ಬ್ಯೂಟಿ ಪಾರ್ಲರ್ ಹೆಸರಿನಲ್ಲಿ ಸೆಕ್ಸ್ ದಂಧೆ: ಮಾಲೀಕರಿಂದ ಸಿಬ್ಬಂದಿಗೆ ಕಿರುಕುಳ, ಬೆದರಿಕೆ

ಮಂಗಳೂರು: ಬ್ಯೂಟಿಪಾರ್ಲರ್‌ ಹೆಸರಿನಲ್ಲಿ ಮಾಲಕಿ ಸೆಕ್ಸ್‌ದಂಧೆ ನಡೆಸುತ್ತಿರುವ ವಿಚಾರ ಮಂಗಳೂರಿನಲ್ಲಿ (Mangalore) ಬೆಳಕಿಗೆ ಬಂದಿದೆ. ಪುರುಷ ಗಿರಾಕಿಗಳೊಂದಿಗೆ ಸಹಕರಿಸಲು ಮಾಲಕಿಯೇ ಒತ್ತಾಯಿಸುತ್ತಿದ್ದಾರೆ. ಇದಕ್ಕೆ ಒಪ್ಪದಿದ್ದಾಗ ಹಲ್ಲೆಗೈದು ಅರೆನಗ್ನ ಫೋಟೊ ತೆಗೆದು ಬೆದರಿಕೆ ಒಡ್ಡಿದ್ದಾರೆಂದು ಮಹಿಳೆಯೊಬ್ಬರು ಮಾಧ್ಯಮದ ಮುಂದೆ ಬಂದು ಅಳಲು ತೋಡಿಕೊಂಡಿದ್ದಾರೆ.

ಮಂಗಳೂರಿನ ಹಂಪನಕಟ್ಟೆಯ ವೈಬ್ಸ್ ಯೂನಿಸೆಕ್ಸ್ ಸಲೂನ್‌ನಲ್ಲಿ (Unisex salon) ಈ ಸೆಕ್ಸ್ ದಂಧೆ ನಡೆಯುತ್ತಿದೆ. ಮಾಲಕಿ ತೃಪ್ತಿ ಭಂಡಾರಿ ಹಾಗೂ ಆಕೆಯ ಪತಿ ವಿಪಿನ್ ಭಂಡಾರಿಯೇ ಈ ಸೆಕ್ಸ್‌ದಂಧೆಯ ರೂವಾರಿಗಳು. ಇಲ್ಲಿನ ಮಹಿಳಾ ಸಿಬ್ಬಂದಿಗೆ ಪುರುಷ ಗಿರಾಕಿಗಳು ಬಂದಲ್ಲಿ ಅವರಿಗೆ ಮಸಾಜ್ ಮಾಡಬೇಕು ಎಂದು ಮಾಲಕರು ಒತ್ತಾಯಿಸುತ್ತಾರೆ‌. ಮಾಡುವುದಿಲ್ಲ ಎಂದರೂ ಬೆದರಿಸಿ ಮಸಾಜ್ ಮಾಡುವಂತೆ ಮಾಡುತ್ತಾರೆ ಎಂದು ಸಂತ್ರಸ್ತೆ ಅಳಲು ತೋಡಿಕೊಂಡಿದ್ದಾರೆ‌.

ಪುರುಷ ಗಿರಾಕಿ ಲೈಂಗಿಕವಾಗಿ ಸಹಕರಿಸುವಂತೆ ಒತ್ತಾಯಿಸಿ ಕಿರುಕುಳ

ಬೇರೆ ದಾರಿಕಾಣದೆ ಇತ್ತೀಚೆಗೆ ಸಂತ್ರಸ್ತೆ ಬ್ಯೂಟಿಪಾರ್ಲರ್ ಒಳಗಿನ ಏಕಾಂತ ಕೊಠಡಿಗೆ ಮಸಾಜ್ ಮಾಡಲು ಹೋಗಿದ್ದಾರೆ. ಈ ವೇಳೆ ಪುರುಷ ಗಿರಾಕಿ ಲೈಂಗಿಕವಾಗಿ ಸಹಕರಿಸುವಂತೆ ಒತ್ತಾಯಿಸಿ ಕಿರುಕುಳ ನೀಡಿದ್ದಾನೆ. ಇದಕ್ಕೆ ಒಪ್ಪದೆ ತಾನು ಅಲ್ಲಿಂದ ಹೊರಬರಲು ಯತ್ನಿಸಿದಾಗ ಮಾಲಕಿ ತೃಪ್ತಿ ಭಂಡಾರಿ ಕೊಠಡಿಯೊಳಗೆ ನುಗ್ಗಿ ತನ್ನ ಕಪಾಳಕ್ಕೆ ಬಾರಿಸಿದ್ದಾರೆ‌. ಅಲ್ಲದೆ ಬಲವಂತವಾಗಿ ಮೇಲುಡುಪು ಕಳಚಿ ತಮ್ಮ ಅರೆನಗ್ನ ಫೋಟೊ ತೆಗೆದಿದ್ದಾರೆ. ಈ ಫೋಟೊವನ್ನು ತನ್ನ ಪತಿಗೆ ಕಳುಹಿಸಿದ್ದಾರೆ. ಇದರಿಂದ ಪತಿ ತನಗೆ ವಿಚ್ಛೇದನ ನೀಡುವಲ್ಲಿ ವರೆಗೆ ಬಂದಿದೆ ಎಂದು ಸಂತ್ರಸ್ತೆ ಹೇಳಿದ್ದಾರೆ.

ಸದ್ಯ ಸಂತ್ರಸ್ತೆ ರಾಜ್ಯ ಹಿಂದುಳಿದ ವರ್ಗಗಳ ಆಯೋಗದ ಸದಸ್ಯೆ ಪ್ರತಿಭಾ ಕುಳಾಯಿಯವರಲ್ಲಿ ವಿಚಾರ ತಿಳಿಸಿದ್ದು, ಅದರಂತೆ ದೂರು ದಾಖಲಾಗಿದೆ. ಸಂಜೆ ವೇಳೆ ಸಂತ್ರಸ್ತೆಯೊಂದಿಗೆ ಮಹಿಳಾ ಪೊಲೀಸರು ಬೆರಳಚ್ಚು ತಜ್ಞರೊಂದಿಗೆ ಆಗಮಿಸಿ ಸಲೂನ್‌ನಲ್ಲಿ ಪರಿಶೀಲನೆ ನಡೆಸಿದ್ದಾರೆ. ಪೊಲೀಸರು ಈ ಬಗ್ಗೆ ಕಠಿಣ ಕ್ರಮ ಕೈಗೊಂಡು ಸಲೂನ್‌ಗೆ ಬೀಗ ಜಡಿಯಬೇಕಿದೆ.