ಮಹಾವಂಚಕ ರೋಶನ್ ಸಲ್ಡಾನ್ಹಾ ಕರಾಳ ಮುಖ: ಚೈನ್ ಕಳ್ಳತನದಿಂದ ಬಹುಕೋಟಿ ವಂಚನೆವರೆಗೆ!

ಮಂಗಳೂರು: ಉದ್ಯಮಿಗಳಿಗೆ ಬಹುಕೋಟಿ ರೂ. ವಂಚನೆ ಪ್ರಕರಣದಲ್ಲಿ ಆರೋಪಿಯಾಗಿರುವ ರೋಶನ್‌ ಸಲ್ಡಾನ್ಹಾ ಮೂಲತಃ ಜಪ್ಪಿನಮೊಗರು ಬಜಾಲ್‌ನ ಬೊಲ್ಲಗುಡ್ಡದವನು. ಚಿಕ್ಕವನಾಗಿದ್ದಾಗಲೇ ಸಹಪಾಠಿ ವಿದ್ಯಾರ್ಥಿನಿಯ “ಚೈನ್‌ ಕದ್ದು’ ಕುಖ್ಯಾತಿಗೆ ಒಳಗಾಗಿದ್ದ.

10-12 ವರ್ಷದ ಹಿಂದಿನವರೆಗೂ ಬೊಲ್ಲಗುಡ್ಡದಲ್ಲಿ ಸಾರಣೆ ಇಲ್ಲದ ಹೆಂಚಿನ ಮನೆಯಲ್ಲೆ ಆತನ ಹೆತ್ತವರು ಇದ್ದರು.

ಚಿಕ್ಕವನಾಗಿದ್ದಾಗ ಅಕ್ಕಪಕ್ಕದ ಮನೆಗಳಿಗೆ ಹೋಗಿ ಊಟ-ತಿಂಡಿ ಮಾಡುತ್ತಿದ್ದ. ಹೆತ್ತವರೂ ಸಣ್ಣ ಪುಟ್ಟ ಕೆಲಸ ಮಾಡಿಕೊಂಡಿದ್ದರು. ತೀರಾ ಸಾಮಾನ್ಯ ಕುಟುಂಬಕ್ಕೆ ಸೇರಿದ ಆತ ಏಕಾಏಕಿ ಶ್ರೀಮಂತನಾಗಿರುವ ಬಗ್ಗೆ ಅಕ್ಕಪಕ್ಕದ ನಿವಾಸಿಗಳನ್ನೇ ಅಚ್ಚರಿಗೊಳಿಸಿದೆ.

ವಿದ್ಯಾಭ್ಯಾಸವನ್ನು ಅರ್ಧದಲ್ಲೇ ಮೊಟಕುಗೊಳಿ ಸಿದ್ದ ಈತ ವಿವಿಧೆಡೆ ಕೆಲಸ ಮಾಡುತ್ತಿದ್ದ. ಕೊನೆಗೆ ಮುಂಬಯಿಗೆ ಹೋದ. ಅಲ್ಲಿ ವಂಚಿಸತೊಡಗಿದ. ಬಳಿಕ ಐಷಾರಾಮಿ ಜೀವನ ಪ್ರಾರಂಭಿಸಿದ. ಪ್ರಸ್ತುತ ಕೋಟಿ ರೂಪಾಯಿ ಬೆಲೆಬಾಳುವ ಮೂರ್ನಾಲ್ಕು ಕಾರುಗಳನ್ನು ಮನೆಯಲ್ಲಿ ಇಟ್ಟುಕೊಂಡಿದ್ದಾನೆ.

ಇಬ್ಬರು ಮಕ್ಕಳಲ್ಲಿ ಹಿರಿಯವ

ಹೆತ್ತವರ ಇಬ್ಬರು ಮಕ್ಕಳಲ್ಲಿ ರೋಶನ್‌ ಹಿರಿಯವನಾಗಿದ್ದು, ತಂಗಿ ಇದ್ದಾಳೆ. ಪ್ರಸ್ತುತ ಆಕೆಗೆ ಮದುವೆಯಾಗಿದ್ದು, ಕೆಲವು ವರ್ಷಗಳ ಹಿಂದಿನವರೆಗೂ ಆಕೆಯೇ ಹೆತ್ತವರನ್ನು ನೋಡಿಕೊಳ್ಳುತ್ತಿದ್ದಳು. ಬಳಿಕ ಆಕೆಯನ್ನೂ ಮನೆಯಿಂದ ಹೊರಗೆ ಹಾಕಿದ್ದಾನೆ ಎನ್ನುತ್ತಾರೆ ಸ್ಥಳೀಯರು.

ಮಗುವಿನ ಅದ್ದೂರಿ ಹುಟ್ಟುಹಬ್ಬ
ಕೆಲವು ವರ್ಷಗಳ ಹಿಂದೆ ತನ್ನ ಶ್ರೀಮಂತಿಕೆಗೆ ತಕ್ಕಂತೆ ಮಗುವಿನ ಹುಟ್ಟು ಹಬ್ಬವನ್ನು ಮನೆಯ ಪಕ್ಕದ ಜಮೀನಿನಲ್ಲಿ ಪೆಂಡಾಲ್‌ ಹಾಕಿ ಅದ್ಧೂರಿಯಾಗಿ ಆಯೋಜಿಸಿದ್ದ. ಕೆಲವು ಮಂದಿ ಗಣ್ಯರು ಭಾಗವಹಿಸಿದ್ದು, ಊಟ, ಗಿಫ್ಟ್‌ ಎಂದು ಲಕ್ಷಾಂತರ ರೂ. ವ್ಯಯಿಸಿದ್ದ ಎನ್ನುತ್ತಾರೆ ಸ್ಥಳೀಯರು. ಪತ್ನಿ ಪಾಂಡೇಶ್ವರ ಮೂಲದವಳಾಗಿದ್ದು, ಆಕೆಯೂ ಶ್ರೀಮಂತಿಕೆಯನ್ನು ಪ್ರದರ್ಶಿಸುತ್ತಿದ್ದಳು. ಪ್ರಸ್ತುತ ಈತನ ಪತ್ನಿ, ಮಗು ಚೆನ್ನೈನಲ್ಲಿದ್ದಾರೆ ಎನ್ನಲಾಗಿದೆ.

ಬೀದಿ ದೀಪ ಅಳವಡಿಸಲು ಬಿಡುತ್ತಿರಲಿಲ್ಲ
ಸಾರ್ವಜನಿಕ ರಸ್ತೆಯಾದರೂ ಈತನ ಮನೆಯ ಬಳಿಯಲ್ಲಿರುವ ವಿದ್ಯುತ್‌ ಕಂಬಕ್ಕೆ ಬೀದಿ ದೀಪ ಹಾಕಿಸಿಕೊಳ್ಳಲು ಬಿಡುತ್ತಿರಲಿಲ್ಲ. ತನ್ನ ವ್ಯವಹಾರಗಳಿಗೆ ಅಡ್ಡಿಯಾಗುತ್ತದೆ ಎನ್ನುವ ಕಾರಣಕ್ಕೆ ಈ ರೀತಿ ಮಾಡುತ್ತಿದ್ದ. ಇದರಿಂದಾಗಿ ಮನೆಯ ಪಕ್ಕ ಯಾವಾಗಲೂ ಕತ್ತಲಿನಿಂದಲೇ ಕೂಡಿರುತ್ತದೆ. ಆದರೆ ಸಾರ್ವಜನಿಕ ರಸ್ತೆಯಲ್ಲಿ ತನ್ನ ಸಿಸಿ ಕೆಮರಾದ ಕಂಬವನ್ನು ಹಾಕಿದ್ದಾನೆ ಎನ್ನುತ್ತಾರೆ ಸ್ಥಳೀಯರು.