ಐಟಿ ಫ್ರೆಶರ್‌ಗಳಿಗಿಂತ ಹೆಚ್ಚು ಸಂಪಾದನೆ ಪ್ಲಂಬರ್‌ಗಳಿಗೆ: ಇಂಜಿನಿಯರಿಂಗ್ ಕುಸಿತದ ಸಂಕೇತ

“‘ನನ್ನ ಮಗ ಇಂಜಿನಿಯರ್ ಆಗ್ತಾನೆ’ – ನಾನು ಹುಟ್ಟಿದ ಮರುನಿಮಿಷವೇ ನನ್ನ ತಂದೆ ನಿರ್ಧರಿಸಿದ್ದರು,” ಹೀಗೊಂದು ಸಾಲು ತ್ರೀ ಈಡಿಯಟ್ಸ್’ ಚಿತ್ರದಲ್ಲಿದೆ. ಇದು ಒಂದು ಕಾಲದಲ್ಲಿ ಲಕ್ಷಾಂತರ ಭಾರತೀಯ ಪೋಷಕರ ಕನಸಾಗಿತ್ತು. ಎಂಜಿನಿಯರಿಂಗ್ ಎಂದರೆ ಗೌರವ, ಉತ್ತಮ ಸಂಬಳ ಮತ್ತು ಭದ್ರ ಬದುಕಿನ ಭರವಸೆಯಾಗಿತ್ತು.ಆದರೆ, ಈಗ ಕಾಲ ಸಂಪೂರ್ಣವಾಗಿ ಬದಲಾಗಿದೆ. ಕಳೆದ ದಶಕದಿಂದ ಐಟಿ ಫ್ರೆಶರ್‌ಗಳ ಸಂಬಳ ಹೆಚ್ಚಾಗಿಲ್ಲ. ಇದಕ್ಕಿಂತ ಆತಂಕಕಾರಿ ವಿಷಯವೆಂದರೆ, ‘ಅರ್ಬನ್ ಕಂಪನಿ’ಯ ಪ್ಲಂಬರ್‌ಗಳು ಮತ್ತು ಬ್ಯೂಟಿಷಿಯನ್‌ಗಳು ಐಟಿ ಫ್ರೆಶರ್‌ಗಳಿಗಿಂತ ಹೆಚ್ಚು ಸಂಪಾದಿಸುತ್ತಿದ್ದಾರೆ.ಹಾಗಾದರೆ ಇಂಜಿನಿಯರಿಂಗ್ ಕನಸು ದುಃಸ್ವಪ್ನವಾಗಿದ್ದು ಹೇಗೆ?ಇಡೀ ಸಂಕಷ್ಟದ ಮೂಲ ಸ್ಥಗಿತಗೊಂಡ ಸಂಬಳ ಹೆಚ್ಚಳ. ಐಟಿ ಉದ್ಯಮವು ಫ್ರೆಶರ್‌ಗಳಿಗೆ ವಾರ್ಷಿಕ 3.5-4 ಲಕ್ಷ ರೂ. ಸಂಬಳ ನೀಡುತ್ತಿದೆ. ಈ ಮೊತ್ತ ಕಳೆದ ಒಂದು ದಶಕದಿಂದ ಸ್ವಲ್ಪವೂ ಬದಲಾಗಿಲ್ಲ.ಇನ್ನು ಐಟಿ ಕಂಪನಿಗಳು ತಾವು ನೀಡುವ ಸೇವೆಗಳಿಗೆ ಗ್ರಾಹಕರಿಂದ ಕಡಿಮೆ ಹಣ ಪಡೆಯುತ್ತಿವೆ. ಇದರಿಂದಉದ್ಯೋಗಿಯ ಮೇಲಿನ ಆದಾಯ (ಆರ್‌ಪಿಇ) ಕೂಡ ಬೆಳೆದಿಲ್ಲ.ಇದೇ ವೇಳೆ ‘ಅರ್ಬನ್ ಕಂಪನಿ’ಯ ಅಗ್ರ ಶೇ. 20ರಷ್ಟು ಪಾರ್ಟ್‌ನರ್ಸ್‌ (ಪ್ಲಂಬರ್‌ಗಳು, ಎಲೆಕ್ಟ್ರಿಷಿಯನ್‌ಗಳು) ತಿಂಗಳಿಗೆ 41,000 ರೂ.ವರೆಗೆ ಅಂದರೆ ವಾರ್ಷಿಕ 4.92 ಲಕ್ಷ ರೂ.ವರೆಗೆ ಗಳಿಕೆ ನಡೆಸುತ್ತಿದ್ದಾರೆ. ಇದು ಐಟಿ ಫ್ರೆಶರ್‌ಗಳ ಗಳಿಕೆಗಿಂತ ಹೆಚ್ಚು. ವಿಶೇಷವೆಂದರೆ, ಐಟಿ ಫ್ರೆಶರ್‌ಗಳು ತಿಂಗಳಿಗೆ 198 ಗಂಟೆ ಕೆಲಸ ಮಾಡಿದರೆ, ಈ ವೃತ್ತಿಪರರು ಸರಾಸರಿ 87 ಗಂಟೆ ಮಾತ್ರ ಕೆಲಸ ಮಾಡುತ್ತಾರೆ ಎಂದು ವರದಿಗಳು ಹೇಳುತ್ತವೆ.ಏನು ಕಾರಣ?ಇಂಥಹದ್ದೊಂದು ಬದಲಾವಣೆ ಮುಖ್ಯವಾಗಿ ಹೆಚ್ಚುವರಿ ಎಂಜಿನಿಯರ್‌ಗಳ ಪೂರೈಕೆ ಮತ್ತು ಜನರೇಟಿವ್‌ ಎಐ ಕಾರಣವಾಗಿದೆ. ಪ್ರತಿ ವರ್ಷ ಸುಮಾರು 15 ಲಕ್ಷ ಇಂಜಿನಿಯರ್‌ಗಳು ಪದವಿ ಪಡೆದು ಹೊರಬೀಳುತ್ತಾರೆ. ಆದರೆ ಹೆಚ್ಚಿನವರಲ್ಲಿ ಉದ್ಯಮಕ್ಕೆ ಬೇಕಾದ ಕೌಶಲ್ಯದ ಕೊರತೆ ಇರುತ್ತದೆ.ಇದಲ್ಲದೆ ಸದ್ಯ ಜನರೇಟಿವ್‌ ಎಐ ನಾಗಾಲೋಟದಲ್ಲಿದೆ. ಕೃತಕ ಬುದ್ಧಿಮತ್ತೆ (ಎಐ) ಮುಂದಿನ ದಿನಗಳಲ್ಲಿ ಅಪ್ಲಿಕೇಶನ್ ಅಭಿವೃದ್ಧಿ ಮತ್ತು ನಿರ್ವಹಣೆಯಂತಹ ಕ್ಷೇತ್ರಗಳಲ್ಲಿ ಶೇ. 30-50ರಷ್ಟು ಉದ್ಯೋಗಗಳನ್ನು ಕಿತ್ತುಕೊಳ್ಳುವ ಸಾಧ್ಯತೆ ಇದೆ. ಎಐ (ಎಐ) ಜೊತೆ ಕೆಲಸ ಮಾಡಲು ಕಲಿಯುವವರು ಮಾತ್ರ ಉಳಿಯಲಿದ್ದಾರೆ.ಜಿಸಿಸಿಗಳಲ್ಲಿ ನೇಮಕದ ನಿರೀಕ್ಷೆ2027ರ ನಂತರ, ಐಟಿ ಸೇವಾ ಕಂಪನಿಗಳ ಬದಲು ಗ್ಲೋಬಲ್ ಕೆಪಬಿಲಿಟಿ ಸೆಂಟರ್‌ಗಳು (ಜಿಸಿಸಿಗಳು) ಅತಿ ಹೆಚ್ಚು ಫ್ರೆಶರ್‌ಗಳನ್ನು ನೇಮಿಸಿಕೊಳ್ಳಬಹುದು ಎಂದು ತಜ್ಞರು ಅಂದಾಜಿಸಿದ್ದಾರೆ.ಸದ್ಯ ಎಐ ಮತ್ತು ಜೆನ್‌ಎಐನಂತಹ ವಿಶೇಷ ಕೌಶಲ್ಯ ಹೊಂದಿರುವ ಫ್ರೆಶರ್‌ಗಳು ವಾರ್ಷಿಕ 6-9 ಲಕ್ಷ ರೂ.ವರೆಗೆ ಸಂಬಳ ಪಡೆಯುತ್ತಿದ್ದಾರೆ. ಆದರೆ ಇವರ ಸಂಖ್ಯೆ ತೀರಾ ಕಡಿಮೆ.ತಪ್ಪು ಯಾರದ್ದು?ಒಂದೆಡೆ ಕಂಪನಿಗಳು ಫ್ರೆಶರ್‌ಗಳಲ್ಲಿ ಕೌಶಲ್ಯವಿಲ್ಲ ಎಂದು ಅವರನ್ನು ದೂಷಿಸುತ್ತಿವೆ. ಹಾಗಾದರೆ ಶಿಕ್ಷಣಕ್ಕೆ ಸಾಲ ಮಾಡಿ, ಪದವಿ ಪಡೆದರೂ ಉದ್ಯೋಗಕ್ಕೆ ಸಿದ್ಧವಾಗದ ವಿದ್ಯಾರ್ಥಿಗಳ ಪರಿಸ್ಥಿತಿ ಏನು? ‘ಕೆರಿಯರ್ಸ್360’ ಸಂಸ್ಥಾಪಕ ಮಹೇಶ್ವರ್ ಪೇರಿ ಅವರ ಪ್ರಕಾರ, ಇದು ವಿದ್ಯಾರ್ಥಿಗಳ ತಪ್ಪಲ್ಲ, ವ್ಯವಸ್ಥೆಯ ವೈಫಲ್ಯ.”ಕಾಲೇಜುಗಳಿಗೆ ನಾವು ಅನುಮತಿ ನೀಡಿದೆವು, ಪಠ್ಯಕ್ರಮವನ್ನು ನಾವೇ ರೂಪಿಸಿದೆವು, ಪರೀಕ್ಷೆ ಮಾಡಿ ಉತ್ತೀರ್ಣ ಮಾಡಿದೆವು. ಆದರೆ ಅವರಿಗೆ ಉದ್ಯೋಗ ಕೌಶಲ್ಯ ನೀಡುವಲ್ಲಿ ವಿಫಲವಾದಾಗ, ಅವರನ್ನು ದೂಷಿಸುತ್ತೇವೆ. ಪರೀಕ್ಷೆಯಲ್ಲಿ ಪಾಸಾಗಿದ್ದು ಅವರು, ಫೇಲಾಗಿದ್ದು ನಾವು,” ಎನ್ನುತ್ತಾರೆ ಅವರು.ಒಟ್ಟಿನಲ್ಲಿ, ಐಟಿ ಉದ್ಯಮವು ದೊಡ್ಡ ಬದಲಾವಣೆಯ ಹಾದಿಯಲ್ಲಿದ್ದು, ಇಲ್ಲಿ ‘ಬಲಿಷ್ಠರ ಉಳಿವು’ ಮಾತ್ರ ಸಾಧ್ಯ ಎಂಬ ಪರಿಸ್ಥಿತಿ ಇದೆ.