ಉತ್ತರ ಕೊರಿಯಾದ ಯುದ್ಧನೌಕೆ ಬಿಡುಗಡೆ ವಿಫಲ: ಕಿಮ್ ಜಾಂಗ್ ಉನ್ ಕಣ್ಣೆದುರೇ ದುರಂತ

ಪ್ಯೊಂಗ್ಯಾಂಗ್: ಉತ್ತರ ಕೊರಿಯಾದ ಹೊಸ 5,000 ಟನ್ ನೌಕಾಪಡೆಯ ಹಡಗು ಬಿಡುಗಡೆ ಮಾಡುವಾಗಲೇ ಮಗುಚಿ ಬಿದ್ದು ಒಡೆದುಹೋಗಿದೆ. ಈ ಘಟನೆ ಕಿಮ್ ಜಾಂಗ್ ಉನ್ ಅವರ ಕಣ್ಣೆದುರೇ ನಡೆದಿದೆ ಎಂದು ವರದಿಯಾಗಿದೆ. ಪೂರ್ವ ಕರಾವಳಿ ನಗರವಾದ ಚೊಂಗ್ಜಿನ್ನಲ್ಲಿ ನಡೆದ ಈ ಘಟನೆಯಿಂದ ಕಿಮ್ ಜಾಂಗ್ ಉನ್ ತೀವ್ರ ಕೋಪಗೊಂಡಿದ್ದಾರೆ ಎಂದು ವರದಿಗಳು ತಿಳಿಸಿವೆ. ‘ಸಂಪೂರ್ಣ ನಿರ್ಲಕ್ಷ್ಯ’ದಿಂದ ಉಂಟಾದ ‘ಅಪರಾಧ’ ಎಂದು ಕಿಮ್ ಈ ದುರಂತವನ್ನು ಬಹಿರಂಗವಾಗಿ ಖಂಡಿಸಿದ್ದಾರೆ ಎಂದು ಅಧಿಕೃತ ಮಾಧ್ಯಮಗಳು ವರದಿ ಮಾಡಿವೆ.

ಹೊಸ ಉಪಗ್ರಹ ಚಿತ್ರಗಳಲ್ಲಿ ಯುದ್ಧನೌಕೆ ನೀರಿನಲ್ಲಿ ಒಂದು ಬದಿಗೆ ವಾಲಿರುವುದು ಕಂಡುಬಂದಿದೆ. ಹಡಗಿಗೆ ಆದ ಹಾನಿಯನ್ನು ಮರೆಮಾಚಲು ನೀಲಿ ಟಾರ್ಪಾಲಿನ್‌ಗಳಿಂದ ಭಾಗಶಃ ಮುಚ್ಚಲಾಗಿದೆ. ಸಾಗಣೆ ತೊಟ್ಟಿಲು ಮೊದಲು ಜಾರಿದರೆ, ನಂತರ ಹಡಗು ಸಮತೋಲನ ಕಳೆದುಕೊಂಡಿತು ಮತ್ತು ಕೆಳಭಾಗದಲ್ಲಿ ರಂಧ್ರಗಳು ಬಿದ್ದವು ಎಂದು ಅಧಿಕೃತ ಕೊರಿಯನ್ ಸೆಂಟ್ರಲ್ ನ್ಯೂಸ್ ಏಜೆನ್ಸಿ (KCNA) ವರದಿ ಮಾಡಿದೆ.

ಹಡಗು ಬಿಡುಗಡೆ ಮಾಡುವಾಗ ಕಿಮ್ ಜಾಂಗ್ ಉನ್ ಕೂಡ ಸ್ಥಳದಲ್ಲಿದ್ದರು. ಈ ಘಟನೆ ಅವರಿಗೆ ತೀವ್ರ ಮುಜುಗರ ಉಂಟುಮಾಡಿದೆ ಎಂದು ಹೇಳಲಾಗುತ್ತಿದೆ. ಈ ಘಟನೆಯಲ್ಲಿ ಭಾಗಿಯಾಗಿದ್ದ ಅಧಿಕಾರಿಗಳು, ವಿಜ್ಞಾನಿಗಳು ಮತ್ತು ಹಡಗುಕಟ್ಟೆಯ ನಿರ್ವಾಹಕರನ್ನು ಕಿಮ್ ತೀವ್ರವಾಗಿ ಟೀಕಿಸಿದ್ದು, ಅವರಿಗೆ ಗಲ್ಲು ಶಿಕ್ಷೆ ವಿಧಿಸುವ ಸಾಧ್ಯತೆಗಳೂ ಇದೆ ಎನ್ನಲಾಗಿದೆ. ಜೂನ್ ಅಂತ್ಯದಲ್ಲಿ ನಡೆಯಲಿರುವ ಪಕ್ಷದ ಪೂರ್ಣ ಸಭೆಗೆ ಮೊದಲು ಹಡಗಿನ ದುರಸ್ತಿ ಕಾರ್ಯವನ್ನು ಪೂರ್ಣಗೊಳಿಸುವಂತೆ ಆದೇಶಿಸಿದ್ದಾರೆ. ಏಪ್ರಿಲ್‌ನಲ್ಲಿ ಉತ್ತರ ಕೊರಿಯಾ ಇದೇ ರೀತಿಯ 5,000 ಟನ್‌ಗಳ ಯುದ್ಧನೌಕೆಯನ್ನು ಬಿಡುಗಡೆ ಮಾಡಿತ್ತು. ಇದನ್ನು ಅತ್ಯಂತ ದೊಡ್ಡ ಮತ್ತು ಅತ್ಯಾಧುನಿಕ ಯುದ್ಧನೌಕೆಗಳಲ್ಲಿ ಒಂದೆಂದು ಬಣ್ಣಿಸಲಾಗಿತ್ತು.

ಒಂದು ಬದಿಯಿಂದ ಬಿಡುಗಡೆ ಮಾಡುವ ಪ್ರಯತ್ನದಿಂದಾಗಿ ಹಡಗು ಬಿಡುಗಡೆ ವಿಫಲವಾಗಿದೆ ಎಂದು ಯುಎಸ್ ಏಜೆನ್ಸಿಗಳೊಂದಿಗೆ ಸಹಕರಿಸಿ ದಕ್ಷಿಣ ಕೊರಿಯಾದ ಮಿಲಿಟರಿ ಮತ್ತು ಗುಪ್ತಚರ ವಲಯಗಳು ನಡೆಸಿದ ಮೌಲ್ಯಮಾಪನದಲ್ಲಿ ತಿಳಿದುಬಂದಿದೆ ಎಂದು ವರದಿಗಳು ತಿಳಿಸಿವೆ. ಉತ್ತರ ಕೊರಿಯಾದ ಅಧಿಕಾರಿಗಳು ನಷ್ಟದ ತೀವ್ರತೆಯನ್ನು ಕಡಿಮೆ ಮಾಡುತ್ತಿದ್ದಾರೆ ಎಂದು ಹೇಳಲಾಗುತ್ತಿದೆ. ಆದರೆ, ಕೋಪಗೊಂಡಿರುವ ಕಿಮ್ ಕಠಿಣ ಕ್ರಮ ಕೈಗೊಳ್ಳುವ ಸಾಧ್ಯತೆಯಿದೆ. ದುರಂತಕ್ಕೆ ಕಾರಣರಾದವರಿಗೆ ಮರಣದಂಡನೆ ವಿಧಿಸಬಹುದು ಎಂದು ರಾಜಕೀಯ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.