ಹೊಸ ರೀತಿಯ ಟ್ಯಾಕ್ಸಿ ಸರ್ವಿಸ್ – ಪಾರ್ಸೆಲ್ ರೂಪದಲ್ಲಿ ಬೇಕಾದ ಜಾಗಕ್ಕೆ ಎತ್ತಾಕೊಂಡು ಹೋಗ್ತಾರೆ

ಬೆಂಗಳೂರು :ನಗರದಲ್ಲಿ ಬೈಕ್‌ ಟ್ಯಾಕ್ಸಿ ಸೇವೆ ನಿನ್ನೆಯಿಂದ ನಿರ್ಬಂಧ ಇದೆ. ಈ ನಡುವೆ ಲಕ್ಷಾಂತರ ಉದ್ಯೋಗಿಗಳು ಬೀದಿಗೆ ಬಿದ್ದಿದ್ದಾರೆ. ಇಷ್ಟೇ ಅಲ್ಲದೆ ಅಕಸ್ಮಾತ್‌ ಯಾರಾದರೂ ಕಾನೂನು ಮೀರಿ ಈ ಸೇವೆ ನೀಡುತ್ತಾರಾ ಎಂದು ಆಟೋ ಹಾಗೂ ಕ್ಯಾಬ್‌ ಡ್ರೈವರ್‌ಗಳು ಹದ್ದಿನ ಕಣ್ಣನ್ನು ಇಟ್ಟಿದ್ದಾರೆ.

ಹೌದು. ಬೈಕ್‌ ಟ್ಯಾಕ್ಸಿ ನಗರದಲ್ಲಿ ಹೆಚ್ಚು ಜನಪ್ರಿಯತೆ ಪಡೆದುಕೊಂಡಿದೆ. ಇದರಿಂದ ಪ್ರಯಾಣಿಕರಿಗೆ ಹಣ ಹಾಗೂ ಸಮಯ ಎಲ್ಲವೂ ಉಳಿತಾಯ ಆಗಲಿದೆ. ಇದೇ ಕಾರಣಕ್ಕೆ ಸಾಕಷ್ಟು ಉದ್ಯೋಗಿಗಳು ಈಬೈಕ್‌ ಟ್ಯಾಕ್ಸಿ ಸೇವೆ ಬಳಕೆ ಮಾಡುತ್ತಿದ್ದರು. ಈಗ ಅದನ್ನು ನಿರ್ಬಂಧ ಮಾಡಲಾಗಿದೆಯಾದರೂ ಈ ಸೇವೆ ನೀಡುವ ಸಂಸ್ಥೆಗಳು ರಂಗೋಲಿ ಕೆಳಿಗೆ ತೂರುವ ಕೆಲಸ ಮಾಡುತ್ತಿದ್ದಾರೆ.

ನ್ಯಾಯಾಲಯ ಹಾಗೂ ಸರ್ಕಾರ ಈಗಾಗಲೇ ಈ ಬಗ್ಗೆ ದೃಢ ನಿರ್ಧಾರವನ್ನು ಪ್ರಕಟ ಮಾಡಿದೆ. ಈ ನಡುವೆ ನ್ಯಾಯಾಲಯದ ಆದೇಶಕ್ಕೆ ತಲೆ ಬಾಗುತ್ತೇವೆ ಎಂದು ಹೇಳಿರುವ ಕಂಪೆನಿಗಳು ಬೇರೆ ಸ್ವರೂಪದಲ್ಲಿ ಈ ಸೇವೆಯನ್ನು ಮುಂದುವರೆಸಿವೆ ಎಂದು ತಿಳಿದುಬಂದಿದೆ. ಅಂದರೆ ಪ್ರಯಾಣಿಕರು ಈಗ ಪಾರ್ಸೆಲ್‌ (Parcel)ರೂಪದಲ್ಲಿ ಸಂಚಾರ ಮಾಡಬಹುದಾಗಿದೆ.

ಪಾರ್ಸೆಲ್ ಸೇವೆ
ವಿಚಿತ್ರ ಎನಿಸಿದರೂ ಸತ್ಯ. ಈಗ ಬೆಂಗಳೂರಿನಿಂದ ಹೊಸ ಕಥೆಯೊಂದು ಕೇಳಿಬರುತ್ತಿದೆ, ಆಪ್‌ ಆಧಾರಿತ ರೈಡ್ ಅಗ್ರಿಗೇಟರ್ ರಾಪಿಡೊ (Rapido) ನಿಷೇಧಿತ ‘ಬೈಕ್ ಟ್ಯಾಕ್ಸಿ’ ಸೇವೆಯನ್ನು ‘ಬೈಕ್ ಪಾರ್ಸೆಲ್’ ಸೇವೆಯೊಂದಿಗೆ ಜಾಣತನದಿಂದ ಬದಲಾಯಿಸಿಕೊಂಡಿದೆ. ಟ್ರಾಫಿಕ್ ಜಾಮ್ ಮತ್ತು ಕಳಪೆ ರಸ್ತೆ ಮೂಲಸೌಕರ್ಯಗಳಿಂದ ತೊಂದರೆಗೀಡಾದ ಪ್ರಯಾಣಿಕರಿಗೆ ಈ ಸೇವೆ ನೀಡುತ್ತೇವೆ ಎಂದು ಘೋಷಣೆ ಮಾಡಿದೆ.
ಆದರೆ ಪ್ರಯಾಣಿಕರು ಪಾರ್ಸೆಲ್‌ಗೆ ಎಂದು ಬುಕ್‌ ಮಾಡುವ ಮೂಲಕ ತಾವೇ ಪ್ರಯಾಣ ಬೆಳೆಸುತ್ತಿದ್ದಾರೆ ಅನ್ನೋ ಮಾತುಗಳು ಕೇಳಿಬಂದಿವೆ. ನ್ಯಾಯಾಲಯವು ಈ ‘ಬೈಕ್ ಟ್ಯಾಕ್ಸಿಗಳು’ ಕಾನೂನುಬಾಹಿರ ಎಂದು ತೀರ್ಪು ನೀಡಿದೆ. ಕಳೆದ ಶುಕ್ರವಾರ, ಅಂದರೆ, ಜೂನ್ 13 ರಂದು, ಉಬರ್, ಓಲಾ ಮತ್ತು ರ್ಯಾಪಿಡೊ ಅಪ್ಲಿಕೇಶನ್‌ಗಳ ಹಿಂದಿನ ಕಂಪನಿಗಳು ಆ ನಿಷೇಧವನ್ನು ತಡೆಹಿಡಿಯಲು ಮಾಡಿದ ಮನವಿಯನ್ನು ಸಹ ವಿಭಾಗೀಯ ಪೀಠ ನಿರಾಕರಿಸಿದೆ. ಮೋಟಾರು ವಾಹನ ಕಾಯ್ದೆಯಡಿಯಲ್ಲಿ ‘ಬೈಕ್ ಟ್ಯಾಕ್ಸಿ’ಗಳಿಗೆ ರಾಜ್ಯ ಸರ್ಕಾರ ನಿರ್ದಿಷ್ಟ ನಿಯಮಗಳು ಮತ್ತು ಮಾರ್ಗಸೂಚಿಗಳನ್ನು ತಿಳಿಸುವವರೆಗೆ ನಿಷೇಧವು ಜಾರಿಯಲ್ಲಿರುತ್ತದೆ ಎಂದು ತಿಳಿಸಲಾಗಿದೆ.

ಒಂದು ವೇಳೆ ನಿಯಮಗಳನ್ನು ರೂಪಿಸುವಲ್ಲಿ ಪ್ರಗತಿ ಸಾಧಿಸಿದ್ದರೆ, ಅದಕ್ಕೆ ತಡೆಯಾಜ್ಞೆ ನೀಡುವ ಸಾಧ್ಯತೆ ಇದೆ ಎಂದು ನ್ಯಾಯಾಲಯ ಹೇಳಿದೆ. ಜೊತೆಗೆ ನ್ಯಾಯಾಲಯವು ಮುಂದಿನ ವಿಚಾರಣೆಯನ್ನು ಜೂನ್ 24 ಕ್ಕೆ ನಿಗದಿಪಡಿಸಿದೆ. ಅದಾಗ್ಯೂ ಸಾಮಾಜಿಕ ಜಾಲತಾಣದಲ್ಲಿ ಜನರು ಉಲ್ಲೇಖ ಮಾಡಿದಂತೆ ಕರ್ನಾಟಕದಲ್ಲಿ ಇಂದಿನಿಂದ ಬೈಕ್ ಟ್ಯಾಕ್ಸಿ ನಿಷೇಧ ಆರಂಭವಾಗುತ್ತದೆ. ಆದರೆ, ರಾಪಿಡೋ ಬೈಕ್ ಆಪ್‌ನಲ್ಲಿರುವ ಉತ್ಪನ್ನ ಮಾಲೀಕರು ಈಗಾಗಲೇ ಕಾನೂನನ್ನು ಮೀರಿದ್ದಾರೆ. ರೈಡ್ ಬುಕ್ ಮಾಡಲು ಸಾಧ್ಯವಿಲ್ಲವೇ? ಚಿಂತಿಸಬೇಡಿ ನೀವೇ ಪಾರ್ಸೆಲ್ ಆಗಿ ಎಂದು ಧನ್ವಿ ಎಂಬ ಎಕ್ಸ್‌ ಬಳಕೆದಾರರು ‘ಬೈಕ್ ಪಾರ್ಸೆಲ್’ ಬುಕಿಂಗ್‌ನ ಸ್ಕ್ರೀನ್‌ಶಾಟ್‌ನೊಂದಿಗೆ ಈ ಮಾಹಿತಿ ನೀಡಿದ್ದಾರೆ.

ಮತ್ತೊಬ್ಬ ಎಕ್ಸ್‌ ಬಳಕೆದಾರೆ ಅಮುತಾ ಭಾರತಿ ಕೂಡ ಇದೇ ರೀತಿಯ ಪ್ರತಿಕ್ರಿಯೆ ನೀಡಿದ್ದಾರೆ. ಕರ್ನಾಟಕ ಹೈಕೋರ್ಟ್ ಇಂದಿನಿಂದ ರಾಜ್ಯಾದ್ಯಂತ ಬೈಕ್ ಟ್ಯಾಕ್ಸಿಗಳನ್ನು ನಿಷೇಧಿಸಿದೆ… ಉಬರ್ ‘ಮೋಟೋ’ ಹೆಸರನ್ನು ‘ಮೋಟೋ ಕೊರಿಯರ್’ ಎಂದು ಬದಲಾಯಿಸಿದೆ. ರಾಪಿಡೋ ‘ಬೈಕ್’ ಹೆಸರನ್ನು “ಬೈಕ್ ಪಾರ್ಸೆಲ್” ಎಂದು ಬದಲಾಯಿಸಿದೆ… ಬುದ್ಧಿವಂತ ನಡೆ… ಎಂದು ಬರೆದುಕೊಂಡಿದ್ದಾರೆ.