ತಮಿಳು ನಟ ಅಜಿತ್‌ ಕುಮಾರ್‌ ಗಣನೀಯ ತೂಕ ಇಳಿಕೆ: ‘ರೆಡ್’ ಲುಕ್‌ನಲ್ಲಿ ಬೆಲ್ಜಿಯಂನಲ್ಲಿ ಕಾರ್‌ ರೇಸ್‌ಗೆ ಸಿದ್ಧತೆ!

ತಮಿಳುನಟ ಅಜಿತ್‌ ಕುಮಾರ್‌ (Ajith Kumar)ಅವರು ಇತ್ತೀಚೆಗೆ ಬದಲಾಗಿದ್ದಾರೆ. ಅವರ ತೂಕ ಗಣನೀಯವಾಗಿ ಇಳಿದಿದೆ. ವಿದಾಮುಯಾರ್ಚಿ ಸಿನಿಮಾ ಬಿಡುಗಡೆಯವರೆಗೆ ದಷ್ಟಪುಷ್ಟವಾಗಿಯೇ ಇದ್ದ ಅಜಿತ್‌ ಕುಮಾರ್‌, ದುಬೈನಲ್ಲಿ ಕಾರ್‌ ರೇಸ್‌ನಲ್ಲೂ ಪಾಲ್ಗೊಂಡಿದ್ದರು. ಅಲ್ಲಿಯ ವಿಡಿಯೊ ವೈರಲ್‌ ಆದಾಗಲೂ ಅಜಿತ್‌ ಕುಮಾರ್ ಲುಕ್‌ ಏನೂ ಬದಲಾದಂತೆ ಕಂಡಿರಲಿಲ್ಲ.

ಆದರೆ ಆಮೇಲೆ ಸಾರ್ವಜನಿಕವಾಗಿ ಕಾಣಿಸಿಕೊಂಡಾಗ ಎಲ್ಲರೂ ಅಚ್ಚರಿ ಪಡುವಷ್ಟು ಬದಲಾಗಿದ್ದರು. ಕೆಲವು ವಾರಗಳ ಹಿಂದೆ ಅವರು ಪತ್ನಿ ಶಾಲಿನಿಯೊಂದಿಗೆ ಅಂಗಡಿಯೊಂದರ ಉದ್ಘಾಟನೆಗೆ ತೆರಳಿದ್ದರು. ಆಗ ಕೂಡ ಅವರ ದೇಹದ ತೂಕದ ಬಗ್ಗೆ ಚರ್ಚೆಯಾಗಿತ್ತು. ಇದೀಗ ಮತ್ತೆ ಅಜಿತ್‌ ಕುಮಾರ್‌ ಸಾರ್ವಜನಿಕವಾಗಿ ಕಾಣಿಸಿಕೊಂಡಿದ್ದಾರೆ..ಮತ್ತದೇ ಅವರ ತೂಕದ ಬಗ್ಗೆ ಇಂಟರ್‌ನೆಟ್‌ನಲ್ಲಿ ಭಾರಿ ಚರ್ಚೆಯಾಗುತ್ತಿದೆ.

ನಟ ಅಜಿತ್‌ ಕುಮಾರ್‌ ಸದ್ಯ ಬೆಲ್ಜಿಯಂನಲ್ಲಿ ಇದ್ದಾರೆ. GT4 ಸೀರಿಸ್‌ಗೋಸ್ಕರ ಅಲ್ಲಿ ಹೋಗಿದ್ದಾರೆ. ಇದೇ ವೀಕೆಂಡ್‌ನಲ್ಲಿ ಈ ಕಾರ್‌ ರೇಸ್‌ ನಡೆಯಲಿದೆ. ಪ್ರ್ಯಾಕ್ಟೀಸ್‌ ಕೂಡ ನಡೆಸುತ್ತಿದ್ದಾರೆ. ಆದರೆ ಇದೀಗ ವೈರಲ್‌ ಆಗುತ್ತಿರುವ ಅವರ ಫೋಟೋ ನೋಡಿ ಫ್ಯಾನ್ಸ್‌ ಅಂತೂ ಸಖತ್‌ ಸರ್‌ಪ್ರೈಸ್‌ ಆಗಿದ್ದಾರೆ. ಅಜಿತ್‌ ತಲೆ ಕೂದಲನ್ನ ಸಣ್ಣದಾಗಿ ಕಟ್‌ ಮಾಡಿಸಿಕೊಂಡಿದ್ದಾರೆ. ಅವರ ಫೋಟೋಗಳು ʼರೆಡ್‌ʼ ಸಿನಿಮಾದ ಲುಕ್‌ನ್ನ ನೆನಪಿಸುವಂತಿದೆ. ಬೆಲ್ಜಿಯಂನ ಬೀದಿಗಳಲ್ಲಿ ಅವರು ಅಡ್ಡಾಡುತ್ತಿದ್ದಾರೆ. ಸ್ನೇಹಿತರೊಂದಿಗೆ ಸೈಕ್ಲಿಂಗ್‌ ಕೂಡ ಮಾಡುತ್ತಿದ್ದಾರೆ.