ಇತಿಹಾಸದ ಅತ್ಯಂತ ಕಡಿಮೆ ಅವಧಿಯ ಯುದ್ಧ: ಕೇವಲ 38 ನಿಮಿಷದಲ್ಲಿ ಮುಗಿದಿತ್ತು!

ಯುದ್ಧವೆಂದರೆ..ತಿಂಗಳುಗಟ್ಟಲೆ, ವರ್ಷಗಟ್ಟಲೆ ನಡೆಯುವ ದಾಳಿ-ಪ್ರತಿದಾಳಿ. ಸಾಮಾನ್ಯವಾಗಿ ನಾವೆಲ್ಲರೂ ಯುದ್ಧವೆಂದರೆ ಹೀಗೆ ಅಂದುಕೊಳ್ತೇವೆ. ಅಂದಿನ ಮಹಾಭಾರತದ ಯುದ್ಧದಿಂದ ಹಿಡಿದು..ಮೊದಲ -2ನೇ ಮಹಾಯುದ್ಧಗಳು ಕೂಡ ವರ್ಷಾನುಗಟ್ಟಲೆ ನಡೆದವು. ಅದೆಷ್ಟೋ ಸಾವು-ನೋವು ನಡೆಯಿತು.

ಆದರೆ ನಿಮಗೆ ಗೊತ್ತಾ? ಇತಿಹಾಸದಲ್ಲಿ ಒಂದು ವಿಚಿತ್ರವಾದ ಯುದ್ಧ ನಡೆದಿತ್ತು. ಆ ಯುದ್ಧ ಪ್ರಾರಂಭವಾಗಿ ಒಂದು ತಾಸಿನ ಒಳಗೇ ಮುಗಿದು ಹೋಗಿತ್ತು..!

ಇದು ವಿಚಿತ್ರ ಎನ್ನಿಸಿದರೂ ಸತ್ಯ. 1896ರಲ್ಲಿ ನಡೆದ ಆಂಗ್ಲೋ-ಜಜಿಬಾರ್ ಯುದ್ಧವು ಅತ್ಯಂತ ಕಡಿಮೆ ಅವಧಿಗೆ ನಡೆದ ಯುದ್ಧವಾಗಿದೆ. 1896ರ ಆಗಸ್ಟ್‌ 27ರಂದು ಯುದ್ಧ ಶುರುವಾಯಿತು. ಆದರೆ ಪ್ರಾರಂಭವಾಗಿ 38-45 ನಿಮಿಷಕ್ಕೆಲ್ಲ ಯುದ್ಧ ಕೊನೆಗೊಂಡಿತ್ತು. ಇತಿಹಾಸದಲ್ಲಿ ಇಷ್ಟು ಕಡಿಮೆ ಅವಧಿಯಲ್ಲಿ ಮುಕ್ತಾಯಗೊಂಡ ಯುದ್ಧ ಇನ್ನೊಂದಿಲ್ಲ. ಆಫ್ರಿಕಾದ ಜಂಜಿಬಾರ್‌ ಎಂಬ ರಾಜ್ಯದಲ್ಲಿ ಬ್ರಿಟಿಷರು ಪ್ರಾಬಲ್ಯ ಹೊಂದಿದ್ದರು. ಜಿಂಜಿಬಾರ್‌ ಆಡಳಿತ ನಡೆಸುವ ಸುಲ್ತಾನ ಯಾರಾಗಬೇಕು ಎಂದು ಅನುಮೋದಿಸುವ ಹಕ್ಕನ್ನ ಹೊಂದಿದ್ದರು. ಹಾಗಿದ್ದಾಗ್ಯೂ ಅಲ್ಲಿನ ಆಡಳಿತ ನಡೆಸುತ್ತಿದ್ದ ಸುಲ್ತಾನ್ ಹಮೀದ್ ಬಿನ್ ಫುವಾನಿ ನಿಧನರಾದಾಗ, ಅವರ ಸೋದರಳಿಯ ಖಾಲಿದ್ ಬಿನ್ ಬರ್ಘಾಶ್ ಬ್ರಿಟಿಷರ ಒಪ್ಪಿಗೆಯಿಲ್ಲದೆ ಅಧಿಕಾರಕ್ಕೆ ಏರಿದ್ದ. ಇದರಿಂದ ಬ್ರಿಟಿಷರು ಸಿಟ್ಟಾಗಿದ್ದರು. ಕೂಡಲೇ ಅಧಿಕಾರದಿಂದ ಕೆಳಗೆ ಇಳಿದು, ಅರಮನೆಯನ್ನ ತೊರೆಯುವಂತೆ ಖಾಲಿದ್ ಬಿನ್ ಬರ್ಘಾಶ್‌ಗೆ ಆದೇಶ ಹೊರಡಿಸಿದ್ದವು. ಆದರೆ ಆ ಸುಲ್ತಾನ ಬ್ರಿಟಿಷರ ಆದೇಶಕ್ಕೆ ಸೊಪ್ಪು ಹಾಕಲಿಲ್ಲ. ಆಗ ತಕ್ಷಣವೇ ಬ್ರಿಟಿಷ್‌ ಪಡೆಗಳು ಯುದ್ಧ ಘೋಷಿಸಿ, ಕಾರ್ಯಪ್ರವೃತ್ತವಾದವು.

ಅರಮನೆ ನಾಶ..

ಬ್ರಿಟಿಷರ ದಾಳಿ ಹೇಗಿತ್ತು ಎಂದರೆ, ಅವರ ನೌಕಾಪಡೆ ಸಿಬ್ಬಂದಿ ಸುಲ್ತಾನನ ಅರಮನೆ ಮೇಲೆ ಒಂದೇ ಸಮನೆ ಗುಂಡುಗಳ ದಾಳಿ ನಡೆಸಿದ್ದರು. ಭಾರಿ ಶೆಲ್‌ ದಾಳಿಯು ಆ ಅರಮನೆಯನ್ನ ಕೆಲವೇ ನಿಮಿಷಗಳಲ್ಲಿ ಬಹುತೇಕ ನಾಶ ಮಾಡಿತು. ಒಂದು ತಾಸಿಗೂ ಮುನ್ನವೇ ಸುಲ್ತಾನ ಖಾಲಿದ್ ಪಡೆಗಳು ಬ್ರಿಟಿಷರ ಎದುರು ಮಂಡಿಯೂರಿದ್ದವು. ಅರಮನೆ ಬಿಟ್ಟು ಓಡಿಹೋದರು. ಅಲ್ಲಿಗೆ ಯುದ್ಧವೂ ಕೊನೆಗೊಂಡಿತು. ಜಂಜಿಬಾರ್‌ನ್ನ ತಮ್ಮ ವಶಕ್ಕೆ ಪಡೆದ ಬ್ರಿಟಿಷರು, ಕೂಡಲೇ ಹೊಸ ಸುಲ್ತಾನನಿಗೆ ಅಧಿಕಾರ ನೀಡಿದರು.

ಸಾಮಾನ್ಯವಾಗಿ ಯುದ್ಧಗಳು, ದಾಳಿಯ ತೀವ್ರತೆ, ವಿನಾಶ, ಸೋಲು-ಗೆಲುವುಗಳ ಆಧಾರದಲ್ಲಿ ಅಳೆಯಲ್ಪಡುತ್ತವೆ. ಇತಿಹಾಸದಲ್ಲಿಯೂ ಈ ಅಂಶದ ಆಧಾರದಲ್ಲಿಯೇ ದಾಖಲಾಗುತ್ತವೆ. ಆದರೆ ಆಂಗ್ಲೋ-ಜಂಜಿಬಾರ್‌ ಯುದ್ಧ ಹಾಗಲ್ಲ. ಇದು ಅತ್ಯಂತ ಕಡಿಮೆ ಸಮಯದಲ್ಲಿ ಮುಗಿದು ಹೋಗಿದ್ದಕ್ಕೆ ಹೆಸರಾಗಿದೆ. ಇದೇ ಅಂಶದ ಆಧಾರದಲ್ಲಿಯೇ ಇತಿಹಾಸದಲ್ಲಿ ದಾಖಲಾಗಿದೆ.