ಎರಡನೇ ಅಧಿಕೃತ ಭಾಷೆಯಾಗಿ ತುಳು ಸೇರ್ಪಡೆ? ಕರಾವಳಿಗರಲ್ಲಿ ಹೆಚ್ಚಿದ ನಿರೀಕ್ಷೆ

ಬಂಟ್ವಾಳ: ರಾಜ್ಯದ ಅಧಿಕೃತ ಭಾಷೆ ಕನ್ನಡ. ಹೆಚ್ಚುವರಿ ಅಧಿಕೃತ ಭಾಷೆ ಇಂಗ್ಲಿಷ್‌. ಇದೀಗ ಹೆಚ್ಚುವರಿ ಅಧಿಕೃತ ಭಾಷೆಯನ್ನಾಗಿ ಪಂಚದ್ರಾವಿಡ ಭಾಷೆಗಳಲ್ಲಿ ಪ್ರಾಚೀನ ಭಾಷೆಯಾಗಿರುವ ತುಳುವನ್ನು ಸೇರ್ಪಡೆ ಮಾಡಬೇಕು ಎಂಬ ಒತ್ತಾಯಕ್ಕೆ ಬಲ ಬಂದಿದೆ. ವಿಧಾನಸಭೆಯ ಬಜೆಟ್‌ ಅಧಿವೇಶನದಲ್ಲಿ ಕರಾವಳಿಯ ಕುರಿತು ನಡೆದ ಪ್ರತ್ಯೇಕ ಚರ್ಚೆಯಲ್ಲಿಈ ಭಾಗದ ಶಾಸಕರು ಕರಾವಳಿಯ ಸಮಸ್ಯೆಗಳ ಜತೆಗೆ ತುಳು ಹೆಚ್ಚುವರಿ(ಎರಡನೇ) ಅಧಿಕೃತ ರಾಜ್ಯ ಭಾಷೆಯ ಗೌರವ ಪಡೆಯಬೇಕು ಎಂಬ ವಿಚಾರವನ್ನು ಒತ್ತಿ ಹೇಳಿದ್ದಾರೆ. ಪುತ್ತೂರು ಶಾಸಕ ಅಶೋಕ್‌ ರೈ ತುಳು ಭಾಷೆಯಲ್ಲೇ ಮಾತನಾಡಿ, ತುಳು ಭಾಷೆಯನ್ನು ಎರಡನೇ ಅಧಿಕೃತ ಭಾಷೆಯನ್ನಾಗಿಸಬೇಕು ಎಂದು ಹೇಳುವ ಮೂಲಕ ಕಳೆದ ಬಾರಿ ಗಮನ ಸೆಳೆದಿದ್ದರು. ಇದೀಗ ಕರಾವಳಿಯ ಎಲ್ಲ ಶಾಸಕರು ಈ ವಿಚಾರದ ಕುರಿತು ಬೆಳಕು ಚೆಲ್ಲಿದ್ದಾರೆ. ಸ್ಪೀಕರ್‌ ಯು.ಟಿ.ಖಾದರ್‌ ಕರಾವಳಿಯವರೇ ಆದದ್ದು ಹೆಚ್ಚಿನ ನಿರೀಕ್ಷೆ ಹುಟ್ಟಿಸಿದೆ. ಕೆಲ ದಿನಗಳ ಹಿಂದೆ ಉಳ್ಳಾಲದಲ್ಲಿ ನಡೆದ ಕಂಬಳ ಕಾರ್ಯಕ್ರಮವೊಂದಕ್ಕೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಬಂದಿದ್ದರು. ಈ ವೇಳೆ ಅವರು ತುಳು ಭಾಷೆಯನ್ನು ರಾಜ್ಯದ ಎರಡನೇ ಅಧಿಕೃತ ಭಾಷೆಯನ್ನಾಗಿ ಮಾಡುವ ಪ್ರಸ್ತಾಪವನ್ನು ಸರಕಾರ ಗಂಭೀರವಾಗಿ ಪರಿಗಣಿಸಲಿದೆ ಎಂದು ಹೇಳಿದ್ದರು. ಮೌಖಿಕವಾಗಿ ಸಾವಿರಾರು ವರ್ಷಗಳಿಂದ ಬೆಳೆದು ಬಂದ ಭಾಷೆ ತುಳು. ಭಾರತದ ಮಹಾರಾಷ್ಟ್ರ, ಗುಜರಾತ್‌, ದಿಲ್ಲಿ, ಕರ್ನಾಟಕದ ನಾನಾ ಭಾಗಗಳು, ತಮಿಳುನಾಡು, ಕೇರಳ ಹಾಗೂ ಗಲ್ಫ್‌ ದೇಶಗಳ ಸಹಿತ ತುಳು ಭಾಷೆ ಗಡಿ ದಾಟಿ ಬೆಳೆದಿದೆ. ಸಾಗರೋತ್ತರದಲ್ಲೂ ತುಳು ಸಂಘಗಳಿವೆ. ತುಳು ಭಾಷಿಕರು ದೇಶ, ವಿದೇಶಗಳಲ್ಲಿ ಉದ್ಯಮಗಳನ್ನು ಕಟ್ಟಿ ಬೆಳೆಸಿದ್ದಲ್ಲದೆ, ಭಾಷೆಯನ್ನೂ ಕೊಂಡೊಯ್ದು ಬೆಳೆಸಿದ್ದಾರೆ. ಕರಾವಳಿಯಲ್ಲಿ ಕನ್ನಡ ಪ್ರಧಾನ ಭಾಷೆಯಾಗಿದ್ದರೂ ತುಳು ಸಂಪರ್ಕ ಭಾಷೆಯಾಗಿ ಗಮನ ಸೆಳೆದಿದೆ. ಎಲ್ಲರ ವ್ಯಾವಹಾರಿಕ ಭಾಷೆಯಾಗಿ ತುಳು ಬೆಸೆದುಕೊಂಡಿದ್ದಷ್ಟೇ ಅಲ್ಲ, ಕನ್ನಡದೊಂದಿಗೆ ಸೌಹಾರ್ದ ಸಂಬಂಧ ಉಳಿಸಿಕೊಂಡಿದೆ. ಒಂದು ಅಂದಾಜಿನ ಪ್ರಕಾರ ವಿಶ್ವದಾದ್ಯಂತ ಒಂದು ಕೋಟಿ ಜನಸಂಖ್ಯೆಯಷ್ಟು ತುಳು ಮಾತನಾಡುವವರು ಇದ್ದಾರೆ ಎಂದು ಕರಾವಳಿಗರನ್ನು ಪರಿಗಣಿಸಿ ಹೇಳಲಾಗುತ್ತಿದ್ದರೂ ಜನಗಣತಿ ಸಂದರ್ಭ ಕಾಲಂಗಳಲ್ಲಿ ಮಾತೃ ಭಾಷೆ ತುಳು ಎಂದು ಹಾಕಿದರಷ್ಟೇ ಅಧಿಕೃತ ಲೆಕ್ಕ. ಭಾಷೆ ಕುರಿತ ಪ್ರಯತ್ನಗಳು
ತುಳು ಭಾಷೆಯನ್ನು ರಾಜ್ಯದಲ್ಲಿ ಹೆಚ್ಚುವರಿ ಭಾಷೆಯನ್ನಾಗಿಸುವ ಪ್ರಯತ್ನಗಳನ್ನು ಆರಂಭದಿಂದಲೇ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಮಾಡುತ್ತಾ ಬಂದಿದೆ. ಕಾಲಕಾಲಕ್ಕೆ ಈ ಕುರಿತ ಪೂರಕ ವಿಚಾರಗಳನ್ನು ಒದಗಿಸಿ, ಸರಕಾರದ ಮೇಲೆ ಒತ್ತಡ ಹೇರುತ್ತಾ ಬಂದಿದೆ. ಒತ್ತಡಗಳು ಜಾಸ್ತಿಯಾದ ವೇಳೆ ಕಳೆದ ಸರಕಾರದ ಅವಧಿಯಲ್ಲಿ ಡಾ.ಎಂ.ಮೋಹನ ಆಳ್ವ ನೇತೃತ್ವದಲ್ಲಿ ತಜ್ಞರ ಸಮಿತಿಯನ್ನೂ ರಚಿಸಲಾಗಿತ್ತು. ಶಿಫಾರಸುಗಳನ್ನು ಆ ಸರಕಾರವಿದ್ದಾಗಲೇ ನೀಡಿದ್ದರು. 2ನೇ ಅಧಿಕೃತ ಭಾಷೆಯಾದರೆ ಲಾಭವೇನು?
ಸಾಮಾನ್ಯವಾಗಿ ಎಲ್ಲರಿಗೂ ಕುತೂಹಲವಿರುವುದು ತುಳು ಭಾಷೆಯನ್ನು ಎರಡನೇ ಅಧಿಕೃತ ಭಾಷೆಯನ್ನಾಗಿ ಪರಿಗಣಿಸಿದರೆ, ಲಾಭವೇನು? ಸರಕಾರಿ ಆದೇಶಗಳು ಕನ್ನಡ ಹಾಗೂ ತುಳುವಿನಲ್ಲಿ ಬರಬಹುದು. ಕನ್ನಡದ ಹಾಗೆ ಒಂದನೇ ತರಗತಿಯಿಂದ ತುಳು ಭಾಷೆಯನ್ನು ಐಚ್ಛಿಕವಾಗಿ ಓದಲು ಅವಕಾಶ ದೊರೆಯುತ್ತದೆ. ಸ್ಥಳೀಯ ಸಭೆ, ಆದೇಶಗಳನ್ನು ತುಳುವಿನಲ್ಲೂ ಮಾಡುವ ಆಯ್ಕೆ ದೊರೆಯುತ್ತದೆ.

ವಿಧಾನ ಮಂಡಲದಲ್ಲಿ ತುಳುವಿನಲ್ಲಿ ಲಿಖಿತ ಪ್ರಶ್ನೆ ಕೇಳಿ ಉತ್ತರ ಪಡೆಯಬಹುದು. ಇದು ಆಡಳಿತಾತ್ಮಕ ವಿಚಾರವಾದರೆ, ತುಳು ರಂಗಭೂಮಿ, ಚಿತ್ರೋದ್ಯಮ, ಸಾಹಿತ್ಯಕ್ಕೆ ಹೆಚ್ಚಿನ ಮನ್ನಣೆ ದೊರೆಯುವ ಅವಕಾಶವಿದೆ. ಎಲ್ಲಕ್ಕಿಂತ ಹೆಚ್ಚು ಜಾಗತಿಕವಾಗಿ ತೆರೆದುಕೊಂಡಿರುವ ಲಕ್ಷಾಂತರ ತುಳು ಭಾಷಿಕರ ಹೆಮ್ಮೆಯ, ಅಭಿಮಾನದ ಸಂಕೇತವಾದ ತುಳು ಭಾಷೆಯ ಗೌರವ ಇಮ್ಮಡಿಗೊಳ್ಳುವುದಂತೂ ಖಚಿತ.