ಟೆನಿಸ್ ಬಾಲ್ ಕ್ರಿಕೆಟ್ ತಾರೆ ವಿನ್ಸೆಂಟ್ ಫೆರ್ನಾಂಡಿಸ್ ನಿಧನ

ಪಡುಬಿದ್ರಿ : ಟೆನಿಸ್ ಬಾಲ್ ಕ್ರಿಕೆಟ್ ತಾರೆ ದಾಖಲೆಗಳ ಸರದಾರ ವಿನ್ಸೆಂಟ್‌ ಫೆರ್ನಾಂಡಿಸ್‌ ಅನಾರೋಗ್ಯದಿಂದ ಸೆಪ್ಟೆಂಬರ್ 28 ರಂದು ಉಡುಪಿಯ ಖಾಸಗಿ ಆಸ್ಪತ್ರೆಯಲ್ಲಿ ನಿಧರಾಗಿದ್ದಾರೆ.
ಪಡುಬಿದ್ರಿ ಕ್ರಿಕೆಟರ್ಸ್ (ಪಿಸಿಪಿ) ಮತ್ತು ಫ್ರೆಂಡ್ಸ್ ಪಡುಬಿದ್ರಿಯಂತಹ ಪ್ರಸಿದ್ಧ ತಂಡಗಳಿಗಾಗಿ ಮಿಂಚಿದ ಆಲ್‌ರೌಂಡರ್ ವಿನ್ಸಿ, ಸ್ಫೋಟಕ ಬ್ಯಾಟಿಂಗ್ ಮತ್ತು ಅಸಾಧಾರಣ ಬೌಲಿಂಗ್‌ಗೆ ಹೆಸರುವಾಸಿಯಾಗಿದ್ದರು. ಮೂಡುಬಿದಿರೆಯಲ್ಲಿ ನಡೆದ ಮನೀಷ್ ಟ್ರೋಫಿ ರಾಜ್ಯ ಮಟ್ಟದ ಪಂದ್ಯಾವಳಿಯಲ್ಲಿ, ಅವರು ಕೇವಲ 16 ಎಸೆತಗಳಲ್ಲಿ ದಾಖಲೆಯ 50 ರನ್ ಗಳಿಸಿದರು.

1990-2005ರ ಸಮಯ ಟೆನಿಸ್‌ ಬಾಲ್‌ ಕ್ರಿಕೆಟ್‌ನಲ್ಲಿ ನೂರಾರು ಪಂದ್ಯಾಟಗಳಲ್ಲಿ ಪ್ರಥಮ ಎಸೆತಕ್ಕೆ ಸಿಕ್ಸರ್‌ ಸಿಡಿಸುವ ಸಾಮರ್ಥ್ಯದ ವಿನ್ಸಿ ಅವರು ರಾಜ್ಯ, ರಾಷ್ಟ್ರ ಮಟ್ಟದ ಕ್ರಿಕೆಟ್‌ ಟೂರ್ನಿಗಳಲ್ಲಿ ನೂರಾರು ಸರಣಿ ಶ್ರೇಷ್ಠ, ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದ ದಾಖಲೆ ಹೊಂದಿದ್ದರು. ಅತ್ಯುತ್ತಮ ಬೌಲರ್‌ ಆಗಿಯೂ ಸಾಧನೆಗೈದಿದ್ದರು.

ಫ್ರೆಂಡ್ಸ್ ಪಡುಬಿದ್ರಿಯ ಉಪನಾಯಕನಾಗಿ, ವಿನ್ಸಿ 1996 ರಲ್ಲಿ ಮೂಡುಬಿದ್ರಿಯ ವಿಜಯ ಕಾಲೇಜಿನಲ್ಲಿ ನಡೆದ ಪಂದ್ಯಾವಳಿಯಲ್ಲಿ ಸಿಟಿ ಫ್ಲವರ್ ಮೂಡುಬಿದ್ರಿ ವಿರುದ್ಧ 13 ಎಸೆತಗಳಲ್ಲಿ 13 ಸಿಕ್ಸರ್‌ಗಳನ್ನು ಸಿಡಿಸಿ ಇತಿಹಾಸದಲ್ಲಿ ತಮ್ಮ ಹೆಸರನ್ನು ಬರೆದರು. ಬಲಗೈ ಆಫ್-ಮೀಡಿಯಂ ಪೇಸ್ ಸ್ಪಿನ್ ಬೌಲರ್ ಆಗಿರುವ ಅವರು, 1990 ರಲ್ಲಿ ಪಡುಬಿದ್ರಿಯಲ್ಲಿ ಪಡುಬಿದ್ರಿ ಕ್ರಿಕೆಟರ್ಸ್ ಆಯೋಜಿಸಿದ್ದ ಭಾರತದ ಮೊದಲ ಫ್ಲಡ್‌ಲಿಟ್ ಟೆನಿಸ್ ಬಾಲ್ ಕ್ರಿಕೆಟ್ ಪಂದ್ಯಾವಳಿಯ ಸಂಘಟನಾ ಸದಸ್ಯರಲ್ಲಿ ಒಬ್ಬರಾಗಿಯೂ ತಮ್ಮ ಛಾಪು ಮೂಡಿಸಿದರು. ಅವರು ಜೆಸಿಐ ಪಡುಬಿದ್ರಿಯ ಸಕ್ರಿಯ ಸದಸ್ಯರೂ ಆಗಿದ್ದರು.