ಮಿಜೋರಾಂನಲ್ಲಿ ಶೂನ್ಯ ಅನಕ್ಷರಸ್ಥರು: ಕೇರಳವನ್ನೂ ಮೀರುವ ಅಚ್ಚರಿ ಸಾಧನೆ

ಮಿಜೋರಾಂ: ಕೇರಳವು ಸಾಕ್ಷರತೆಯ ವಿಷಯದಲ್ಲಿ ಅಗ್ರಸ್ಥಾನದಲ್ಲಿರುವ ರಾಜ್ಯಗಳಲ್ಲಿ ಒಂದಾಗಿದೆ. ಆದರೆ ಭಾರತದಲ್ಲಿ ಒಬ್ಬನೇ ಒಬ್ಬ ಅನಕ್ಷರಸ್ಥ ವ್ಯಕ್ತಿ ಇಲ್ಲದ ಮೊದಲ ರಾಜ್ಯ ಯಾವುದು ಎಂದು ನಿಮಗೆ ತಿಳಿದಿದೆಯೇ? ಈ ಕುರಿತು ಶಿಕ್ಷಣ ಸಚಿವಾಲಯ ಅಧಿಕೃತ ಮಾಹಿತಿಯನ್ನು ಪ್ರಕಟಿಸಿದೆ.

ಈ ರಾಜ್ಯ ಮಿಜೋರಾಂ. ಈ ರಾಜ್ಯವು ಕೇರಳ ಸೇರಿದಂತೆ ಎಲ್ಲಾ ರಾಜ್ಯಗಳನ್ನು ಮೀರಿಸಿದೆ. ಭಾರತದ ಮೊದಲ ಸಂಪೂರ್ಣ ಸಾಕ್ಷರ ರಾಜ್ಯ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಹೌದು.. ಮಿಜೋರಾಂ 100% ಸಾಕ್ಷರತಾ ಪ್ರಮಾಣವನ್ನು ಸಾಧಿಸುವ ಮೂಲಕ ಭಾರತದ ಶಿಕ್ಷಣ ಕ್ಷೇತ್ರದಲ್ಲಿ ಹೊಸ ದಾಖಲೆಯನ್ನು ಸ್ಥಾಪಿಸಿದೆ.

ಈಗ ಮಿಜೋರಾಂನಲ್ಲಿ ಒಬ್ಬನೇ ಒಬ್ಬ ಅನಕ್ಷರಸ್ಥನೂ ಇಲ್ಲ. ರಾಜ್ಯದ ಪ್ರತಿಯೊಬ್ಬ ವ್ಯಕ್ತಿಯೂ (15 ವರ್ಷಕ್ಕಿಂತ ಮೇಲ್ಪಟ್ಟವರು) ಇದರಲ್ಲಿ ಸೇರಿದ್ದಾರೆ. ಅವರೆಲ್ಲರೂ ಓದಲು, ಬರೆಯಲು ಮತ್ತು ಗುಣಿಸಲು ಕಲಿತಿದ್ದಾರೆ. ಕೇಂದ್ರ ಶಿಕ್ಷಣ ಸಚಿವಾಲಯದ ಪ್ರಕಾರ, ಮಿಜೋರಾಂ “ಉಲ್ಲಾಸ್” ಅಂದ್ರೆ ನವಭಾರತ್ ಸಾಕ್ಷರತಾ ಕಾರ್ಯಕ್ರಮದ ಅಡಿಯಲ್ಲಿ ಈ ಸಾಧನೆ ಮಾಡಿದೆ ಎಂದು ಮಾಹಿತಿ ನೀಡಿದೆ. ಈ ಕೇಂದ್ರ ಸರ್ಕಾರದ ಯೋಜನೆಯು ಲಕ್ಷಾಂತರ ಜನರನ್ನು ಸಾಕ್ಷರರನ್ನಾಗಿ ಮಾಡುವಲ್ಲಿ ಪ್ರಮುಖ ಪಾತ್ರ ವಹಿಸಿದೆ.

3,026 ಅನಕ್ಷರಸ್ಥರನ್ನು ಗುರುತಿಸಲಾಗಿದೆ. ಇವರಲ್ಲಿ 1,692 ಜನರು ದೈನಂದಿನ ಅಧ್ಯಯನವನ್ನು ಪ್ರಾರಂಭಿಸಿದರು. ಇದಾದ ನಂತರ, ಸಾಕ್ಷರತೆಯ ಪ್ರಮಾಣವು 98.20% ತಲುಪಿತು. ಸರ್ಕಾರವು ವಿದ್ಯಾರ್ಥಿಗಳು, ಶಿಕ್ಷಕರು, ತಜ್ಞರು ಮತ್ತು ಕ್ಲಸ್ಟರ್ ಸಂಪನ್ಮೂಲ ಸಂಯೋಜಕರು ಸೇರಿದಂತೆ 292 ಸ್ವಯಂಸೇವಕರನ್ನು ನೇಮಿಸಿಕೊಂಡಿದೆ. ಈ ಕಾರ್ಯಕ್ರಮದಡಿಯಲ್ಲಿ ಲಡಾಖ್ ಈಗಾಗಲೇ ಸಂಪೂರ್ಣ ಸಾಕ್ಷರ ಆಡಳಿತ ವಿಭಾಗವಾಗಿದೆ.

ಭಾರತದಲ್ಲಿ ಅತಿ ಹೆಚ್ಚು ಸಾಕ್ಷರತೆ ಹೊಂದಿರುವ 5 ರಾಜ್ಯಗಳು : ಮಿಜೋರಾಂ: 100%, ಗೋವಾ: 99.9%, ಸಿಕ್ಕಿಂ: 99.9%, ಕೇರಳ: 96.2%, ದೆಹಲಿ: ಬಹುತೇಕ 95%. ಬಿಹಾರದ ಸಾಕ್ಷರತಾ ಪ್ರಮಾಣವು 91.9% ರಷ್ಟಿದ್ದು, ರಾಷ್ಟ್ರೀಯ ಸರಾಸರಿಗಿಂತ ಹಿಂದುಳಿದಿದೆ. 92.3% ಸಾಕ್ಷರತಾ ದರದೊಂದಿಗೆ, ಯುಪಿ ಬಿಹಾರಕ್ಕಿಂತ ಉತ್ತಮ ಸ್ಥಾನದಲ್ಲಿದೆ. 2011 ರ ಜನಗಣತಿಯ ಪ್ರಕಾರ, ಉತ್ತರಾಖಂಡದ ಸಾಕ್ಷರತಾ ಪ್ರಮಾಣವು 78.52% ಆಗಿದೆ. ಇತ್ತೀಚಿನ ಡೇಟಾ ಲಭ್ಯವಿಲ್ಲ.