೆಲಸದ ಸಾಮರ್ಥ್ಯ 20 ಪ್ರತಿಶತ ಹೆಚ್ಚಾಗಲಿದೆ’ ಎಂದು ಕಾಮೆಂಟ್​ನಲ್ಲಿ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.

ಇನ್ನೋರ್ವ ಬಳಕೆದಾರರು ‘ಇಷ್ಟು ಜನಸಂದಣಿಯಿರುವ ನಗರದಲ್ಲಿ ಹೈವೇ ನಿರ್ಮಿಸಲು ಸಾಧ್ಯವಿಲ್ಲ. ಇದು ಕೇವಲ ರಾಜಕಾರಣಿಗಳ ತಪ್ಪಲ್ಲ. ಎರಡನೇ ಹಂತದ ನಗರಗಳಲ್ಲಿ ಹೂಡಿಕೆ ಮಾಡಲು ಕೇಂದ್ರ ಸರ್ಕಾರವೇಕೆ ಕಂಪನಿಗಳಿಗೆ ತೆರಿಗೆ ವಿನಾಯಿತಿ ನೀಡುತ್ತಿಲ್ಲ? ಇದರಿಂದಾಗಿ ಟ್ರಾಫಿಕ್​ ಸಹ ಕಮ್ಮಿಯಾಗುತ್ತದೆ. ಜೇನು ನೊಣಗಳಂತೆ ಎಲ್ಲರೂ ಬಂದು ಬೆಂಗಳೂರಿನಲ್ಲಿ ಸೇರಿಕೊಂಡು ದುಬೈನಂತಹ ಇನ್ಪ್ರಾಸ್ಟ್ರಕ್ಷರ್ ನಿರೀಕ್ಷಿಸುತ್ತಿದ್ದಾರೆ ‘ಎಂದು ಕಾಮೆಂಟ್ ಮಾಡಿದ್ದಾರೆ.