2025 ಏಪ್ರಿಲ್‌ನಲ್ಲಿ ನಿರುದ್ಯೋಗ ಶೇ. 5.1: MOSPI ಮಾಸಿಕ ಸಮೀಕ್ಷೆ ಬಿಡುಗಡೆ

ಅಂಕಿಅಂಶ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯ (MOSPI) ನಡೆಸಿದ ಮೊದಲ ಮಾಸಿಕ ಉದ್ಯೋಗ ಸಮೀಕ್ಷೆಯ ಪ್ರಕಾರ, 2025ರ ಏಪ್ರಿಲ್ ತಿಂಗಳಲ್ಲಿ ಭಾರತದ ಮಾಸಿಕ ನಿರುದ್ಯೋಗ ದರವು ಶೇ. 5.1 ರಷ್ಟಿತ್ತು ಎಂದು ತಿಳಿದುಬಂದಿದೆ.

ಈ ಹಿಂದೆ ಪ್ರಕಟವಾದ ತ್ರೈಮಾಸಿಕ ಮತ್ತು ವಾರ್ಷಿಕ ವರದಿಗಳಿಗೆ ಹೋಲಿಸಿದರೆ, ಈ ದತ್ತಾಂಶವು ಉದ್ಯೋಗವನ್ನು ಮೇಲ್ವಿಚಾರಣೆ ಮಾಡುವಲ್ಲಿ ಗಮನಾರ್ಹ ಬದಲಾವಣೆಗೆ ಕಾರಣವಾಗಿದೆ. ಸಚಿವಾಲಯವು ಪಿರಿಯಡ್ ಲೇಬರ್ ಫೋರ್ಸ್ ಸರ್ವೇ (PLFS) ಅನ್ನು ಪ್ರಾರಂಭಿಸಿದ್ದು, ಇದು ನೈಜ ಸಮಯದ ಒಳನೋಟಗಳನ್ನು ನೀಡುವ ನಿರುದ್ಯೋಗಿಗಳ ಪ್ರಮಾಣವನ್ನು ಅಳೆಯುವಲ್ಲಿ ಕೊಡುಗೆ ನೀಡಿದೆ.

ಉದ್ಯೋಗ ಸಮೀಕ್ಷೆಯನ್ನು ಹೇಗೆ ನಡೆಸಲಾಗುತ್ತದೆ?

ಪ್ರಸ್ತುತ ಸಾಪ್ತಾಹಿಕ ಸ್ಥಿತಿ (CWS) ಯ ಆಧಾರದ ಮೇಲೆ ಈ ಸಮೀಕ್ಷೆಯು ಹಿಂದಿನ ಏಳು ದಿನಗಳನ್ನು ಉಲ್ಲೇಖವಾಗಿ ಬಳಸುತ್ತದೆ. ಅದರ ಆಧಾರದ ಮೇಲೆ 2025ರ ಏಪ್ರಿಲ್ನಲ್ಲಿ ಎಲ್ಲ ವಯೋಮಾನದವರಲ್ಲಿ ಶೇ. 5.1 ರಷ್ಟು ಜನರು ನಿರುದ್ಯೋಗಿಗಳಾಗಿದ್ದರು ಎಂದು ತಿಳಿದುಬಂದಿದೆ. ಇದರಲ್ಲಿ ಮಹಿಳೆಯ ಪ್ರಮಾಣ ಶೇ. 5 ರಷ್ಟಿದ್ದರೆ, ಇದಕ್ಕೆ ವ್ಯತಿರಿಕ್ತವಾಗಿ ಪುರುಷರು 5.2% ರಷ್ಟು ಮಾಸಿಕ ನಿರುದ್ಯೋಗ ದರವನ್ನು ಹೊಂದಿದ್ದರು.

ಮಾಸಿಕ ನಿರುದ್ಯೋಗ ದರದ ಡೇಟಾ

15 ರಿಂದ 29 ವರ್ಷ ವಯಸ್ಸಿನವರಲ್ಲಿ, ಯುವಜನರಲ್ಲಿ ಒಟ್ಟಾರೆ ನಿರುದ್ಯೋಗ ದರವು ಗಮನಾರ್ಹವಾಗಿ ಹೆಚ್ಚಾಗಿದೆ. ಇದರ ಪ್ರಮಾಣ ಶೇ. 13.8 ರಷ್ಟಿದೆ. ಅದೇ ವಯಸ್ಸಿನ ಗುಂಪಿನಲ್ಲಿ ಮಹಿಳೆಯರು ನಿರುದ್ಯೋಗದ ಪ್ರಮಾಣವು 14.4% ರಷ್ಟಿದೆ. ಕುತೂಹಲಕಾರಿ ಸಂಗತಿ ಏನೆಂದರೆ, ಮಾಸಿಕ ನಿರುದ್ಯೋಗ ಸಮೀಕ್ಷೆ ಪ್ರಕಾರ, ಗ್ರಾಮೀಣ ಪ್ರದೇಶಗಳಿಗೆ ಹೋಲಿಕೆ ಮಾಡಿದರೆ, ನಗರ ಪ್ರದೇಶಗಳಲ್ಲಿ ನಿರುದ್ಯೋಗ ದರ ಹೆಚ್ಚಿದೆ. ನಗರ ಪ್ರದೇಶಗಳಲ್ಲಿ 17.2% ರಷ್ಟಿದ್ದರೆ, ಗ್ರಾಮೀಣ ಭಾಗದಲ್ಲಿ ಮಾಸಿಕ ನಿರುದ್ಯೋಗ ಪ್ರಮಾಣ 12.3% ರಷ್ಟಿದೆ.

ಕಾರ್ಮಿಕ ಬಲ ಭಾಗವಹಿಸುವಿಕೆ ದರ (LFPR)

2025ರ ಏಪ್ರಿಲ್ ತಿಂಗಳಲ್ಲಿ 15 ವರ್ಷ ಮತ್ತು ಅದಕ್ಕಿಂತ ಮೇಲ್ಪಟ್ಟ ವಯಸ್ಸಿನ ವ್ಯಕ್ತಿಗಳ ಕಾರ್ಮಿಕ ಬಲ ಭಾಗವಹಿಸುವಿಕೆಯ ದರ (LFPR) 55.6% ರಷ್ಟಿತ್ತು. ಗ್ರಾಮೀಣ ಪ್ರದೇಶಗಳಲ್ಲಿ ನಗರ ಪ್ರದೇಶಗಳ 50.7% ಕ್ಕೆ ಹೋಲಿಸಿದರೆ 58% ರಷ್ಟು ಹೆಚ್ಚಿನ ದರವನ್ನು ಹೊಂದಿದೆ. ಗ್ರಾಮೀಣ ಪ್ರದೇಶದ ಪುರುಷರಲ್ಲಿ ಕಾರ್ಮಿಕ ಬಲ ಭಾಗವಹಿಸುವಿಕೆಯ ದರ ಶೇ. 79 ರಷ್ಟಿದ್ದರೆ, ನಗರ ಪ್ರದೇಶಗಳಲ್ಲಿ ಶೇ. 75.3 ರಷ್ಟಿತ್ತು. ಇದಕ್ಕೆ ವ್ಯತಿರಿಕ್ತವಾಗಿ, ಗ್ರಾಮೀಣ ಪ್ರದೇಶಗಳಲ್ಲಿ ಮಹಿಳಾ ಭಾಗವಹಿಸುವಿಕೆ ದರ ಗಮನಾರ್ಹವಾಗಿ ಕಡಿಮೆಯಾಗಿದ್ದು, ಶೇ. 38.2 ರಷ್ಟಿದೆ.

ಅಂದಹಾಗೆ, ನಗರ ಮತ್ತು ಗ್ರಾಮೀಣ ಡೇಟಾವನ್ನು ಒಳಗೊಂಡ ಮೊದಲ ಸಮಗ್ರ ವರದಿಯನ್ನು ಆಗಸ್ಟ್‌ನಲ್ಲಿ ಬಿಡುಗಡೆ ಮಾಡಲು ಅಂಕಿಅಂಶ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯ ನಿರ್ಧರಿಸಿದೆ.