ಜೂನ್ ನಂತರ ಟೋಲ್ ಶಾಕ್: ಬೆಂಗಳೂರು ಏರ್‌ಪೋರ್ಟ್ ರಸ್ತೆ ಸಂಚಾರಕೆ ಖರ್ಚು ಹೆಚ್ಚಳ

ನೆಲಮಂಗಲ: ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಸಂಪರ್ಕ ಕಲ್ಪಿಸುವ ರಾಷ್ಟ್ರೀಯ ಹೆದ್ದಾರಿ ಟೋಲ್‌ ದರ ದುಬಾರಿಯಾಗಿದ್ದು ಉಳಿದ ರಾಷ್ಟ್ರೀಯ ಹೆದ್ದಾರಿ 48, 75 ಹಾಗೂ 4 ರ ನವಯುಗ, ದೇವಿಹಳ್ಳಿ ಟೋಲ್‌ ದರವೂ ಜೂನ್‌ ನಂತರ ಹೆಚ್ಚಳವಾಗಲಿದೆ ಎಂದು ಟೋಲ್‌ ಅಧಿಕಾರಿಗಳು ತಿಳಿಸಿದ್ದು, ವಾಹನ ಸವಾರರು ಕಂಗಾಲಾಗುವಂತೆ ಮಾಡಿದೆ.

ರಾಜ್ಯದಲ್ಲಿ ಡೀಸೆಲ್‌ ಬೆಲೆ ಏರಿಕೆ ಬೆನ್ನಲ್ಲೇ ಬೆಂಗಳೂರು ನಗರಕ್ಕೆ ಸಂಪರ್ಕ ಕಲ್ಪಿಸುವ ಪ್ರಮುಖ ರಾಷ್ಟ್ರೀಯ ಹೆದ್ದಾರಿಗಳ ಟೋಲ್‌ ಶುಲ್ಕ ಹೆಚ್ಚಳದಿಂದ ವಾಹನ ಸವಾರರು ಬಹಳಷ್ಟು ಆತಂಕಕ್ಕೆ ಒಳಗಾಗಿದ್ದಾರೆ. ಈಗಾಗಲೇ ಜಿಲ್ಲೆಯಲ್ಲಿ ದಾಬಸ್‌ಪೇಟೆಯಿಂದ ಹೊಸಕೋಟೆಯ ಎಸ್‌ಟಿಆರ್‌ಆರ್‌ ಹೆದ್ದಾರಿ ಹಾಗೂ ಎನ್‌.ಎಚ್‌ 7ರ ಸಾದಹಳ್ಳಿ ಗೇಟ್‌ನ ಟೋಲ್‌ ದರ ಏರಿಕೆಯಾಗಿದ್ದು ತುಮಕೂರು, ಚಿತ್ರದುರ್ಗ ಸೇರಿದಂತೆ ಉತ್ತರ ಕರ್ನಾಟಕ, ಚಿಕ್ಕಬಳ್ಳಾಪುರ ಕಡೆಯಿಂದ ಬರುತ್ತಿದ್ದ ವಾಹನ ಸವಾರರು, ಮಾಲೀಕರಿಗೆ ಪೆಟ್ಟಿನ ಮೇಲೆ ಪೆಟ್ಟು ಬಿದ್ದಂತಾಗಿದೆ.

ಜೂನ್‌ ನಂತರ ಮತ್ತೆ ಶಾಕ್‌:

ಜಿಲ್ಲೆಯ ಎರಡು ಹೆದ್ದಾರಿಗಳ ಟೋಲ್‌ ದರ ಈಗಾಗಲೇ ಹೆಚ್ಚಳವಾಗಿದ್ದು ಜೂನ್‌ ನಂತರ ನೆಲಮಂಗಲ-ಹಾಸನ ರಾಷ್ಟ್ರೀಯ ಹೆದ್ದಾರಿ 75ರ ಟೋಲ್‌ ದರ, ನೆಲಮಂಗಲ – ಬೆಂಗಳೂರು ರಾಷ್ಟ್ರೀಯ ಹೆದ್ದಾರಿ 4 ರ ಟೋಲ್‌ ದರ, ನೆಲಮಂಗಲ-ತುಮಕೂರು ರಾಷ್ಟ್ರೀಯ ಹೆದ್ದಾರಿ 48ರ ಜಾಸ್‌ ಟೋಲ್‌ ದರ ಹೆಚ್ಚಳವಾಗಲಿದೆ ಎಂಬುದನ್ನು ಟೋಲ್‌ ಅಧಿಕಾರಿಗಳು ಖಾತರಿ ಮಾಡಿದ್ದು, ವಾಹನ ಸವಾರರಿಗೆ ಮತ್ತಷ್ಟು ಹೊರೆಯಾಗುವುದು ಖಚಿತ.

ಪ್ರಯಾಣ ದರವೂ ಹೆಚ್ಚಳ:

ಬೆಂಗಳೂರು ಹಾಗೂ ಏರ್‌ಪೋರ್ಟ್‌ ಸಂಪರ್ಕ ಕಲ್ಪಿಸುವ ರಾಷ್ಟ್ರೀಯ ಹೆದ್ದಾರಿ ಟೋಲ್‌ ಶುಲ್ಕ ದುಬಾರಿಯಾಗಿರುವ ಪರಿಣಾಮ ಖಾಸಗಿ ಬಸ್‌ಗಳು, ಟ್ಯಾಕ್ಸಿ , ಮಿನಿ ಬಸ್‌ಗಳ ದರವೂ ಹೆಚ್ಚಳ ಮಾಡುವ ಚಿಂತನೆಯನ್ನು ವಾಹನ ಮಾಲೀಕರು ನಿರ್ಧಾರ ಮಾಡಿದ್ದು ಕೆಲವರು ಈಗಾಗಲೇ ಹೆಚ್ಚಿನ ದರವನ್ನೂ ಪಡೆದುಕೊಳ್ಳುತ್ತಿದ್ದಾರೆ. ಟೋಲ್‌ ಶುಲ್ಕ ಹೆಚ್ಚಳದಿಂದ ಜನರ ಜೇಬಿಗೆ ಕತ್ತರಿಬಿದ್ದಂತಾಗಿದೆ.

ಸರಕು ವಾಹನ ಬಾಡಿಗೆ ದುಪ್ಪಟ್ಟು:

ಟೋಲ್‌ ಶುಲ್ಕ ಹಾಗೂ ಡೀಸೆಲ್‌ ಬೆಲೆ ಏರಿಕೆ ಬೆನ್ನಲ್ಲೇ ಸರಕು ಸಾಮಾಗ್ರಿಗಳನ್ನು ಸಾಗಿಸುವ ಟಾಟಾ ಎಸಿ, ಟೆಂಪೋ, ಲಾರಿ ಸೇರಿದಂತೆ ಸರಕು ಸಾಗಾಟ ವಾಹನಗಳ ಬಾಡಿಗೆಯನ್ನು ದುಪ್ಪಟ್ಟು ಮಾಡಲಾಗಿದೆ. ಇದರಿಂದ ಸರಕು ಸಾಗಣೆ ಮಾಡುವವರು ಸಂಕಷ್ಟ ಅನುಭವಿಸುವಂತಾಗಿದ್ದು ರಾಜ್ಯ ಹಾಗೂ ಕೇಂದ್ರ ಸರಕಾರದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.ಸ್ಥಳೀಯರಿಗೆ ಸಂಕಷ್ಟ:

ದಾಬಸ್‌ಪೇಟೆಯಿಂದ ಹೊಸಕೋಟೆಗೆ ಪ್ರಯಾಣ ಮಾಡುವ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸರ್ವಿಸ್‌ ರಸ್ತೆ ಇಲ್ಲದ ಪರಿಣಾಮ ಟೋಲ್‌ ಪ್ರವೇಶ ಮಾಡಿಯೇ ನೆಲಮಂಗಲ, ದೊಡ್ಡಬಳ್ಳಾಪುರ ಗ್ರಾಮಗಳಿಗೆ ತೆರಳಬೇಕಾಗಿದೆ. ಸ್ಥಳೀಯ ವಾಹನ ಸವಾರರು ಹೆಚ್ಚಿನ ಟೋಲ್‌ ಶುಲ್ಕವನ್ನು ಪಾವತಿ ಮಾಡುವ ದುಸ್ಥಿತಿ ಎದುರಾಗಿದೆ. ಕೆಲವರು ಟೋಲ್‌ ಶುಲ್ಕ ತಪ್ಪಿಸಲು ಗ್ರಾಮೀಣ ಪ್ರದೇಶದ ಹಳ್ಳಿ ರಸ್ತೆಗಳಲ್ಲಿ ವಾಹನ ಸಂಚಾರ ಮಾಡುತ್ತಿದ್ದಾರೆ. ಬೆಂಗಳೂರು ಹಾಗೂ ಏರ್‌ಪೋರ್ಟ್‌ ಹೋಗುವವರಿಗೆ ಹೆದ್ದಾರಿ ವರವಾದರೆ ಸ್ಥಳೀಯರಿಗೆ ಶಾಪವಾಗಿ ಬಿಟ್ಟಿದೆ.

ಹುಲ್ಲಕುಂಟೆ ದೊಡ್ಡಬಳ್ಳಾಪುರ ಟೋಲ್‌ ಪರಿಷ್ಕೃತ ದರ:

ಪರಿಷ್ಕೃತ ಶುಲ್ಕ ಲಘುವಾಹನ (ಕಾರು,ಜೀಪು) ಏಕಮುಖ 110, ದ್ವಿಮುಖ 165, ಮಾಸಿಕ ಪಾಸ್‌ 3615, ಪರಿಷ್ಕೃತ ಶುಲ್ಕ ಲಘು ಸರಕು ವಾಹನ ( ಮಿನಿಬಸ್‌,ಟಾಟಾ ಎಸಿ) ಏಕಮುಖ 175, ದ್ವಿಮುಖ 265, ಮಾಸಿಕ ಪಾಸ್‌ 5835, ಪರಿಷ್ಕೃತ ಶುಲ್ಕ 4ರಿಂದ 6 ಚಕ್ರದ ವಾಹನ ಏಕಮುಖ ದರ 575, ದ್ವಿಮುಖ ದರ 865, ಮಾಸಿಕ ಪಾಸ್‌ 19175, ಪರಿಷ್ಕೃತ ಶುಲ್ಕ 8ಕ್ಕಿಂತ ಹೆಚ್ಚು ಚಕ್ರದ ವಾಹನ ಏಕಮುಖ 700, ದ್ವಿಮುಖ 1050, ಮಾಸಿಕ ಪಾಸ್‌ 23345 ರೂ. ದರ ನಿಗದಿಯಾಗಿದೆ.

ಸಾದಹಳ್ಳಿ ಟೋಲ್‌ ಪರಿಷ್ಕೃತ ಶುಲ್ಕ:

ಪರಿಷ್ಕೃತ ಶುಲ್ಕ ಲಘುವಾಹನ ಏಕಮುಖ 120, ದ್ವಿಮುಖ 180, ಮಾಸಿಕ ಪಾಸ್‌ 3970, ಪರಿಷ್ಕೃತ ಶುಲ್ಕ ಲಘು ವಾಣಿಜ್ಯ ವಾಹನ ಏಕಮುಖ 185, ದ್ವಿಮುಖ 275, ಮಾಸಿಕ ಪಾಸ್‌ 6100, ಪರಿಷ್ಕೃತ ಶುಲ್ಕ ಟ್ರಕ್‌ ಬಸ್‌ ಏಕಮುಖ ದರ 370, ದ್ವಿಮುಖ 550, ಮಾಸಿಕ ಪಾಸ್‌ 12265 ರೂ. ದರ ನಿಗದಿಯಾಗಿದೆ.

ರಾಜ್ಯ ಸರಕಾರ ಡೀಸೆಲ್‌ ಬೆಲೆ ಏರಿಕೆ ಮಾಡಿದರೆ ಕೇಂದ್ರ ಸರಕಾರ ಟೋಲ್‌ ದರ ಏರಿಕೆ ಮಾಡಿ ವಾಹನ ಮಾಲೀಕರಿಗೆ ಪೆಟ್ಟಿನ ಮೇಲೆ ಪಟ್ಟು ನೀಡುತ್ತಿರುವುದು ಸರಿಯಲ್ಲ. ಬೆಲೆ ಏರಿಕೆ ಮಾಡಿದರೆ ಸಾಮಾನ್ಯ ಜನರಿಗೆ ಬಹಳಷ್ಟು ತೊಂದರೆ ಆಗಲಿದೆ ಎಂಬುದರ ಬಗ್ಗೆ ಎಚ್ಚರಿಕೆ ವಹಿಸಬೇಕು. ಇದೇ ರೀತಿ ಮುಂದುವರಿದರೆ ಹೋರಾಟ ಮಾಡುವ ಅನಿವಾರ್ಯತೆ ಬರಲಿದೆ ಎಂದಿದ್ದಾರೆ ಜಯಪ್ರಕಾಶ್‌, ಲಾರಿ ಮಾಲೀಕರು.

ಜಿಲ್ಲೆಯ ಎರಡು ಟೋಲ್‌ಗಳ ದರ ಏರಿಕೆಯಾಗಿದೆ. ಉಳಿದಂತೆ, ನೆಲಮಂಗಲ-ತುಮಕೂರು, ನೆಲಮಂಗಲ-ಹಾಸನ ಮತ್ತು ನೆಲಮಂಗಲ-ಬೆಂಗಳೂರಿನ 3 ಟೋಲ್‌ಗಳ ದರ ಜೂನ್‌ ನಂತರ ಏರಿಕೆ ಆಗಲಿದೆ ಎಂದಿದ್ದಾರೆ ಸುರೇಶ್‌, ಟೋಲ್‌ ಸಿಬ್ಬಂದಿ.