ಮಂಗಳೂರಿನಲ್ಲಿ ಆನ್‌ಲೈನ್ ಹೂಡಿಕೆ ನೆಪದಲ್ಲಿ ಕೋಟಿಗೂ ಹೆಚ್ಚು ವಂಚನೆ

ಮಂಗಳೂರು: ಆನ್‌ಲೈನ್‌ ಮೂಲಕ ಹೂಡಿಕೆ ನೆಪದಲ್ಲಿ ವ್ಯಕ್ತಿಯೊಬ್ಬರಿಗೆ 1,14,50,000 ರೂ. ವಂಚನೆ ಮಾಡಿರುವ ಬಗ್ಗೆ ಸೈಬರ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ದೂರುದಾರ ವ್ಯಕ್ತಿ ತನ್ನ ಉಳಿತಾಯದ ಹಣವನ್ನು ಬ್ಯಾಂಕ್‌ ಖಾತೆಯಲ್ಲಿರಿಸಿದ್ದರು. ಜು. 17ರಂದು ಅವರನ್ನು ಅಪರಿಚಿತನೊಬ್ಬ ಸ್ಟಾಕ್‌ ಎಕ್ಸ್‌ಚೇಂಜ್‌ ವಾಟ್ಸ್‌ಆಯಪ್‌ ಗ್ರೂಪ್‌ಗೆ ಸೇರಿಸಿದ್ದನು.

ಗ್ರೂಪ್‌ ಅಡ್ಮಿನ್‌ ವಿರೇಂದರ್‌ ಸಿಂಗ್‌ ಎಂಬಾತ ಸಂದೇಶ ಕಳುಹಿಸಿ ಸ್ಟಾಕ್‌ ಮಾರ್ಕೆಟ್‌ನಲ್ಲಿ ಹೂಡಿಕೆ ಮಾಡಿದರೆ ಹೆಚ್ಚಿನ ಲಾಭಗಳಿಸುವ ಆಮಿಷ ತೋರಿಸಿದನು.

ಅದರಂತೆ ಆ. 11ರಂದು ಅಪರಿಚಿತ ಮಹಿಳೆ ಕ್ರಿಸ್ಟಿನ್‌ ಎಂಬವಳನ್ನು ವಾಟ್ಸ್‌ಆಯಪ್‌ ಮೂಲಕ ಸಂಪರ್ಕಿಸಿ ಮಾರುಕಟ್ಟೆ ಬಗ್ಗೆ ವಿಚಾರಿಸಿದ್ದರು. ಬಳಿಕ ಆ. 13ರಿಂದ ಸೆ. 2ರ ವರೆಗೆ ಹಂತ ಹಂತವಾಗಿ ಆರ್‌ಟಿಜಿಎಸ್‌, ನೆಫ್ಟ್‌ ಮೂಲಕ 1,14,50,000 ರೂ.ಗಳನ್ನು ಬೇರೆ ಬೇರೆ ಖಾತೆಗಳಿಗೆ ವರ್ಗಾಯಿಸಿದ್ದರು.ಬಳಿಕ ಶೇ. 20ರಷ್ಟು ಹೆಚ್ಚಿನ ತೆರಿಗೆ ಪಾವತಿಸುವಂತೆ ಹಾಗೂ ಹೂಡಿಕೆ ಮಾಡದಿದ್ದರೆ ಹಣ ಹಿಂಪಡೆಯಲು ಆಗುವುದಿಲ್ಲ ಎಂದು ತಿಳಿಸಿದ್ದರು.

23.96 ಲಕ್ಷ ರೂ. ವಂಚನೆ
ಮಂಗಳೂರು: ಟ್ರೇಡಿಂಗ್‌ ಜಾಹೀರಾತು ನೋಡಿ ಹಣ ಹೂಡಿಕೆ ಮಾಡಲು ಹೋಗಿ 23,96,980 ರೂ. ಕಳೆದುಕೊಂಡಿರುವ ಬಗ್ಗೆ ಮಂಗಳೂರು ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ದೂರುದಾರರು ದುಬಾೖಯಲ್ಲಿ ಕೆಲಸ ಮಾಡಿ ನಿವೃತ್ತಿ ಹೊಂದಿ ಮನೆಯಲ್ಲಿದ್ದರು. 2024ರ ಫೆ. 27ರಂದು ಟ್ರೇಡಿಂಗ್‌ ಜಾಹೀರಾತು ನೋಡಿ ನೋಂದಣಿ ಮಾಡಿ ಮೊದಲಿಗೆ 82,862 ರೂ. ವರ್ಗಾಯಿಸಿದ್ದರು. ಅನಂತರ ಹಂತಹಂತವಾಗಿ ಒಟ್ಟು 23,96,980 ರೂ.ಗಳನ್ನು ವಿವಿಧ ಖಾತೆಗಳಿಗೆ ವರ್ಗಾಯಿಸಿದ್ದರು.