ಮಂಗಳೂರು: ಬಸ್ ಸೀಟಿಗಾಗಿ ಗಲಾಟೆ ಚೂರಿ ಇರಿದು ಅಂತ್ಯ

ಮಂಗಳೂರು: ಬಸ್ಸಿನ ಸೀಟಿನ ವಿಚಾರವಾಗಿ ನಡೆದ ಜಗಳವೊಂದು ಚೂರಿ ಇರಿತದಲ್ಲಿ ಕೊನೆಯಾದ ಘಟನೆ ಬಜಾಲ್‌ ಬಳಿ ಗುರುವಾರ ರಾತ್ರಿ ನಡೆದಿದೆ.

ಸ್ಟೇಟ್‌ಬ್ಯಾಂಕ್‌ನಿಂದ ಬಜಾಲ್‌ ಜೆ.ಎಂ. ರಸ್ತೆಗೆ ಆಗಮಿಸಿದ ಸಿಟಿ ಬಸ್ಸಿನಲ್ಲಿ ಸ್ಥಳೀಯರಾದ ನಾರಾಯಣ ಮತ್ತು ಉತ್ತರ ಭಾರತ ಮೂಲದ ನೀರಜ್‌ ಎಂಬಾತನ ನಡುವೆ ಸೀಟಿನ ವಿಚಾರವಾಗಿ ಗಲಾಟೆಯಾಗಿದೆ.

ಬಸ್‌ ಇಳಿದ ಬಳಿಕ ಸ್ಥಳೀಯರಾದ ಪಿ. ಜಗದೀಶ್‌ ಶೆಟ್ಟಿ ಮತ್ತು ಇತರ ಇಬ್ಬರು ಊರವರು ಗಲಾಟೆ ಬಗ್ಗೆ ನಾರಾಯಣ ಅವರಲ್ಲಿ ವಿಚಾರಿಸಿದರು. ಆಗ ಅವರು ನಡೆದ ಘಟನೆಯನ್ನು ವಿವರಿಸಿದ್ದು, ಅಲ್ಲಿದ್ದ ಇತರರು ಅವರನ್ನು ಸಮಾಧಾನ ಪಡಿಸಿದ್ದರು.

ಸ್ಥಳೀಯರು ಸಮಾಧಾನ ಪಡಿಸುತ್ತಿದ್ದಾಗ ನೀರಜ್‌ ಅಲ್ಲಿಂದ ಹೋಗಿ 5 ನಿಮಿಷದಲ್ಲಿ ವಾಪಸು ಬಂದು “ಸಾಲೇ ತೇರೆಕೋ ಮಾರ್‌ ಡಾಲೂಂಗಾ’ ಎಂದು ಹೇಳಿ ಪ್ಯಾಂಟ್‌ನ ಕಿಸೆಯಲ್ಲಿದ್ದ ಚೂರಿಯಿಂದ ಜಗದೀಶ್‌ ಶೆಟ್ಟಿ ಅವರ ಎದೆಯ ಮಧ್ಯ ಭಾಗಕ್ಕೆ ಇರಿದನು. ಜಗದೀಶ್‌ ಅವರ ಟಿ-ಶರ್ಟ್‌ ಹರಿದು ರಕ್ತ ಸುರಿದಿದ್ದು, ತತ್‌ಕ್ಷಣ ಹತ್ತಿರದ ನರ್ಸಿಂಗ್‌ ಹೋಮ್‌ಗೆ ದಾಖಲಿಸಿ, ಅಲ್ಲಿಂದ ಹೆಚ್ಚಿನ ಚಿಕ್ಸಿತೆಗೆ ಬೇರೆ ಆಸ್ಪತ್ರೆಗೆ ಕರೆದೊಯಿದ್ದಾರೆ.

ಘಟನೆಗೆ ಸಂಬಂಧಿಸಿದಂತೆ ಆರೋಪಿ ವಿರುದ್ಧ ಕಂಕನಾಡಿ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.