114 ವರ್ಷದ ‘ಮ್ಯಾರಥಾನ್ ಮ್ಯಾನ್’ ಫೌಜಾ ಸಿಂಗ್ ರಸ್ತೆ ಅಪಘಾತದಲ್ಲಿ ದುರಂತ ಸಾವು!

ನವದೆಹಲಿ : ಪ್ರಸಿದ್ಧ ಮ್ಯಾರಥಾನ್ ರನ್ನರ್‌ ಫೌಜಾ ಸಿಂಗ್ ಸೋಮವಾರ ರಸ್ತೆ ಅಪಘಾತದಲ್ಲಿ ನಿಧನರಾದರು. ಅವರಿಗೆ 114 ವರ್ಷ ವಯಸ್ಸಾಗಿತ್ತು. ವರದಿಗಳ ಪ್ರಕಾರ, ಸಿಂಗ್ ರಸ್ತೆ ದಾಟುತ್ತಿದ್ದಾಗ ವಾಹನ ಡಿಕ್ಕಿ ಹೊಡೆದಿದೆ. ಜಲಂಧರ್‌ ಜಿಲ್ಲೆಯ ಅಧಂಪುರದ ಬಿಯಾಸ್‌ ಗ್ರಾಮದಲ್ಲಿ ಮಧ್ಯಾಹ್ನ 3.30ಕ್ಕೆ ಈ ಘಟನೆ ನಡೆದಿದೆ.

ಅವರ ಕುಟುಂಬದವರು ಹೇಳುವಂತೆ ಅವರು ತಮ್ಮ ಮನೆಯ ಸಮೀಪದ ರಾಷ್ಟ್ರೀಯ ಹೆದ್ದಾರಿಯಲ್ಲಿ ವಾಕಿಂಗ್‌ಗೆ ಹೊರಟಿದ್ದಾಗ ವಾಹನ ಡಿಕ್ಕಿ ಹೊಡೆದಿದೆ. ವಾಹನದ ಮಾಲೀಕರು ಡಿಕ್ಕಿ ಹೊಡೆದ ನಂತರ ವಾಹನೊಂದಿಗೆ ಪರಾರಿಯಾಗಿದ್ದಾರೆ. ಅವರನ್ನು ಆಸ್ಪತ್ರೆಗೆ ಸಾಗಿಸಲಾಯಿತಾದರೂ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ.

ವಯಸ್ಸಾದ ಹೊರತಾಗಿಯೂ, ಅವರು ಉತ್ತಮ ಆರೋಗ್ಯವನ್ನು ಕಾಯ್ದುಕೊಂಡಿದ್ದರು ಮತ್ತು ಕೋಲು ಹಿಡಿದುಕೊಂಡು ನಡೆಯುತ್ತಿದ್ದರು. ಅವರು ನಗರದಲ್ಲಿ ನಡೆಯುವ ಪ್ರತಿಯೊಂದು ಮ್ಯಾರಥಾನ್ ಸ್ಪರ್ಧೆಯಲ್ಲಿ ಭಾಗವಹಿಸುತ್ತಿದ್ದರು. ಮ್ಯಾರಥಾನ್‌ಗಳಲ್ಲಿ ಭಾಗವಹಿಸದೇ ಇದ್ದರೂ, ಕ್ರೀಡಾಪಟುಗಳನ್ನು ಹುರಿದುಂಬಿಸುವುದು, ರೇಸ್‌ಗಳಿಗೆ ಚಾಲನೆ ನೀಡುವ ಕಾರ್ಯಕ್ರಮಗಳಲ್ಲಿ ಭಾಗಿಯಾಗುತ್ತಿದ್ದರು.

ಫೌಜಾ ಸಿಂಗ್‌ ಕುಟುಂಬಕ್ಕೆ ಬಿಡದ ಆಕ್ಸಿಡೆಂಟ್‌: ಅತ್ಯಂತ ಹಿರಿಯ ಮ್ಯಾರಥಾನ್ ಓಟಗಾರ ಎನ್ನುವ ದಾಖಲೆ ಹೊಂದಿರುವ ಫೌಜಾ ಸಿಂಗ್, ತಮ್ಮ ಪತ್ನಿ ಮತ್ತು ಮಗ ಅಪಘಾತದಲ್ಲಿ ನಿಧನರಾದಾಗ ತಮ್ಮ 89 ನೇ ವಯಸ್ಸಿನಲ್ಲಿ ಓಡಲು ಪ್ರಾರಂಭಿಸಿದರು. ಒಂಟಿತನ ಮತ್ತು ಖಿನ್ನತೆಯ ವಿರುದ್ಧ ಹೋರಾಡಲು ಅವರು ಓಟವನ್ನು ಪ್ರಾರಂಭಿಸಿದರು. ಅವರು ಅಂತಿಮವಾಗಿ 2000 ರಲ್ಲಿ ಲಂಡನ್‌ನಲ್ಲಿ ಪ್ರಾರಂಭವಾದ 18 ಮ್ಯಾರಥಾನ್‌ಗಳಲ್ಲಿ ಓಡಿದರು. ಅವರ ಕೊನೆಯ ಮೂರು ಮ್ಯಾರಥಾನ್‌ಗಳಾದ 2011 ರಲ್ಲಿ ಟೊರೊಂಟೊ, 2012 ರಲ್ಲಿ ಲಂಡನ್ ಮತ್ತು 2013ರ ಹಾಂಕಾಂಗ್‌ ಮ್ಯಾರಥಾನ್‌ ಬಳಿಕ ಅವರು ನಿವೃತ್ತರಾದರು.

102ನೇ ವರ್ಷದವರೆಗೂ ಅವರು ಮ್ಯಾರಥಾನ್‌ಗಳಲ್ಲಿ ಭಾಗವಹಿಸುತ್ತಲೇ ಇದ್ದರೂ, ಅವರ ಜನ್ಮ ದಿನಾಂಕವನ್ನು ದೃಢೀಕರಿಸಲು ಯಾವುದೇ ದಾಖಲೆಗಳಿಲ್ಲದ ಕಾರಣ ಅವರನ್ನು ಅತ್ಯಂತ ಹಿರಿಯ ಮ್ಯಾರಥಾನ್ ಓಟಗಾರ ಎಂದು ಗಿನ್ನೆಸ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್‌ನಲ್ಲಿ ಸೇರಿಸಲು ಸಾಧ್ಯವಾಗಲಿಲ್ಲ. ತೆಳ್ಳಗಿನ, ಎತ್ತರದ, ಸರಳ, ಸಸ್ಯಾಹಾರಿ ವ್ಯಕ್ತಿಯಾಗಿದ್ದ ಅವರು, ಪೆಟಾ ಅಭಿಯಾನಗಳಲ್ಲಿಯೂ ಕಾಣಿಸಿಕೊಂಡರು. ಅವರು ‘ಇಂಪಾಸಿಬಲ್ ಈಸ್ ನಥಿಂಗ್’ ಅಭಿಯಾನದಲ್ಲಿ ಅಡಿಡಾಸ್ ಪೋಸ್ಟರ್ ಬಾಯ್ ಕೂಡ ಆಗಿದ್ದರು.

ಬ್ರಿಟಿಷ್ ಸಿಖ್ ಆಗಿ, ಅವರು ಅಕಾಲಿಕ ಶಿಶುಗಳ ಆರೈಕೆ, ಸಿಖ್ ಸಮುದಾಯದ ಕಲ್ಯಾಣ ಮತ್ತು ಇತರ ಕಾರಣಗಳಿಗಾಗಿ ಹಣವನ್ನು ಸಂಗ್ರಹಿಸುವ ಹಲವಾರು ದತ್ತಿ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿದರು. ಕಾಂಗ್ರೆಸ್‌ನ ಪರ್ಗತ್ ಸಿಂಗ್ ಮತ್ತು ಬಿಜೆಪಿಯ ಇಕ್ಬಾಲ್ ಸಿಂಗ್ ಲಾಲ್‌ಪುರ್ ಸೇರಿದಂತೆ ವಿವಿಧ ಪಕ್ಷಗಳ ನಾಯಕರು ಅವರ ನಿಧನಕ್ಕೆ ಸಂತಾಪ ಸೂಚಿಸಿ, ಅವರನ್ನು ಯುವಕರಿಗೆ ಸ್ಫೂರ್ತಿ ಎಂದು ಕರೆದರು.

ಜಲಂಧರ್ ಗ್ರಾಮೀಣ ಎಸ್‌ಎಸ್‌ಪಿ ಹರ್ವಿಂದರ್ ವಿರ್ಕ್, “ಭೋಗ್‌ಪುರ ರಸ್ತೆಯಲ್ಲಿರುವ ಫೌಜಾ ಸಿಂಗ್ ಕುಟುಂಬದ ಒಡೆತನದ ಧಾಬಾಗೆ ನಡೆದುಕೊಂಡು ಹೋಗುತ್ತಿದ್ದಾಗ ಮಧ್ಯಾಹ್ನ 3.30 ರ ಸುಮಾರಿಗೆ ಅಪಘಾತ ಸಂಭವಿಸಿದ್ದರೂ, ಅವರ ನಿಧನದ ನಂತರವೇ ನಮಗೆ ಮಾಹಿತಿ ಸಿಕ್ಕಿತು” ಎಂದು ಹೇಳಿದರು. ಸಂಜೆ ಜಲಂಧರ್‌ನ ಶ್ರೀಮಾನ್ ಆಸ್ಪತ್ರೆಯಲ್ಲಿ ಫೌಜಾ ಸಿಂಗ್ ನಿಧನರಾದರು.

“ಆರೋಪಿಯನ್ನು ಬಂಧಿಸಲು ನಾವು ಇನ್ನೂ ಪ್ರದೇಶದಿಂದ ಸಿಸಿಟಿವಿ ದೃಶ್ಯಾವಳಿಗಳನ್ನು ಸಂಗ್ರಹಿಸುವ ಪ್ರಕ್ರಿಯೆಯಲ್ಲಿದ್ದೇವೆ. ಬಹುಶಃ ಇನ್ನೋವಾ ಅಥವಾ ಫಾರ್ಚೂನರ್ ವಾಹನವು ಅವರಿಗೆ ಡಿಕ್ಕಿ ಹೊಡೆದಿರಬಹುದು. ನಾವು ಅಪರಿಚಿತ ವ್ಯಕ್ತಿಯ ವಿರುದ್ಧ ಎಫ್‌ಐಆರ್ ದಾಖಲಿಸಿದ್ದೇವೆ” ಎಂದು ಎಸ್‌ಎಸ್‌ಪಿ ಹೇಳಿದರು.

ಅವರ ನಿಧನಕ್ಕೆ ಪ್ರತಿಕ್ರಿಯಿಸಿದ ಪಂಜಾಬ್ ರಾಜ್ಯಪಾಲ ಗುಲಾಬ್ ಚಂದ್ ಕಟಾರಿಯಾ, “ದಿ ಲೆಜೆಂಡರಿ ಮ್ಯಾರಥಾನ್ ಓಟಗಾರ ಮತ್ತು ಭರವಸೆಯ ಶಾಶ್ವತ ಸಂಕೇತವಾಗಿದ್ದ ಸರ್ದಾರ್ ಫೌಜಾ ಸಿಂಗ್ ಜಿ ಅವರ ನಿಧನದಿಂದ ತೀವ್ರ ದುಃಖಿತನಾಗಿದ್ದೇನೆ. 114 ನೇ ವಯಸ್ಸಿನಲ್ಲಿಯೂ ಸಹ, ಅವರು ತಮ್ಮ ಶಕ್ತಿ ಮತ್ತು ಬದ್ಧತೆಯಿಂದ ಪೀಳಿಗೆಗೆ ಸ್ಫೂರ್ತಿ ನೀಡುತ್ತಲೇ ಇದ್ದರು. ಡಿಸೆಂಬರ್ 2024 ರಲ್ಲಿ ಜಲಂಧರ್ ಜಿಲ್ಲೆಯ ಅವರ ಗ್ರಾಮ ಬಿಯಾಸ್ ನಿಂದ ನಡೆದ ಎರಡು ದಿನಗಳ ‘ನಶಾ ಮುಕ್ತ್ – ರಂಗಲಾ ಪಂಜಾಬ್’ ಮೆರವಣಿಗೆಯಲ್ಲಿ ಅವರೊಂದಿಗೆ ಇರುವ ಗೌರವ ನನಗೆ ಸಿಕ್ಕಿತು. ಆಗಲೂ, ಅವರ ಉಪಸ್ಥಿತಿಯು ಚಳುವಳಿಗೆ ಅಪ್ರತಿಮ ಶಕ್ತಿ ಮತ್ತು ಚೈತನ್ಯವನ್ನು ತುಂಬಿತು.

“ಅವರು ಇಂದು ತಮ್ಮ ಗ್ರಾಮದಲ್ಲಿ ನಡೆದ ದುರಂತ ರಸ್ತೆ ಅಪಘಾತದಲ್ಲಿ ಪ್ರಾಣ ಕಳೆದುಕೊಂಡರು ಎಂದು ತಿಳಿದು ಹೃದಯ ವಿದ್ರಾವಕವಾಗಿದೆ. ಆದರೂ, ಅವರ ಪರಂಪರೆ ಆರೋಗ್ಯಕರ ಮತ್ತು ಮಾದಕವಸ್ತು ಮುಕ್ತ ಪಂಜಾಬ್‌ಗಾಗಿ ಹೋರಾಡುತ್ತಿರುವವರ ಹೃದಯದಲ್ಲಿ ಶಾಶ್ವತವಾಗಿರುತ್ತದೆ’ ಎಂದು ಹೇಳಿದ್ದಾರೆ.