‘ವರ್ಕ್ ಫ್ರಂ ಹೋಂ’ ಮೋಸಕ್ಕೆ 7.4 ಲಕ್ಷ! 8 ತಿಂಗಳ ಮಗುವಿನ ತಾಯಿ ಸೈಬರ್ ವಂಚಕರ ಬಲೆಗೆ

ಬೆಂಗಳೂರು: ಸಣ್ಣ ಮಗುವಿದೆ, ಮನೆಯಿಂದ ಹೊರಗೆ ಕೆಲಸ ಮಾಡೋದಕ್ಕಂತೂ ಸಾಧ್ಯ ಇಲ್ಲ.. ಯಾವ್ದಾದ್ರೂ ವರ್ಕ್‌ ಫ್ರಾಂ ಹೋಂ ಆಪ್ಷನ್ ಇದೆಯಾ ಅಂತ ಹುಡುಕಲು ಹೊರಟ ಬೆಂಗಳೂರಿನ ಮಹಿಳೆ ಸಿಕ್ಕಿಬಿದ್ದಿದ್ದು ನೇರ ಸೈಬರ್ ವಂಚಕರ ಬಲೆಗೆ.. ಹೌದು ಒಂದಲ್ಲ ಎರಡಲ್ಲ, ಲಕ್ಷಾಂತರ ರೂಪಾಯಿ ಕಳೆದುಕೊಂಡು ಮೋಸಕ್ಕೊಳಗಾಗಿದ್ದಾರೆ 8 ತಿಂಗಳ ಮಗುವಿರುವ ಬೆಂಗಳೂರಿನ ಮಹಿಳೆಯೊಬ್ಬರು.

ಸೈಬರ್ ವಂಚಕರ ವಂಚನೆ ಬಗ್ಗೆ ಅರಿವಾಗ್ತಿದ್ದಂತೆ ಅವರ ಪತಿ ಪೊಲೀಸರಿಗೆ ದೂರು ನೀಡಿದ್ದಾರೆ.

ವರ್ಕ್‌ ಫ್ರಾಂ ಹೋಂ ಆಮಿಷದ ಬಗ್ಗೆ ಇರಲಿ ಎಚ್ಚರ: ಅಷ್ಟಕ್ಕೂ ಆಗಿದ್ದೇನು?
ತನ್ನ ಆದಾಯ ಹೆಚ್ಚಿಸಿಕೊಳ್ಳಬೇಕು, ಪಾರ್ಟ್ ಟೈಂ ಕೆಲಸ ಯಾವ್ದಾದ್ರು ಬೇಕು ಎಂದು ಹುಡುಕುತಿದ್ದ ಮಹಿಳೆ ಮೇ 16 ರಂದು ಸಾಮಾಜಿಕ ಜಾಲತಾಣದಲ್ಲಿ ಕಂಡ ಜಾಹೀರಾತೊಂದನ್ನು ನಂಬಿ, ವಾಟ್ಸಾಪ್ ಲಿಂಕ್ ಮೂಲಕ ಸಂಪರ್ಕಿಸಿದ್ದಾರೆ. ಅದರಲ್ಲಿ ಮನೆಯಿಂದಲೇ ಕೆಲಸ ಮಾಡುವ ಅವಕಾಶದ ಬಗ್ಗೆ ಹೇಳಲಾಗಿತ್ತು. ಆ ಜಾಹೀರಾತಿನಲ್ಲಿ ಒಂದು ವಾಟ್ಸಾಪ್ ಲಿಂಕ್ ಇತ್ತು. ಕೆಲಸದ ಬಗ್ಗೆ ತಿಳಿದುಕೊಳ್ಳಲು ಆಕೆ ಆ ಲಿಂಕ್ ಅನ್ನು ಕ್ಲಿಕ್ ಮಾಡಿದ್ದಾರೆ. ಆಗ 7665115336 ಎಂಬ ಮೊಬೈಲ್ ಸಂಖ್ಯೆಯ ಜಯ ಎಂಬ ಮಹಿಳೆ ಸಂಪರ್ಕಿಸುತ್ತಾರೆ.

ಜಯಾ ಆಕೆಗೆ ಕೆಲಸ ಸುಲಭವಾಗಿದೆ ಎಂದು ಹೇಳಿ, ಕೆಲವು ಟಾಸ್ಕ್‌ಗಳನ್ನು ಕೊಡುತ್ತಾಳೆ. ಕೆಲವು ರೆಸ್ಟೋರೆಂಟ್‌ಗಳಿಗೆ ರೇಟಿಂಗ್ ಕೊಡುವ ಟಾಸ್ಕ್ ಎಂದು ಹೇಳಿ ಲಿಂಕ್‌ಗಳನ್ನು ಕಳುಹಿಸುತ್ತಾರೆ. ಆಕೆ ಅವುಗಳನ್ನು ರೇಟ್ ಮಾಡಬೇಕು. ಎಷ್ಟು ಟಾಸ್ಕ್ ಮಾಡುತ್ತಾರೋ ಅದರ ಪ್ರಕಾರ ಸಂಬಳ ಸಿಗುತ್ತದೆ ಎಂದು ಹೇಳಿದ್ದಳು.

ಜಯಾ ಆಕೆಗೆ ಟೆಲಿಗ್ರಾಮ್ ಲಿಂಕ್ ಮತ್ತು ಸ್ಯಾಲರಿ ಕೋಡ್ ಕೊಟ್ಟು, ನಂತರ ಆನಯಾ ಎಂಬಾಕೆಯನ್ನು ಸಂಪರ್ಕಿಸುವಂತೆ ತಿಳಿಸುತ್ತಾಳೆ. ಆನಯಾ @anyaa55554023 ಎಂಬ ಟೆಲಿಗ್ರಾಮ್ ಐಡಿಯಿಂದ ಸಂಪರ್ಕದಲ್ಲಿರುತ್ತಾಳೆ. ಆನಯಾ ಪ್ರತಿದಿನ 20 ಟಾಸ್ಕ್‌ಗಳನ್ನು ಕೊಟ್ಟು ಅವುಗಳನ್ನು ಪೂರ್ಣಗೊಳಿಸಿದ ನಂತರ ಸಂಬಳ ಸಿಗುತ್ತದೆ ಎಂದು ಹೇಳಿದ್ದಾಳೆ.

ಆನಯಾ ಆಕೆಯನ್ನು ‘ಸೂಪರ್ ಗ್ರೂಪ್ [885]’ ಎಂಬ ಟೆಲಿಗ್ರಾಮ್ ಗ್ರೂಪ್‌ಗೆ ಸೇರಿಸುತ್ತಾಳೆ. ಆ ಗ್ರೂಪ್‌ನಲ್ಲಿ ಮೂರ್ನಾಲ್ಕು ಟಾಸ್ಕ್‌ಗಳನ್ನು ನೀಡಲಾಗುತ್ತಿತ್ತು. ದೂರುದಾರನ ಪತ್ನಿ ಟಾಸ್ಕ್ ಲಿಂಕ್‌ಗಳ ಮೇಲೆ ಕ್ಲಿಕ್ ಮಾಡಿ ರೇಟಿಂಗ್ ನೀಡಲು ಪ್ರಾರಂಭಿಸಿದ್ದಾರೆ. ಪ್ರತಿ ಟಾಸ್ಕ್‌ಗೆ 1,000 ರೂಪಾಯಿ ಪಾವತಿಸಬೇಕಿತ್ತು. ‘hyh818.pro’ ಎಂಬ ಆಯಪ್‌ನಲ್ಲಿ “ಹೂಡಿಕೆ” ಮಾಡಬೇಕೆಂದು ತಿಳಿಸಲಾಯಿತು. ಟಾಸ್ಕ್ ಪೂರ್ಣಗೊಳಿಸಿದ ನಂತರ 1,300 ರೂಪಾಯಿ ಸಿಗುತ್ತದೆ ಎಂದು ಭರವಸೆ ನೀಡಲಾಗಿತ್ತು. ಅದರಂತೆ, ಆಕೆ ಟಾಸ್ಕ್ ಯಶಸ್ವಿಯಾಗಿ ಪೂರ್ಣಗೊಳಿಸಿದ ನಂತರ, ವಂಚಕರು ಆಕೆಯ ಖಾತೆಗೆ 1,300 ರೂಪಾಯಿ ಜಮಾ ಮಾಡಿದರು. ಆರಂಭದಲ್ಲಿ ಆಕೆ ಆ ಹಣವನ್ನು ಆಯಪ್ ಮೂಲಕ ವಾಪಾಸ್ ಕೂಡಾ ಪಡೆದಿದ್ದಳು.

ನಂತರ, ಕ್ರಿಪ್ಟೋಕರೆನ್ಸಿಗಳಲ್ಲಿ ಹೂಡಿಕೆ ಮಾಡಿದರೆ ಹೆಚ್ಚಿನ ಲಾಭ ಸಿಗುತ್ತದೆ ಎಂದು ಆನಯಾ ಮಾತು ಕೇಳಿ, ಅದರಲ್ಲಿ ಹಣ ಹೂಡಿಕೆ ಮಾಡಲು ಆಕೆ ಒಪ್ಪಿಕೊಂಡಳು. ಆಕೆ ಕ್ರಿಪ್ಟೋಗಳಲ್ಲಿ ಹಣವನ್ನು “ಹೂಡಿಕೆ” ಕೂಡಾ ಮಾಡುತ್ತಾರೆ. ಆದ್ರೆ ಆಕೆಯು ಹಣ ತಪ್ಪು ವಿಭಾಗದಲ್ಲಿ ಹೂಡಿಕೆ ಮಾಡಿದ್ದಾರೆ, ಇದನ್ನು ಹಿಂಪಡೆಯಲು, ಆಕೆ ಇನ್ನಷ್ಟು ಹಣವನ್ನು ಸೇರಿಸಬೇಕೆಂದು ಒತ್ತಡ ಹಾಕುತ್ತಾಳೆ. ಇನ್ನು ಈ ತಪ್ಪಿನಿಂದಾಗಿ ಆಪ್‌ನಲ್ಲಿ ಕ್ರೆಡಿಟ್ ಸ್ಕೋರ್ ಕೂಡಾ 100 ಕ್ಕಿಂತ ಕಡಿಮೆ ಇದೆ ಎಂದು ವಂಚಕರು ಹೇಳಿ ಹೆದರಿಸಿದ್ದಾರೆ. ಬಳಿಕ ಸ್ಕೋರ್ ಹೆಚ್ಚಿಸಬೇಕಾದರೆ, 100, ಆಕೆ ಇನ್ನಷ್ಟು ಹಣವನ್ನು ಸೇರಿಸಬೇಕೆಂದು ವಂಚಿಸಿದ್ದಾರೆ,

ಆಗ ಆ ದಂಪತಿ 2.5 ಲಕ್ಷ ರೂಪಾಯಿ, 49,000 ರೂಪಾಯಿ, 10,000 ರೂಪಾಯಿ ಮತ್ತು 4.31 ಲಕ್ಷ ರೂಪಾಯಿಗಳನ್ನು ವಂಚಕರು ನೀಡಿದ ನಾಲ್ಕು ಬ್ಯಾಂಕ್ ಖಾತೆಗಳಿಗೆ ವರ್ಗಾಯಿಸಿದ್ದಾರೆ. ಒಟ್ಟು 7.4 ಲಕ್ಷ ರೂಪಾಯಿ ವರ್ಗಾಯಿಸಿದ ನಂತರ, ವಂಚಕರು ಇನ್ನಷ್ಟು ಹಣವನ್ನು ಕೇಳಿದಾಗ, ದಂಪತಿಗೆ ತಾವು ಮೋಸ ಹೋಗುತ್ತಿದ್ದೇವೆ ಎಂದು ಅರಿವಾಗಿದೆ. ಕೂಡಲೇ ಹಣ ಪಾವತಿಸುವುದನ್ನು ನಿಲ್ಲಿಸಿದ್ದಾರೆ,

ಈ ಬಗ್ಗೆ ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದು, ಮಾಹಿತಿ ತಂತ್ರಜ್ಞಾನ ಕಾಯ್ದೆ ಮತ್ತು ಭಾರತೀಯ ನ್ಯಾಯ ಸಂಹಿತೆ (BNS) ಸೆಕ್ಷನ್ 318 (ವಂಚನೆ) ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ವಂಚಕರ ಬ್ಯಾಂಕ್ ಖಾತೆಗಳಿಂದ ಹಣವನ್ನು ಫ್ರೀಜ್ ಮಾಡುವ ಪ್ರಕ್ರಿಯೆ ನಡೆಯುತ್ತಿದೆ ಎಂದು ತಿಳಿಸಿದ್ದಾರೆ.

ಇಂತಹ ಆನ್‌ಲೈನ್ ವಂಚನೆಗಳ ಬಗ್ಗೆ ಎಚ್ಚರಿಕೆ ವಹಿಸುವುದು ಬಹಳ ಮುಖ್ಯ. ಅಪರಿಚಿತ ಲಿಂಕ್‌ಗಳನ್ನು ಕ್ಲಿಕ್ ಮಾಡಬೇಡಿ. ಸುಲಭವಾಗಿ ಹಣ ಗಳಿಸುವ ಆಮಿಷಗಳಿಗೆ ಬಲಿಯಾಗಬೇಡಿ. ನಿಮ್ಮ ವೈಯಕ್ತಿಕ ಮತ್ತು ಆರ್ಥಿಕ ಮಾಹಿತಿಯನ್ನು ಯಾರೊಂದಿಗೂ ಹಂಚಿಕೊಳ್ಳಬೇಡಿ. ಅನುಮಾನಾಸ್ಪದ ಚಟುವಟಿಕೆ ಕಂಡುಬಂದರೆ ತಕ್ಷಣ ಪೊಲೀಸರಿಗೆ ದೂರು ನೀಡಿ.