ಸಂಘರ್ಷದ ನಡುವೆ ಇಸ್ರೇಲ್‌ನಿಂದ ಆಹಾರದ ‘ಸೀಮಿತ’ ಹಸಿವು ಪರಿಹಾರ

ಜೆರುಸಲೇಂ: “ಆಲ್‌ ಆಫ್‌ ಗಾಜಾ“ದ ಹುಮ್ಮಸ್ಸಿನಲ್ಲಿರುವ ಇಸ್ರೇಲ್‌, ಗಾಜಾ ಪಟ್ಟಿಯ ಜನರ ಸಂಕಷ್ಟಗಳಿಗೆ ಕಿವಿಯಾಗುತ್ತಿಲ್ಲ ಎಂಬ ಆರೋಪಗಳು ಕೇಳಿಬರುತ್ತಿವೆ. ಗಾಜಾದಲ್ಲಿ ತೀವ್ರ ಆಹಾರ ಕೊರತೆ ಸಮಸ್ಯೆ ಎದುರಾಗಿದ್ದು, ಜನರು ತುತ್ತು ಅನ್ನಕ್ಕಾಗಿ ಪರದಾಡುವಂತಾಗಿದೆ. ಆದರೆ ಅಂತಾರಾಷ್ಟ್ರೀಯ ಮನವಿಯ ಹೊರತಾಗಿಯೂ, ಇಸ್ರೇಲ್‌ ಗಾಜಾ ಮೇಲಿನ ತನ್ನ ದಿಗ್ಬಂಧನವನ್ನು ಮುಂದುವರೆಸಿದೆ.

ಆದರೆ ಗಾಜಾ ಜನರ ಹಸಿವಿನ ಕೂಗು ಕೇಳಿಸಿಕೊಂಡಿರುವ ಇಸ್ರೇಲ್‌ ಪ್ರಧಾನಿ ಬೆಂಜಮಿನ್‌ ನೆತನ್ಯಾಹು, “ಗಾಜಾಗೆ ‘ಸೀಮಿತ ಪ್ರಮಾಣ’ದ ಆಹಾರ ಸರಬರಾಜು ಮಾಡಲು ಸಿದ್ಧ” ಎಂದು ಘೋಷಿಸಿದ್ದಾರೆ. ಇದರಿಂದ ತೀವ್ರ ಸಂಕಷ್ಟ ಎದುರಿಸುತ್ತಿರುವ ಗಾಜಾ ಜನರಿಗೆ ಮಾನವೀಯ ನೆರವು ದೊರೆಯಲಿದೆ.

ಇಸ್ರೇಲ್ ಡಿಫೆನ್ಸ್ ಫೋರ್ಸಸ್ (IDF) ಗಾಜಾದ ಉತ್ತರ ಮತ್ತು ದಕ್ಷಿಣ ಭಾಗಗಳಲ್ಲಿ ವಿಸ್ತಾರವಾದ ಕಾರ್ಯಾಚರಣೆಗಳನ್ನು ಪ್ರಾರಂಭಿಸಿದೆ. ಇದರಿಂದ ಗಾಜಾವನ್ನು ಸಂಪರ್ಕಿಸುವ ಬಹುತೇಕ ಎಲ್ಲಾ ರಸ್ತೆಗಳು ಸಂಪೂರ್ಣವಾಗಿ ಬಂದ್‌ ಆಗಿವೆ. ಹೀಗಾಗಿ ಗಾಜಾಗೆ ಆಹಾರ ಸರಬರಾಜು ಮಾಡುವ ಮಾನವೀಯ ಪ್ರಯತ್ನಗಳು ಸ್ಥಗಿತಗೊಂಡಿವೆ. ಆಹಾರಕ್ಕಾಗಿ ಗಾಜಾ ಜನರು ಮೊರೆ ಇಡುತ್ತಿದ್ದು, ‘ಸೀಮಿತ ಪ್ರಮಾಣ’ದ ಆಹಾರ ಸರಬರಾಜು ಮಾಡಲು ದಿಗ್ಬಂಧನ ತೆರವುಗೊಳಿಸುವುದಾಗಿ ಇಸ್ರೇಲ್‌ ಘೋಷಿಸಿದೆ.

ಕಳೆದ ಮಾರ್ಚ್‌ನಲ್ಲಿ ವಿಧಿಸಿರುವ ನೆರವು ದಿಗ್ಬಂಧನ ತೆರವುಗೊಳಿಸುವಂತೆ ಇಸ್ರೇಲ್‌ ಮೇಲೆ ಜಾಗತಿಕ ಒತ್ತಡ ಹೆಚ್ಚುತ್ತಿದೆ. ಗಾಜಾ ಪಟ್ಟಿ ಬರಗಾಲ ಅಪಾಯವನ್ನು ಎದುರಿಸಲಿದೆ ಎಂದು ತಜ್ಞರು ಎಚ್ಚರಿಸಿದ್ದು, ಈ ಹಿನ್ನೆಲೆಯಲ್ಲಿ ಗಾಜಾ ಜನರಿಗೆ ಸೀಮಿತ ಪ್ರಮಾಣದ ಆಹಾರ ಪೂರೈಸಲು ಇಸ್ರೇಲ್‌ ಒಪ್ಪಿಗೆ ಸೂಚಿಸಿದೆ.

ಈ ಕುರಿತು ಮಾತನಾಡಿರುವ ವಿಶ್ವಸಂಸ್ಥೆ ನೆರವು ಮುಖ್ಯಸ್ಥ ಟಾಮ್‌ ಫ್ಲೆಚರ್‌ ಅವರ ವಕ್ತಾರ ಎರಿ ಕನೆಕೊ, “ಇಸ್ರೇಲಿ ಅಧಿಕಾರಿಗಳು ಗಾಜಾ ಜನರಿಗೆ ಸೀಮಿತ ಪ್ರಮಾಣದ ಆಹಾರ ಪೂರೈಕೆಗೆ ಒಪ್ಪಿಗೆ ಸೂಚಿಸಿದ್ದು, ಈ ಕೂಡಲೇ ಆಹಾರ ಪೂರೈಕೆ ಪ್ರಕ್ರಿಯೆಯನ್ನು ಪ್ರಾರಂಭಿಸಲಾಗುವುದು. ಈಗಾಗಲೇ ಲಾಜಿಸ್ಟಿಕ್ಸ್ ವ್ಯವಸ್ಥೆ ಬಗ್ಗೆ ಚರ್ಚೆ ನಡೆಸಿದ್ದು, ಆದಷ್ಟು ಶೀಘ್ರವಾಗಿ ಗಾಜಾ ಜನರಿಗೆ ಆಹಾರ ತಲುಪಿಸುವ ಕಾರ್ಯ ಮಾಡಲಾಗುವುದು” ಎಂದು ಸ್ಪಷ್ಟಪಡಿಸಿದ್ದಾರೆ.

ಹಮಾಸ್‌ನ್ನು ನಿಯಂತ್ರಿಸಲು ಗಾಜಾ ಮೇಲಿನ ದಾಳಿಯನ್ನು ಇಸ್ರೇಲ್‌ ತೀವ್ರಗೊಳಿಸಿದೆ. ಪ್ಯಾಲೆಸ್ಟೀನಿಯನ್ ಆರೋಗ್ಯ ಅಧಿಕಾರಿಗಳು ಕಳೆದ ವಾರ ನಡೆದ ದಾಳಿಯಲ್ಲಿ ನೂರಾರು ಜನರು ಕೊಲ್ಲಲ್ಪಟ್ಟಿದ್ದಾರೆ ಎಂದು ಮಾಹಿತಿ ನೀಡಿದ್ದಾರೆ. ಈ ಕುರಿತು ಮಾತನಾಡಿರುವ ಗಾಜಾ ಆರೋಗ್ಯ ಸಚಿವಾಲಯದ ವಕ್ತಾರ ಖಲೀಲ್ ಅಲ್-ದೇಖ್ರಾನ್, “ಇದುವರೆಗಿನ ಸಾವಿನ ಸಂಖ್ಯೆ 53,000 ದಾಟಿದೆ” ಎಂದು ಹೇಳಿರುವುದು ಜಾಗತಿಕ ಆತಂಕವನ್ನು ಹೆಚ್ಚಿಸಿದೆ.

ಕದನ ವಿರಾಮ ಒಪ್ಪಂದವನ್ನು ಜಾರಿಗೊಳಿಸುವ ಕುರಿತು ಇಸ್ರೇಲ್‌ ಮತ್ತು ಹಮಾಸ್‌ ನಡುವೆ ಕತಾರ್‌ನಲ್ಲಿ ಮಾತುಕತೆಗಳು ನಡೆದಿವೆ. ಆದರೆ ಈ ಮಾತುಕತೆಗಳು ಅಷ್ಟೇನೂ ಫಲಪ್ರದವಾಗಿಲ್ಲ. ಗಾಜಾವನ್ನು ಮಿಲಿಟರಿ ಮುಕ್ತ ವಲಯವನ್ನಾಗಿ ಮಾಡುವ ಇಸ್ರೇಲ್‌ ಪ್ರಸ್ತಾವನೆಗೆ ಹಮಾಸ್‌ ಒಪ್ಪದಿರುವುದು, ಪರಿಸ್ಥಿತಿಯನ್ನು ಮತ್ತಷ್ಟು ಬಿಗಡಾಯಿಸಿದೆ ಎಂದು ಮೂಲಗಳು ತಿಳಿಸಿವೆ.

ಗಾಜಾದ ಆರೋಗ್ಯ ವ್ಯವಸ್ಥೆ ಸಂಪೂರ್ಣವಾಗಿ ಕುಸಿದಿದೆ. ನೆರವು ಮೇಲಿನ ದಿಗ್ಬಂಧನ ಮತ್ತು ಇಸ್ರೇಲ್‌ನ ನಿರಂತರ ದಾಳಿ ಪರಿಸ್ಥಿತಿಯನ್ನು ಇನ್ನಷ್ಟು ಹದಗೆಡಿಸಿದೆ. ಹೆಚ್ಚುತ್ತಿರುವ ಸಾವು-ನೋವುಗಳು ಜಾಗತಿಕ ಆತಂಕವನ್ನು ಮತ್ತಷ್ಟು ಹೆಚ್ಚಿಸಿದ್ದು, ಈ ಮಧ್ಯೆ ಗಾಜಾ ಜನರಿಗಾಗಿ ಸಿಮೀತ ಆಹಾರ ಪೂರೈಕೆಗೆ ಇಸ್ರೇಲ್‌ ಒಪ್ಪಿಗೆ ಸೂಚಿಸಿರುವುದು ಶಾಂತಿಯ ಭರವಸೆಯ ಬೆಳಕೊಂದು ಕಂಡಂತಾಗಿದೆ.