ತುಂಬಿ ಡ್ಯಾಮ್ ಒಳಹರಿವು ಸ್ಥಗಿತ ಮಂಗಳೂರಿಗರಿಗೆ ನೀರಿನ ಸಮಸ್ಯೆ ಖಂಡಿತ

ಮಂಗಳೂರು: ಮಂಗಳೂರು ಮಹಾನಗರ ಮತ್ತು ಸುತ್ತಮುತ್ತಲ ಗ್ರಾಮಗಳಿಗೆ ನೀರು ಪೂರೈಕೆ ಮಾಡುವ ತುಂಬೆ ವೆಂಟೆಡ್ ಡ್ಯಾಂಗೆ ಒಳಹರಿವು ಸ್ಥಗಿತಗೊಂಡಿದ್ದು, ಭಾನುವಾರ ನೀರಿನ ಮಟ್ಟ 5.75. ಮೀ.ಗೆ ಇಳಿಕೆಯಾಗಿದೆ. ಮಳೆ ಆರಂಭವಾಗುವ ವರೆಗೆ ಮಿತ ನೀರಿನ ಬಳಕೆ ಮೂಲಕ ಪ್ರಸ್ತುತ ಬೇಸಿಗೆಯನ್ನು ಎದುರಿಸಬೇಕಾಗಿದೆ. ಒಂದೆಡೆ ಬಿಸಿಲಿನ ಬೇಗೆ, ಇನ್ನೊಂದೆಡೆ ಹೆಚ್ಚುತ್ತಿರುವ ನೀರಿನ ಬೇಡಿಕೆಯಿಂದ ತುಂಬೆ ವೆಂಟೆಡ್ ಡ್ಯಾಂನಲ್ಲಿ ದಿನದ 24 ಗಂಟೆಯೂ ನೀರನ್ನು ಪಂಪಿಂಗ್ ಮಾಡಲಾಗುತ್ತಿದೆ. ಒಂದು ವಾರದಿಂದೀಚೆಗೆ ತುಂಬೆ ಡ್ಯಾಂನಲ್ಲಿ ನೀರಿನ ಮಟ್ಟ ದಿನಕ್ಕೆ 8ರಿಂದ 10 ಸೆಂ.ಮೀ.ನಷ್ಟು ಇಳಿಕೆಯಾಗುತ್ತಿದೆ. ತುಂಬೆ ಡ್ಯಾಂನಲ್ಲಿ 6 ಮೀಟರ್ ವರೆಗೆ ನೀರು ಶೇಖರಣೆಗೆ ಡ್ಯಾಂ ಬಾಗಿಲು ಹಾಕಲಾಗಿದೆ.

ಆದರೆ ನೀರಿನ ಬೇಡಿಕೆ ಹೆಚ್ಚಾಗಿದ್ದು, ನೀರಿನ ಒಳಹರಿವು ಇಲ್ಲದ ಕಾರಣ ಮಾರ್ಚ್ 19ರಂದು ನೀರಿನ ಮಟ್ಟ 5.40 ಮೀ.ನಷ್ಟು ಇಳಿಕೆಯಾಗಿತ್ತು. ಬಳಿಕ ಜಕ್ರಿಬೆಟ್ಟು ಡ್ಯಾಂನಿಂದ ನೀರು ಬಿಟ್ಟಿದ್ದು, 5.85 ಮೀ. ಏರಿಕೆಯಾಗಿತ್ತು. ಭಾನುವಾರ ಮತ್ತೆ 5.75ಮೀ.ಗೆ ಇಳಿಕೆಯಾಗಿದೆ. ಪ್ರತಿನಿತ್ಯ ಮಂಗಳೂರು ಮಹಾನಗರಕ್ಕೆ 162 ಎಂಎಲ್‌ ಡಿ ನೀರು ಸರಬರಾಜಾಗುತ್ತಿದ್ದು, ಇದೇ ರೀತಿ ಬಿರುಬಿಸಿಲು ಮುಂದುವರಿದು ಮಳೆ ಬಾರದಿದ್ದರೆ ನೀರಿನ ಆತಂಕ ತಪ್ಪಿದ್ದಲ್ಲ. ಈ ಕಾರಣದಿಂದ ನಗರವಾಸಿಗಳು ಕೂಡಲೇ ನೀರಿನ ಬಳಕೆ ಬಗ್ಗೆ ಮುಂಜಾಗ್ರತೆ ವಹಿಸಲೇ ಬೇಕಾಗಿದೆ. ಗ್ರೀನ್ ಕೋ ಸಂಸ್ಥೆಯ ಎಎಂಆರ್ ಪವರ್ ಪ್ರಾಜೆಕ್ಟ್ ಡ್ಯಾಂನಲ್ಲಿ ಸಮುದ್ರ ಮಟ್ಟದಿಂದ 17 ಮೀಟರ್ ನೀರಿದ್ದು, ಅದರಲ್ಲಿ ಸದ್ಯ ನೀರಿನ ಮಟ್ಟ ಉತ್ತಮವಾಗಿದೆ. ತುಂಬೆ ಡ್ಯಾಂನಲ್ಲಿ 5.75 ಮೀಟರ್ ನೀರಿದೆ. ಕಳೆದ ಬಾರಿ ತುಂಬೆ ಡ್ಯಾಂನಲ್ಲಿ ನೀರಿನ ಪ್ರಮಾಣ ಗಣನೀಯ ಕುಸಿತ ಕಂಡಾಗ ಹರೇಕಳ ಡ್ಯಾಂನಲ್ಲಿ ಶೇಖರಣೆಯಾಗಿರುವ ನೀರನ್ನು 4 ಪಂಪ್‌ಗಳ ಸಹಾಯದಿಂದ ಮೇಲಕ್ಕೆತ್ತಿ ತುಂಬೆ ಡ್ಯಾಂಗೆ ಹಾಕಲಾಗಿತ್ತು. ಮೇ ತಿಂಗಳಾಂತ್ಯಕ್ಕೆ ನೀರಿನ ಸಮಸ್ಯೆ ಎದುರಾದರೆ ಈ ಬಾರಿಯೂ ಪಂಪ್‌ಗಳ ಬಳಕೆ ಅನಿವಾರ್ಯ ಬರಬಹುದು ಎನ್ನುತ್ತಾರೆ ಅಧಿಕಾರಿಗಳು. ಜಕ್ರಿಬೆಟ್ಟು ಡ್ಯಾಂ ಹೊಸ ಸೇರ್ಪಡೆ
ಉಪ್ಪಿನಂಗಡಿಯಿಂದ ಕೆಳಭಾಗದ ಸರಳೀಕಟ್ಟೆ ಡ್ಯಾಂ ಭರ್ತಿಯಾಗಿದ್ದು, ಕೆಳಭಾಗಕ್ಕೆ ನೀರು ಹರಿದು ಎಎಂಆರ್ ಡ್ಯಾಂಗೆ ಸೇರುತ್ತಿದೆ. ಎಎಂಆರ್‌ನಿಂದ ನೀರು ಶೇಖರಣೆಯಾಗಿ ಜಕ್ರಿಬೆಟ್ಟು ಡ್ಯಾಂಗೆ ಸೇರುತ್ತದೆ. ಜಕ್ರಿಬೆಟ್ಟು ಡ್ಯಾಂನಿಂದ ಬಂಟ್ವಾಳ ಪುರಸಭೆ ವ್ಯಾಪ್ತಿಗೆ ಈ ವರ್ಷದಿಂದ ನೀರು ಸರಬರಾಜು ಆಗುತ್ತಿದ್ದು, ಇದರಿಂದ ಈ ಡ್ಯಾಂನ ನೀರಿನ ಬೇಡಿಕೆಯೂ ಈ ಬಾರಿ ಅಧಿಕವಾಗಿದೆ. ಜಕ್ರಿಬೆಟ್ಟುವಿನಿಂದ ಕೆಳಭಾಗಕ್ಕೆ ನೀರು ಬಿಟ್ಟರೆ ಮಾತ್ರ ತುಂಬೆ ಡ್ಯಾಂನಲ್ಲಿ ನೀರಿನ ಪ್ರಮಾಣ ಏರಿಕೆಯಾಗಲಿದೆ.