ಜಗತ್ತಿನಲ್ಲಿ ಹೆಚ್ಚು ದ್ವೇಷಿಸಲ್ಪಡುವ 10 ರಾಷ್ಟ್ರಗಳು: ಚೀನಾ ಮುಂಚೂಣಿಯಲ್ಲಿ

ನಮಗೆ ನಮ್ಮ ದೇಶವೇ ಇಷ್ಟ..ಇಲ್ಲೇ ಸುಖʼ- ಎಂಬ ಮಾತನ್ನ ಪ್ರತಿ ದೇಶದ ನಾಗರಿಕರೂ ತಮ್ಮ ರಾಷ್ಟ್ರಗಳ ಬಗ್ಗೆ ಹೆಮ್ಮೆಯಿಂದ ಹೇಳಿಕೊಳ್ತಾರೆ. ಯಾವ ದೇಶ ಇಷ್ಟವಿಲ್ಲ?-ಯಾವ ದೇಶ ಅಂದ್ರೆ ದ್ವೇಷ?-ಯಾವ ದೇಶಕ್ಕೆ ಹೋಗೋಕೆ ಇಷ್ಟನೇ ಇಲ್ಲ?-ಇಂಥ ಪ್ರಶ್ನೆಗಳಿಗೂ ಸುಲಭವಾಗಿ ನಾವು ಉತ್ತರ ಕೊಡಬಹುದು.

ʼಈ ಜಗತ್ತಿನಲ್ಲಿ ನೀವು ದ್ವೇಷಿಸುವ ರಾಷ್ಟ್ರ ಯಾವುದು?ʼ ಎಂದು ಭಾರತೀಯರನ್ನ ಕೇಳಿದ್ರೆ ಬಹುಶಃ ಪಾಕಿಸ್ತಾನ ಎನ್ನುವ ಉತ್ತರ ಮೊದಲು ಬರುತ್ತದೆ. ಇನ್ನೂ ಕೆಲವರು ಚೀನಾ ಎನ್ನಬಹುದು…!

ಜಗತ್ತಿನಲ್ಲಿ ಅತ್ಯಂತ ಹೆಚ್ಚು ದ್ವೇಷಿಸಲ್ಪಡುವ ರಾಷ್ಟ್ರ ಯಾವುದು?

ಡಿಜಿಟಲ್‌ ಯುಗದಲ್ಲಿ ಜಗತ್ತು ಒಂದು ʼಜಾಗತಿಕ ಗ್ರಾಮʼ ಎಂಬಂತೆ ಭಾಸವಾಗುತ್ತಿದೆ. ಆದರೆ ಜೊತೆಜೊತೆಗೆ ಒಂದು ದೇಶದವರು ಇನ್ನೊಂದು ದೇಶವನ್ನ, ದೇಶದ ಜನರನ್ನ ದ್ವೇಷಿಸುವ, ಕಿಡಿಕಾರುವ ಪ್ರವೃತ್ತಿಯೂ ಹೆಚ್ಚುತ್ತಿದೆ. ದೇಶ-ದೇಶಗಳ ಮಧ್ಯೆ ವೈರತ್ವ ಸಹಜವೇ ಆದರೂ ಈಗೀಗ ಜನಸಾಮಾನ್ಯರೂ ಕೂಡ ಇನ್ನೊಂದು ದೇಶದ ಬಗ್ಗೆ ತಮಗಿರುವ ಸಿಟ್ಟು-ಅಸಹ್ಯವನ್ನ ಮುಕ್ತವಾಗಿ ಹೇಳಿಕೊಳ್ಳುವ ಪರಿಪಾಠ ಜಾಸ್ತಿಯಾಗಿದೆ.ಇತ್ತೀಚೆಗೆ ವರ್ಲ್ಡ್‌ ಪಾಪ್ಯುಲೇಶನ್‌ ರಿವಿವ್ಯೂ ವರದಿಯ ಆಧಾರದ ಮೇಲೆ ನ್ಯೂಸ್‌ವೀಕ್‌ (ಅಮೆರಿಕದ ಮ್ಯಾಗ್‌ಜಿನ್‌) ಒಂದು ನಕ್ಷೆಯನ್ನ ಬಿಡುಗಡೆ ಮಾಡಿದೆ. ಜಗತ್ತಿನಲ್ಲಿ ಅತ್ಯಂತ ಹೆಚ್ಚು ದ್ವೇಷಿಸಲ್ಪಡುವ ರಾಷ್ಟ್ರಗಳು ಯಾವವು ಎಂಬುದನ್ನ ಇದರಲ್ಲಿ ಲಿಸ್ಟ್‌ ಮಾಡಲಾಗಿದೆ. ಟಾಪ್‌ 10 ದೇಶಗಳ ಹೆಸರನ್ನ ಬಿಡುಗಡೆ ಮಾಡಿದ್ದು, ಅದರಲ್ಲಿ ಭಾರತ ಇಲ್ವೇ ಇಲ್ಲ..!ಅಂದಹಾಗೇ, ಜಗತ್ತಿನಲ್ಲಿಯೇ ಅತ್ಯಂತ ಹೆಚ್ಚು ದ್ವೇಷಿಸಲ್ಪಡುವ ರಾಷ್ಟ್ರಗಳ ಪಟ್ಟಿಯಲ್ಲಿ ಮೊದಲ ಸ್ಥಾನ ಪಡೆದಿದ್ದು ಚೀನಾ. ಹೆಚ್ಚಿನವರು ಈ ದೇಶವನ್ನ ತುಂಬ ದ್ವೇಷಿಸ್ತಾರಂತೆ. ಇದಕ್ಕೆ ಕಾರಣ ಅಲ್ಲಿನ ಸರ್ವಾಧಿಕಾರಿ ಆಡಳಿತ, ಸೆನ್ಸಾರ್‌ಶಿಪ್, ಪರಿಸರ ಹಾನಿ ಮತ್ತು ಉಯಿಘರ್ ಮುಸ್ಲಿಮರನ್ನು ನಡೆಸಿಕೊಳ್ಳುವಂತಹ ರೀತಿ ಮತ್ತು ಇತರ ಗಂಭೀರ ಸಮಸ್ಯೆಗಳು. ಇದಲ್ಲದೆ, ಹಾಂಗ್ ಕಾಂಗ್, ತೈವಾನ್ ಮತ್ತು ಮಕಾವುಗಳ ಸ್ವಾತಂತ್ರ್ಯದ ಬಗ್ಗೆ ಚೀನಾದ ಕಠಿಣ ನೀತಿಯು ಜಾಗತಿಕವಾಗಿ ಅದರ ಇಮೇಜ್‌ಗೆ ಹಾನಿ ಮಾಡಿದೆ ಎಂದು ವಿಶ್ಲೇಷಿಸಲಾಗಿದೆ.

ಯಾವೆಲ್ಲ ದೇಶಗಳು ಇವೆ?

ಇನ್ನು ಲಿಸ್ಟ್‌ನಲ್ಲಿ 2ನೇ ಸ್ಥಾನದಲ್ಲಿ ಇರುವ ದೇಶ ಎಂದರೆ ಯುನೈಟೆಡ್‌ ಸ್ಟೇಟ್ಸ್‌. ಇದು ಜಾಗತಿಕವಾಗಿ ಸೂಪರ್‌ ಪವರ್‌ ಎಂದು ಗುರುತಿಸಿಕೊಂಡಿರುವ ರಾಷ್ಟ್ರವಾದರೂ ದೇಷಿಸಲ್ಪಡುವ ರಾಷ್ಟ್ರಗಳ ಪಟ್ಟಿಯಲ್ಲಿ 2ನೇ ಸ್ಥಾನದಲ್ಲಿದೆ. ತಾನೇ ಸುಪಿರೀಯರ್‌ ಎಂದು ತೋರಿಸಿಕೊಳ್ಳುವ, ಬೇರೆ ದೇಶಗಳ ವಿಚಾರದಲ್ಲಿ ಮೂಗು ತೂರಿಸುವ, ಶಸ್ತ್ರಾಸ್ತ್ರಗಳ ಬಗೆಗಿನ ಆ ದೇಶದ ಗೀಳು ಹಾಗೂ ಇನ್ನು ಕೆಲವು ಕಾರಣಗಳಿಂದ ಈ ರಾಷ್ಟ್ರವನ್ನ ಅನೇಕರು ದ್ವೇಷ ಮಾಡ್ತಾರೆ. ಹಾಗೇ, ಮೂರನೇ ಸ್ಥಾನದಲ್ಲಿ ಇರೋದು ಮತ್ತೊಂದು ಬಲಿಷ್ಠ ರಾಷ್ಟ್ರ ರಷ್ಯಾ. ಉಕ್ರೇನ್‌ ಮೇಲಿನ ಯುದ್ಧದ ಕಾರಣಕ್ಕೆ ಈ ದೇಶ ದ್ವೇಷಿಸಲ್ಪಡುತ್ತಿದೆಯಂತೆ. ಇನ್ನು ಟಾಪ್‌ ಟೆನ್‌ ಪಟ್ಟಿಯಲ್ಲಿ ಉತ್ತರ ಕೊರಿಯಾ, ಪಾಕಿಸ್ತಾನ, ಇರಾನ್‌, ಇರಾಕ್‌, ಸಿರಿಯಾ ಮತ್ತು ಇಸ್ರೇಲ್‌ ದೇಶಗಳು ಇವೆ. ಸರ್ವಾಧಿಕಾರಿ ಆಡಳಿತ, ಧಾರ್ಮಿಕ ಮತಾಂಧತೆ, ಮಿಲಿಟರಿ ಸಂಘರ್ಷ ಮತ್ತು ಮಾನವ ಹಕ್ಕುಗಳ ಉಲ್ಲಂಘನೆಗಳು ಈ ದೇಶಗಳ ಮೇಲಿನ ದ್ವೇಷಕ್ಕೆ ಕಾರಣ. ಅದರಲ್ಲಿ ಪಾಕಿಸ್ತಾನ ಉಗ್ರರ ಪೋಷಣೆ ವಿಚಾರಕ್ಕೆ ಕೆಂಗಣ್ಣಿಗೆ ಗುರಿಯಾಗಿದ್ದರೆ, ಪ್ಯಾಲೆಸ್ಟೈನ್ ವಿವಾದ ಇಸ್ರೇಲ್‌ ಮೇಲಿನ ದ್ವೇಷಕ್ಕೆ ಕಾರಣ.