ಗೋಕರ್ಣದಲ್ಲಿ ಬಿಡಾಡಿ ದನಗಳ ನಾಪತ್ತೆ – ದನಕಳ್ಳರ ಶಂಕೆ

ಗೋಕರ್ಣದಲ್ಲಿ ಕಳೆದ ಕೆಲವು ದಿನಗಳಿಂದ ಬಿಡಾಡಿ ದನಗಳು ನಾಪತ್ತೆಯಾಗುತ್ತಿದ್ದು, ಸಾರ್ವಜನಿಕರು ದನ ಕಳ್ಳತನದ ಬಗ್ಗೆ ಅನುಮಾನ ವ್ಯಕ್ತಪಡಿಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ, ಪೊಲೀಸರು ಹೆಚ್ಚಿನ ನಿಗಾ ವಹಿಸಬೇಕು ಮತ್ತು ಚೆಕ್ ಪೋಸ್ಟ್‌ನಲ್ಲಿ ತಪಾಸಣಾ ಕಾರ್ಯವನ್ನು ತೀವ್ರಗೊಳಿಸಬೇಕು ಎಂದು ಒತ್ತಾಯಿಸಲಾಗಿದೆ.
ಗೋಕರ್ಣ (ಮಾ.21) : ಕಳೆದ ಹಲವು ದಿನಗಳಿಂದ ಬಿಡಾಡಿ ದನಗಳು ನಾಪತ್ತೆಯಾಗುತ್ತಿದ್ದು, ದನಕಳ್ಳರ ಚಟುವಟಿಕೆ ನಡೆಯುತ್ತಿದೆಯೇ ಎಂದು ಸಾರ್ವಜನಿಕರು ಸಂದೇಹ ವ್ಯಕ್ತಪಡಿಸುತ್ತಿದ್ದಾರೆ.
ಪ್ರತಿದಿನ ಇಲ್ಲಿನ ಮನೆ, ಅಂಗಡಿಗಳಿಗೆ ಮುಂಜಾನೆ ಭೇಟಿ ನೀಡಿ ಅವರು ಕೊಟ್ಟ ತಿಂಡಿ ತಿಂದು ದನಗಳು ಬೀದಿಯಲ್ಲಿ ಅಲೆದಾಡುತ್ತಿದ್ದವು. ರಾತ್ರಿ ರಸ್ತೆ ಅಕ್ಕಪಕ್ಕದಲೇ ಮಲಗುತ್ತಿದ್ದವು. ಆದರೆ ಶಿವರಾತ್ರಿಯ ಸಮಯದಲ್ಲಿ ರಸ್ತೆ ಅಂಚಿನ ಅಂಗಡಿಗಳ ಸಾಲು ಹಾಕಿರುವುದರಿಂದ ಮೇಲಿನಕೇರಿ ಬಳಿ ದನಗಳು ರಾತ್ರಿ ಮಲಗುತ್ತಿದ್ದವು. ಅಲ್ಲಿಂದ ಕಳ್ಳತನ ಮಾಡಲಾಗುತ್ತಿರುವ ಅನುಮಾನ ವ್ಯಕ್ತವಾಗಿದೆ. ನಿತ್ಯ ಭೇಟಿ ನೀಡುತ್ತಿದ್ದ ಹಸುಗಳು ಕಾಣಿಸುತ್ತಿಲ್ಲ ಎಂದು ಅಂಗಡಿಯವರು ಹೇಳುತ್ತಿದ್ದು, ಚಿಕ್ಕ ಕರುಗಳು ಮಾತ್ರ ಓಡಾಡುತ್ತಿವೆ.