ಮಧ್ಯಪ್ರದೇಶ: ಪ್ರೇಮ ಪ್ರಕರಣ ದುರಂತ ಅಂತ್ಯ – ಇನ್‌ಸ್ಟಾಗ್ರಾಮ್‌ ವಿಡಿಯೋ ಹಾಕಿ ಜಲಪಾತಕ್ಕೆ ಹಾರಿದ ಜೋಡಿ

ಮಧ್ಯಪ್ರದೇಶ, ಮೌಗಂಜ್: ಪ್ರೇಮ ಪ್ರಕರಣವೊಂದು ದುರಂತ ಅಂತ್ಯ ಕಂಡಿರುವ ಘಟನೆ ಮಧ್ಯಪ್ರದೇಶದ ಮೌಗಂಜ್‌ನಲ್ಲಿ ನಡೆದಿದೆ. 26 ವರ್ಷದ ಯುವಕ ದಿನೇಶ್ ಮತ್ತು ಆತನ 35 ವರ್ಷದ ಅತ್ತಿಗೆ ಶಕುಂತಲಾ ಸಾಹು, ಸಾಮಾಜಿಕ ಜಾಲತಾಣದಲ್ಲಿ ಸಿಂಧೂರ ಹಚ್ಚಿದ ವಿಡಿಯೋ ಅಪ್‌ಲೋಡ್ ಮಾಡಿದ ನಂತರ ಬಹುತಿ ಜಲಪಾತಕ್ಕೆ ಹಾರಿದ್ದಾರೆ.

ಬುಧವಾರ ಈ ಘಟನೆ ನಡೆದಿದೆ ಎನ್ನಲಾಗಿದೆ.

ನಾಲ್ಕು ದಿನಗಳಿಂದ ನಾಪತ್ತೆ, ನಂತರ ಜಲಪಾತದ ಬಳಿ ಪತ್ತೆ ದೇವರಾ ಖತ್ಖರಿ ಗ್ರಾಮದ ಟೇಲಿಯಾ ಬುಧ ನಿವಾಸಿಗಳಾದ ದಿನೇಶ್ (26) ಮತ್ತು ಆತನ ಅತ್ತಿಗೆ ಶಕುಂತಲಾ ಸಾಹು (35) ಕಳೆದ ನಾಲ್ಕು ದಿನಗಳಿಂದ ನಾಪತ್ತೆಯಾಗಿದ್ದರು. ಬುಧವಾರ ದಿನೇಶ್ ಮತ್ತು ಶಕುಂತಲಾ ಬಹುತಿ ಜಲಪಾತದ ಬಳಿ ಇರುವ ಬಗ್ಗೆ ದಿನೇಶ್ ಕುಟುಂಬಕ್ಕೆ ಮಾಹಿತಿ ಸಿಕ್ಕಿತ್ತು. ಕೂಡಲೇ ಕುಟುಂಬಸ್ಥರು ಅವರನ್ನು ಸಮಾಧಾನಪಡಿಸಲು ಜಲಪಾತದ ಕಡೆಗೆ ಧಾವಿಸಿದ್ದಾರೆ. ಆದರೆ, ಅವರು ತಲುಪುವಷ್ಟರಲ್ಲಿ ದಿನೇಶ್ ಮತ್ತು ಶಕುಂತಲಾ ಈಗಾಗಲೇ ಜಲಪಾತಕ್ಕೆ ಹಾರಿದ್ದರು. ಸದ್ಯ ಇಬ್ಬರಿಗಾಗಿ ಶೋಧ ಕಾರ್ಯ ನಡೆಯುತ್ತಿದೆ.

ಸಾಮಾಜಿಕ ಜಾಲತಾಣದಲ್ಲಿ ಆತ್ಮಹತ್ಯೆಯ ಸುಳಿವು ಘಟನಾ ಸ್ಥಳದಲ್ಲಿದ್ದವರು ಪೊಲೀಸರಿಗೆ ಮಾಹಿತಿ ನೀಡಿದ್ದು, ನೈಗರ್ಹಿ ಮತ್ತು ಶಹಪುರ್ ಪೊಲೀಸರು ತಕ್ಷಣ ಸ್ಥಳಕ್ಕೆ ಧಾವಿಸಿದ್ದಾರೆ. ರಾತ್ರಿ ಕತ್ತಲೆಯಿಂದಾಗಿ ಶೋಧ ಕಾರ್ಯಾಚರಣೆ ನಡೆಸಲಾಗಲಿಲ್ಲ. ಗುರುವಾರ ಬೆಳಗ್ಗೆ ಇಬ್ಬರಿಗಾಗಿಯೂ ತೀವ್ರ ಶೋಧ ಕಾರ್ಯ ಆರಂಭಿಸಲಾಗಿದೆ.

ಕುಟುಂಬ ಸದಸ್ಯರ ಪ್ರಕಾರ, ಶಕುಂತಲಾ ಮತ್ತು ದಿನೇಶ್ ಜುಲೈ 19 ರಂದು ಮನೆಯಿಂದ ಹೊರಟಿದ್ದರು. ದಿನೇಶ್ ಬುಧವಾರ ಸಂಜೆ ಬಹುತಿ ಜಲಪಾತದಿಂದ ಇನ್‌ಸ್ಟಾಗ್ರಾಮ್‌ನಲ್ಲಿ ಫೋಟೋ ಮತ್ತು ಸ್ಟೋರಿ ಪೋಸ್ಟ್ ಮಾಡಿದಾಗ ಅವರ ಇರುವಿಕೆ ಪತ್ತೆಯಾಗಿದೆ. ಆ ವಿಡಿಯೋದಲ್ಲಿ ದಿನೇಶ್‌, ಶಕುಂತಲಾ ಹಣೆಗೆ ಸಿಂಧೂರ ಹಚ್ಚಿ ಆತ್ಮಹತ್ಯೆ ಮಾಡಿಕೊಳ್ಳುವ ಉದ್ದೇಶವನ್ನು ವ್ಯಕ್ತಪಡಿಸಿದ್ದ. ಆತ್ಮಹತ್ಯೆ ಮಾಡಿಕೊಳ್ಳುವ ಮೊದಲು, ದಿನೇಶ್ ಇನ್‌ಸ್ಟಾಗ್ರಾಮ್ ಮತ್ತು ಫೇಸ್‌ಬುಕ್‌ನಲ್ಲಿ “ನಮಗೆ ಇನ್ನು ಮುಂದೆ ಸಹಿಸಲು ಸಾಧ್ಯವಿಲ್ಲ. ನಾವು ಬಹುತಿ ಜಲಪಾತದಿಂದ ಜಿಗಿಯಲಿದ್ದೇವೆ” ಎಂದು ಬರೆದುಕೊಂಡಿದ್ದ.

ಸಂಬಂಧಿಕರ ವಿರುದ್ಧ ಆರೋಪ, ಪತಿ ನಿರಾಕರಣೆ ದಿನೇಶ್ ಮತ್ತಷ್ಟು ಬರೆದು, “ನಮ್ಮ ಸಾವಿಗೆ ಕಾರಣರಾದ ಹೀರಾಬಾಲ್ ಸಾಹು, ರಾಜೇಂದ್ರ ಸಾಹು, ಸಂತೋಷ್ ಸಾಹು ಮತ್ತು ರಾಜಕುಮಾರ್ ಸಾಹು ಎಂಬ ಅಪರಾಧಿಗಳಿಗೆ ಶಿಕ್ಷೆ ನೀಡುವಂತೆ ಸರಕಾರಕ್ಕೆ ಕೈಮುಗಿದು ಕೇಳಿಕೊಳ್ಳುತ್ತೇವೆ” ಎಂದಿದ್ದರು. ಬುಧವಾರ, ದಿನೇಶ್ ತನ್ನ ಪ್ರೇಯಸಿ ಶಕುಂತಲಾ ಅವರೊಂದಿಗೆ ಇನ್‌ಸ್ಟಾಗ್ರಾಮ್‌ನಲ್ಲಿ ಲೈವ್ ಬಂದಿದ್ದರು. ವಿಡಿಯೋದಲ್ಲಿ, ಅವರು ಬಸ್‌ನಲ್ಲಿ ಪ್ರಯಾಣಿಸುತ್ತಿರುವುದು ಕಂಡುಬಂದಿದೆ.

ಆದರೆ, ಶಕುಂತಲಾ ಅವರ ಪತಿ ಹೀರಾಬಾಲ್ ಸಾಹು, ಆತ್ಮಹತ್ಯೆ ಪತ್ರದಲ್ಲಿ ಮಾಡಲಾದ ಎಲ್ಲಾ ಆರೋಪಗಳನ್ನು ನಿರಾಕರಿಸಿದ್ದಾರೆ. “ಈ ಸಂಬಂಧ ಹೇಗೆ ಅಥವಾ ಯಾವಾಗ ಪ್ರಾರಂಭವಾಯಿತು ಎಂದು ನಮಗೆ ತಿಳಿದಿಲ್ಲ. ನನ್ನ ಮತ್ತು ನನ್ನ ಸಹೋದರರ ವಿರುದ್ಧ ಮಾಡಿರುವ ಆರೋಪಗಳು ಸಂಪೂರ್ಣ ಸುಳ್ಳು. ನಾವು ಎಂದಿಗೂ ಅವರಿಗೆ ತೊಂದರೆ ಕೊಟ್ಟಿಲ್ಲ ಅಥವಾ ಕೆಟ್ಟದಾಗಿ ನಡೆಸಿಕೊಂಡಿಲ್ಲ” ಎಂದು ಅವರು ಹೇಳಿದ್ದಾರೆ. ತಮಗೆ ಮೂವರು ಪುತ್ರಿಯರಿದ್ದಾರೆ, ಹಿರಿಯ ಮಗಳಿಗೆ 11 ವರ್ಷ, ಎರಡನೆಯವಳಿಗೆ 8 ವರ್ಷ ಮತ್ತು ಮೂರನೆಯವಳಿಗೆ ಸುಮಾರು 4 ವರ್ಷ ಎಂದು ತಿಳಿಸಿದ್ದಾರೆ. ಇತ್ತೀಚೆಗೆ ರಸ್ತೆ ಅಪಘಾತದಲ್ಲಿ ಕಿರಿಯ ಮಗಳು ವಿಕಲಚೇತನಳಾಗಿದ್ದಾಳೆ ಎಂದು ಹೇಳಿಕೊಂಡಿದ್ದಾರೆ.

ಶಕುಂತಲಾ ಅವರ ತಂದೆ, ಗೌರಿ ಗ್ರಾಮದ ಚಂದ್ರಶೇಖರ್ ಸಾಹು, ತಮ್ಮ ಮಗಳು ಮದುವೆಯ ಬಗ್ಗೆ ಎಂದಿಗೂ ದೂರು ನೀಡಿರಲಿಲ್ಲ ಎಂದು ಹೇಳಿ ಆಘಾತ ವ್ಯಕ್ತಪಡಿಸಿದ್ದಾರೆ. “ಸುಮಾರು 15 ವರ್ಷಗಳ ಹಿಂದೆ, ನನ್ನ ಮಗಳಿಗೆ ಹೀರಾಬಾಲ್ ಸಾಹು ಅವರೊಂದಿಗೆ ಮದುವೆಯಾಗಿತ್ತು. ಮದುವೆಯಾದಾಗಿನಿಂದ ಅವರ ಸಂಬಂಧ ಸುಸ್ಥಿರವಾಗಿತ್ತು. ಅವರಿಗೆ ಮೂವರು ಹೆಣ್ಣು ಮಕ್ಕಳಿದ್ದಾರೆ. ಎಲ್ಲವೂ ಚೆನ್ನಾಗಿಯೇ ಇತ್ತು. ಅವಳು ಏಕೆ ಇಂತಹ ಕಠಿಣ ಹೆಜ್ಜೆ ಇಟ್ಟಳು ಎಂದು ನಮಗೆ ತಿಳಿದಿಲ್ಲ” ಎಂದು ಅವರು ಹೇಳಿದರು.