ಬ್ರಹ್ಮಾಂಡದ ರಹಸ್ಯ ಭೇದಿಸಲು ಸಜ್ಜಾದ ವಿಶ್ವದ ಅತಿದೊಡ್ಡ ಡಿಜಿಟಲ್ ಕ್ಯಾಮೆರಾ!

ವಿಶ್ವದ ಅತಿದೊಡ್ಡ ಡಿಜಿಟಲ್‌ ಕೆಮರಾ ಎಂದು ಕರೆಯಲಾದ “ವೆರಾ ಸಿ.ರುಬಿನ್‌ ವೀಕ್ಷಣಾಲಯ’ದಲ್ಲಿನ “ಲೆಗಸಿ ಸರ್ವೇ ಆಫ್ ಸ್ಪೇಸ್‌ ಆಯಂಡ್‌ ಟೈಮ್‌’ (ಎಲ್‌ಎಸ್‌ಎಸ್‌ಟಿ) ಕೆಮರಾವು ಕಾರ್ಯಾಚರಣೆ ಪ್ರಾರಂಭಿಸಲು ಸಿದ್ಧವಾಗಿದ್ದು, ಈ ಕೆಮರಾದಲ್ಲಿ ತೆಗೆಯಲಾಗುವ ಮೊದಲ ಚಿತ್ರ ಜೂ.23ರಂದು ಬಿಡುಗಡೆಯಾಗಲಿದೆ.

ಆಕಾಶಕಾಯಗಳ ವಿಸ್ತೃತ ಹಾಗೂ ಉನ್ನತ ರೆಸಲ್ಯೂಶನ್‌ನ ದೃಶ್ಯಾವಳಿಗಳನ್ನು ಇದು ಸೆರೆಹಿಡಿಯುತ್ತದೆ. ಬ್ರಹ್ಮಾಂಡದ ರಚನೆ, ವಿಕಾಸ, ಕ್ಷೀರಪಥ, ಸೌರ ಮಂಡಲ, ಡಾರ್ಕ್‌ ಮ್ಯಾಟರ್‌ ಹಾಗೂ ಡಾರ್ಕ್‌ ಎನರ್ಜಿಯ ಸ್ವರೂಪಗಳ ಬಗೆಗಿನ ಹಲವು ರಹಸ್ಯಗಳನ್ನು ತೆರೆದಿಡಲು ಸಹಾಯಕವಾಗಲಿದೆ. ಈ ಮೂಲಕ ಖಗೋಳ ಶಾಸ್ತ್ರ ಹಾಗೂ ಕಾಸ್ಮಿಕ್‌ ವಿಜ್ಞಾನ ಕ್ಷೇತ್ರದಲ್ಲಿ ಕ್ರಾಂತಿಗೆ ಕಾರಣವಾಗಲಿದೆ. ಈ ಹಿನ್ನೆಲೆಯಲ್ಲಿ ಈ ಕೆಮರಾದ ಬಗ್ಗೆ ಇಲ್ಲಿದೆ ಮಾಹಿತಿ.

ಏನಿದು ಎಲ್‌ಎಸ್‌ಎಸ್‌ಟಿ ಕೆಮರಾ?
ಎಲ್‌ಎಸ್‌ಎಸ್‌ಟಿ ಕೆಮರಾ ಕೇವಲ ಒಂದು ಬೃಹತ್‌ ಖಗೋಳ ಸಾಧನ ಮಾತ್ರವಲ್ಲ. ಮುಂದಿನ 10 ವರ್ಷಗಳ ಈ ಸಾಧನದ ಕಾರ್ಯಾಚರಣೆಯ ಅವಧಿಯಲ್ಲಿ ಪ್ರತಿದಿನಕ್ಕೆ 1,000 ಚಿತ್ರಗಳಂತೆ ಭೂಮಿಯ ದಕ್ಷಿಣ ಭಾಗದ ಆಗಸದಿಂದ ಕಂಡು ಬರುವ ಬ್ರಹ್ಮಾಂಡದಲ್ಲಿನ ಸುಮಾರು 2,000 ಕೋಟಿ ನಕ್ಷತ್ರ ಪುಂಜ (ಗ್ಯಾಲಕ್ಸಿ)ಗಳ ನಕ್ಷೆ ರಚಿಸಿ, ಆಕಾಶಕಾಯಗಳ ಸಮಗ್ರ ಕ್ಯಾಟಲಾಗ್‌ ರಚಿಸುವ ಮಹೋದ್ದೇಶವಿದೆ. ವೀಕ್ಷಣಾಲಯದ ಸಿಮೊನಿ ಸರ್ವೇ ಟೆಲಿಸ್ಕೋಪ್‌ನಲ್ಲಿ ಜೋಡಿಸಲಾದ ಈ ಕೆಮರಾ, ದೊಡ್ಡ ಮಸೂರಗಳ ನೆರವಿನಿಂದ ಕಾಸ್ಮಿಕ್‌ ಬೆಳಕನ್ನು ಸಂಗ್ರಹಿಸಿ, ಬಳಿಕ ತನ್ನ ಶಕ್ತಿಶಾಲಿ ಸೆನ್ಸರ್‌ಗಳ ಮೂಲಕ ಅತ್ಯುತ್ತಮ ಗುಣಮಟ್ಟದ ಚಿತ್ರಗಳನ್ನು ಸೆರೆ ಹಿಡಿಯುತ್ತದೆ. ಇದರಿಂದಾಗಿ ಬಹುದೂರವಿರುವ ಆಕಾಶ ಗಂಗೆಗಳಗಳ ಜತೆಗೆ ಈವರೆಗೂ ಗುರುತಿಸಲಾಗದ ಸಮೀಪದ ಮಂದವಾದ ಪ್ರಕಾಶ ಹೊಂದಿರುವ ಆಕಾಶಕಾಯಗಳನ್ನು ಗುರುತಿಸಲು ನೆರವಾಗಲಿದೆ ಎನ್ನಲಾಗಿದೆ.

ಕೆಮರಾ ನಿರ್ಮಾಣಕ್ಕೆ 20 ವರ್ಷ ಶ್ರಮ
ಈ ಕೆಮರಾ ನಿರ್ಮಾಣದ ಹಿಂದೆ 2 ದಶಕಗಳ ಪರಿಶ್ರಮವಿದ್ದು, ಅಮೆರಿಕದ ಇಂಧನ ಇಲಾಖೆಯ ಸಹಕಾರದೊಂದಿಗೆ ಹಾಗೂ ವಿವಿಧ ವಿವಿಗಳ ತಜ್ಞರ ಮಾರ್ಗದರ್ಶನದೊಂದಿಗೆ ಕ್ಯಾಲಿಫೋರ್ನಿಯಾದ “ಎಸ್‌ಎಲ್‌ಎಸಿ ನ್ಯಾಶನಲ್‌ ಆಕ್ಸಿಲರೇಟರ್‌ ಪ್ರಯೋಗಾಲಯ’ದಲ್ಲಿ ನಿರ್ಮಿಸಲಾಗಿದೆ. ಈ ಕೆಮರಾದ ನಿರ್ಮಾಣ ಮುಗಿಯುತ್ತಿದ್ದಂತೆ 2024ರ ಮೇ ತಿಂಗಳಿನಲ್ಲಿ ಚಿಲಿಯ ಸೆರೋ ಪಚೋನ್‌ನ ಪರ್ವತ ಶ್ರೇಣಿಯ ನೆತ್ತಿಯಲ್ಲಿರುವ ವೆರಾ ಸಿ.ರುಬಿನ್‌ ವೀಕ್ಷಣಾಲಯದಲ್ಲಿ ಅಳವಡಿಸಲಾಯಿತು.

ಚಿಲಿ ರಾಷ್ಟ್ರದಲ್ಲೇ ಕೆಮರಾ ಸ್ಥಾಪನೆ ಯಾಕೆ?
ಕೆಮರಾವನ್ನು ಅಮೆರಿಕದಲ್ಲಿ ನಿರ್ಮಿಸಲಾಗಿದ್ದರೂ, ಭೂಮಿಯ ದಕ್ಷಿಣಾರ್ಧ ಗೋಳದಲ್ಲಿರುವ ಚಿಲಿ ರಾಷ್ಟ್ರದಲ್ಲಿ ಸ್ಥಾಪಿಸಲು ಹಲವು ನಿರ್ಣಾಯಕ ಅಂಶಗಳು ಕಾರಣವಾಗಿವೆ. ರಾತ್ರಿಯ ಹೊತ್ತಿನಲ್ಲಿ ಆಕಾಶಕಾಯಗಳು ಸ್ಪಷ್ಟವಾಗಿ ಕಾಣಬೇಕೆಂದಿದ್ದರೆ, ಆಕಾಶವು ಸಾಕಷ್ಟು ಶುಭ್ರವಾಗಿ ಹಾಗೂ ಕಗ್ಗತ್ತಲಿನಿಂದ ಕೂಡಿರಬೇಕಾದದ್ದು ಅತ್ಯಗತ್ಯ. ಹೀಗಾಗಿ ಕಡಿಮೆ ಜನ ನಿಬಿಡತೆ ಹೊಂದಿರುವ, ಅಟಾಕಾಮಾ ಮರುಭೂಮಿಯಲ್ಲಿರುವ ಸೆರೋ ಪಚೋನ್‌ ಪರ್ವತದ ನೆತ್ತಿಯ ಮೇಲೆ ಈ ಕೆಮರಾ ಸ್ಥಾಪಿಸಲಾಗಿದೆ. ಅಟಾಕಾಮಾದ ಶುಷ್ಕ ವಾತಾವರಣದಿಂದಾಗಿ ಶುಭ್ರ ಆಕಾಶ, ಕಡಿಮೆ ಜನನಿಬಿಡತೆಯಿಂದ ಕಡಿಮೆ ಬೆಳಕಿನ ಮಾಲಿನ್ಯ ಹಾಗೂ ಸಮುದ್ರ ಮಟ್ಟಕ್ಕಿಂತ 2,600 ಮೀ. ಎತ್ತರವಿರುವ ಪರ್ವತದಲ್ಲಿ ಸ್ಥಿತವಾಗಿರುವುದರಿಂದ ಕೆಮರಾ ಕಾರ್ಯಾಚರಣೆ ಸುಲಭವಾಗುತ್ತದೆ. ಅಲ್ಲದೆ ಉತ್ತರ ಗೋಳಾರ್ಧದ ವೀಕ್ಷಣಾಲಯಗಳಿಂದ ಗೋಚರಿಸದ ಆಕಾಶದ ಪ್ರದೇಶಗಳನ್ನು ದಕ್ಷಿಣಾರ್ಧಗೋಳದಲ್ಲಿರುವ ಈ ಕೆಮರಾದಿಂದ ಸೆರೆಹಿಡಿಯಬಹುದಾಗಿದೆ.

ಖಗೋಳ ವಿಜ್ಞಾನ ಕ್ಷೇತ್ರಕ್ಕೆ ಭರಪೂರ ಕೊಡುಗೆ
ಬ್ರಹ್ಮಾಂಡದ ನಕ್ಷೆ
ಬ್ರಹ್ಮಾಂಡದಲ್ಲಿನ 2000 ಕೋಟಿಗೂ ಹೆಚ್ಚಿನ ನಕ್ಷತ್ರಪುಂಜ (ಗ್ಯಾಲಕ್ಸಿ)ಗಳನ್ನು ಗುರುತಿಸಿ, ನಕ್ಷೆ ರಚಿಸಲಿದೆ. ಬ್ರಹ್ಮಾಂಡದ ರಚನೆ ಮತ್ತು ವಿಕಾಸವನ್ನು ಅರ್ಥೈಸಿಕೊಳ್ಳಲು ನೆರವಾಗಲಿದೆ.

ಡಾರ್ಕ್‌ ಮ್ಯಾಟರ್‌ ಮತ್ತು ಡಾರ್ಕ್‌ ಎನರ್ಜಿ
ಗ್ಯಾಲಕ್ಸಿಗಳ ಸ್ಥಿತಿಗತಿ ಹಾಗೂ ಚಲನೆಯನ್ನು ವೀಕ್ಷಿಸುವ ಮೂಲಕ, ಖಗೋಳ ವಿಜ್ಞಾನಿಗಳನ್ನು ಕಾಡುತ್ತಿರುವ ಕಪ್ಪು ದ್ರವ್ಯ (ಡಾರ್ಕ್‌ ಮ್ಯಾಟರ್‌)ದ ಬ್ರಹ್ಮಾಂಡವನ್ನು ಹಿಡಿದಿಟ್ಟುಕೊಳ್ಳುವ ಶಕ್ತಿಯನ್ನು ಹಾಗೂ ಬ್ರಹ್ಮಾಂಡವನ್ನು ಹಿಗ್ಗಿಸುತ್ತಿರುವ ಕಪ್ಪು ಶಕ್ತಿ (ಡಾರ್ಕ್‌ ಎನರ್ಜಿ)ಯ ರಹಸ್ಯಗಳ ಕಗ್ಗಂಟನ್ನು ಬಿಡಿಸಲು ಕೆಮರಾ ಒದಗಿಸುವ ನಿರ್ಣಾಯಕ ದತ್ತಾಂಶಗಳು ನೆರವಾಗಬಹುದು.

ಸೌರವ್ಯೂಹದ ಪರಿಶೋಧನೆ
ಕ್ಷುದ್ರಗ್ರಹಗಳು, ಧೂಮಕೇತುಗಳು ಮತ್ತು ಭೂಮಿಯ ಸಮೀಪದ ಇತರ ಆಕಾಶಕಾಯಗಳ ಮೇಲೆ ಕೆಮರಾ ಕಣ್ಣಿಡುವುದಲ್ಲದೆ, ಉಲ್ಕಾಪಾತದಂತಹ ಸಂಭಾವ್ಯ ಅಪಾಯಗಳನ್ನು ಮೊದಲೇ ಗುರುತಿಸಲು ಹಾಗೂ ಸೌರವ್ಯೂಹದ ಸೃಷ್ಟಿಯ ಬಗ್ಗೆ ತಿಳಿವಳಿಕೆ ಹೆಚ್ಚಲು ನೆರವಾಗಬಹುದು ಎನ್ನಲಾಗಿದೆ.

ಸಾರ್ವಜನಿಕರಿಗೂ ಮಾಹಿತಿ ಲಭ್ಯ
ಈ ಅನ್ವೇಷಣೆಯ ದತ್ತಾಂಶಗಳನ್ನು ಮುಕ್ತವಾಗಿ ಪಡೆಯಲು ಅವಕಾಶ ಕಲ್ಪಿಸಲಾಗಿದೆ (ಓಪನ್‌ ಡೇಟಾ ಆಕ್ಸೆಸ್‌). ಇದರಿಂದಾಗಿ ಶಿಕ್ಷಣ ಸಂಸ್ಥೆಗಳು, ಸಂಶೋಧನಾರ್ಥಿಗಳು ದತ್ತಾಂಶ ಪಡೆಯಲು ಅವಕಾಶ ದೊರೆಯುವುದರಿಂದ ಸಾರ್ವಜನಿಕರಲ್ಲಿ ವಿಜ್ಞಾನದ ಕುರಿತ ಆಸಕ್ತಿ ಹೆಚ್ಚುವ ನಿರೀಕ್ಷೆಯಿದೆ.

ಇತರ ಪ್ರಮುಖ ಬೃಹತ್‌ ಖಗೋಳ ಕೆಮರಾಗಳು

1.ಪಾನ್‌-ಸ್ಟಾರ್ 1 (1400ನ ಮೆಗಾಪಿಕ್ಸೆಲ್‌): ಅಮೆರಿಕ ನಿರ್ಮಿತ ಈ ಕೆಮರಾವನ್ನು ಹವಾಯಿಯ ಮೌಲಿ ದ್ವೀಪದ ಹಲೇಕಲ್ಹಾ ಪರ್ವತದ ಮೇಲೆ ಸ್ಥಾಪಿಸಲಾಗಿದೆ.

2.ಸುಬಾರು ಟೆಲಿಸ್ಕೋಪ್‌ನ ಹೈಪರ್‌ ಸುಪ್ರೀಂ ಕೆಮರಾ (870 ಮೆಗಾಪಿಕ್ಸೆಲ್‌): ಜಪಾನ್‌ ನಿರ್ಮಿತ ಈ ಕೆಮರಾವನ್ನು ಹವಾಯಿ ದ್ವೀಪದಲ್ಲಿ ಸ್ಥಾಪಿಸಲಾಗಿದೆ.

3. ಡಾರ್ಕ್‌ ಎನರ್ಜಿ ಕೆಮರಾ-ಡಿಇಕ್ಯಾಮ್‌ (570 ಮೆಗಾಪಿಕ್ಸೆಲ್‌): ಅಮೆರಿಕ ನೇತೃತ್ವದಲ್ಲಿ ವಿವಿಧ ರಾಷ್ಟ್ರಗಳು ನಿರ್ಮಿಸಿದ ಈ ಕೆಮರಾ ಚಿಲಿಯಲ್ಲಿ ಸ್ಥಾಪಿಸಲಾಗಿದೆ.

ಬೆಟ್ಟದಷ್ಟಿದೆ ಸವಾಲುಗಳು
ಉಪಗ್ರಹಗಳು ಅಡ್ಡಿ: ಭೂಮಿಯ ಸುತ್ತ ಪರಿಭ್ರಮಿಸುತ್ತಿರುವ ಕೃತಕ ಉಪಗ್ರಹಗಳು, ಆಕಾಶಕಾಯಗಳ ಚಿತ್ರ ತೆಗೆಯುವ ಕೆಮರಾಕ್ಕೆೆ ಅಡ್ಡಿಯಾಗಬಹುದು ಎನ್ನಲಾ ಗಿದೆ. ಕೆಮರಾದ ಸುಮಾರು ಶೇ.40ರಷ್ಟು ಚಿತ್ರಗಳಲ್ಲಿ ಉಪಗ್ರಹಗಳು ಅಡ್ಡಬರಬಹುದು ಎನ್ನಲಾಗಿದೆ. ಈ ಸಮಸ್ಯೆ ಕಡಿಮೆ ಮಾಡಲು ಖಗೋಳಶಾಸ್ತ್ರಜ್ಞರು ವಿಶಿಷ್ಟ ಆಲ್ಗಾರಿದಂಗಳನ್ನು ಅಭಿವೃದ್ಧಿಪಡಿಸುತ್ತಿದ್ದಾರೆ ಎನ್ನಲಾಗಿದೆ.

ದತ್ತಾಂಶ ನಿರ್ವಹಣೆ: ಈ ಕೆಮರಾವು ಪ್ರತಿದಿನ ತೆಗೆಯುವ ಚಿತ್ರಗಳ ಒಟ್ಟು ಗಾತ್ರ 15 ಟೆರಾಬೈಟ್‌ಗಳಷ್ಟಿರಲಿದ್ದು, ಇದರ ಸಂಗ್ರಹ, ಸಂಸ್ಕರಣೆ ವಿಶ್ಲೇಷಣೆ ಹಾಗೂ ಪ್ರಸರಣಗಳ ಸವಾಲು ಎದುರಾಗಬಲ್ಲುದಾಗಿದೆ.

ನಿರ್ವಹಣೆ: ಶುಷ್ಕ ವಾತಾವರಣ, ಭೂಕಂಪದಂತಹ ಹವಾಮಾನ ವೈಪರೀತ್ಯಗಳ ಪರಿಸರ ಸಂಬಂಧಿ ಸವಾಲುಗಳ ಜತೆಗೆ ಸೆನ್ಸರ್‌ಗಳನ್ನು 10 ವರ್ಷಗಳ ಕಾಲ ತಂಪಾಗಿರಿಸುವ ಅನಿವಾರ್ಯತೆಯನ್ನು ನಿರ್ವಹಿಸಬೇಕಾದ ಅಗತ್ಯವಿದೆ