ಕೀನ್ಯಾದ ‘ಉಮೋಜಾ ಉಸೋ’ ಗ್ರಾಮ: ಪುರುಷರಿಗೆ ಪ್ರವೇಶವಿಲ್ಲದ ಮಹಿಳೆಯರ ವಿಶಿಷ್ಟ ಸ್ವರ್ಗ!

ಪುರುಷ ಪ್ರಧಾನ ಸಮಾಜವೇ ಇದ್ದರೂ, ಈಗೀಗ ಹೆಣ್ಣು-ಗಂಡು ನಡುವಿನ ಅಂತರ ತುಂಬ ಕಡಿಮೆಯಾಗಿದೆ. ಮೊದಲೆಲ್ಲ ಗಂಡು ಶ್ರೇಷ್ಠ- ಅವನಿಗೆ ಹೆಣ್ಣು ತಗ್ಗಿಬಗ್ಗಿ ನಡೆಯಬೇಕು ಎಂಬಿತ್ಯಾದಿ ಸಿದ್ಧಾಂತಗಳು ಇದ್ದವು. ಆದರೆ ಈಗಂತೂ ಹಾಗೆಲ್ಲ ಇಲ್ಲ. ಗಂಡು-ಹೆಣ್ಣು ಸಮಾನರು ಎಂಬ ತತ್ವದ ಪ್ರಭಾವ ಜಾಸ್ತಿ ಇದೆ.

ಲಿಂಗ ಸಮಾನತೆ ಎಂಬುದು ಎರಡನೇ ಮಹಾಯುದ್ಧದ ನಂತರದ ಸನ್ನಿವೇಶದಲ್ಲಿ ವೇಗವಾಗಿ ಬೆಳೆಯಿತು. ಲಿಂಗದ ಆಧಾರದಲ್ಲಿ ತಾರತಮ್ಯ ಮಾಡೋದು ಕಾನೂನು ಪ್ರಕಾರ ತಪ್ಪು. ಇದರ ಅರಿವು ಈಗ ಎಲ್ಲರಿಗೂ ಆಗಿದೆ. ಮನೆಗಳಲ್ಲಿ, ಕುಟುಂಬಗಳಲ್ಲಿ..ಸಮಾಜದಲ್ಲಿ ಚಿತ್ರಣ ಬದಲಾಗಿದೆ. ಪುರುಷನ ಸರಿಸಮಾನವಾಗಿ ಮಹಿಳೆ ನಿಂತಿದ್ದಾಳೆ. ಎಲ್ಲ ಕ್ಷೇತ್ರಗಳಲ್ಲೂ ಆಕೆ ಪುರುಷನಿಗೆ ಸರಿಸಮಾನವಾದ ಅವಕಾಶಗಳನ್ನ ಪಡೆದುಕೊಂಡಿದ್ದಾಳೆ.. ಪಡೆದುಕೊಳ್ಳುತ್ತಿದ್ದಾಳೆ.

ವಿಶ್ವದಲ್ಲಿ ಲಿಂಗ ಸಮಾನತೆ ಸಂಬಂಧಿತ ಕಾನೂನು, ನಿಯಮಗಳು ಬಲವಾಗಿದ್ದರೂ, ಒಂದಷ್ಟು ಬುಡಕಟ್ಟು ಜನಾಂಗದವರಿಗೆ ಇದ್ಯಾವುದೂ ಅನ್ವಯ ಆಗೋದಿಲ್ಲ. ವಿವಿಧ ದೇಶಗಳಲ್ಲಿರುವ ಬುಡಕಟ್ಟು ಜನಾಂಗದವರು ಇನ್ನೂ ಕೂಡ ನಾಗರಿಕ ಸಂಸ್ಕೃತಿ-ಕಾನೂನುಗಳಿಂದ ಬೇರ್ಪಟ್ಟು ಬದುಕುತ್ತಿದ್ದಾರೆ. ಹೊರಗಿನ ಪ್ರಪಂಚದ ಯಾವುದೇ ನಿಬಂಧನೆಗಳು-ನಿಯಮಗಳನ್ನ ಅವರು ಪಾಲಿಸೋದಿಲ್ಲ. ತಮ್ಮದೇ ಆದ ನಿಯಮಗಳನ್ನ ರೂಪಿಸಿಕೊಳ್ಳುತ್ತಾರೆ. ಕಾನೂನು ಚೌಕಟ್ಟು ಹಾಕಿಕೊಳ್ಳುತ್ತಾರೆ. ಅಂಥ ಒಂದು ಬುಡಕಟ್ಟು ಜನಾಂಗದ ಬಗ್ಗೆ ಒಂದು ಇಂಟರೆಸ್ಟಿಂಗ್‌ ಮಾಹಿತಿ ಇಲ್ಲಿದೆ. ಇಲ್ಲಿ ಮಹಿಳೆಯರೇ ಪ್ರಧಾನ..ಅವರಿರುವ ಜಾಗಕ್ಕೆ ಒಬ್ಬೇ ಒಬ್ಬ ಪುರುಷ ಕಾಲಿಡುವಂತಿಲ್ಲ. ಇಲ್ಲಿ ಇರೋದು ಹಂಡ್ರೆಡ್‌ ಪರ್ಸೆಂಟ್‌ ಲಿಂಗ ತಾರತಮ್ಯ.

ಯಾವುದು ಆ ಪ್ರದೇಶ..?

ಕೀನ್ಯಾದಲ್ಲಿ ಉಮೋಜಾ ಉಸೋ ಎಂಬ ಹಳ್ಳಿಯಿದೆ. ಆ ಇಡೀ ಹಳ್ಳಿ ಸಂಪೂರ್ಣವಾಗಿ ಮಹಿಳೆಯರ ಕಂಟ್ರೋಲ್‌ನಲ್ಲಿಯೇ ಇದೆ. ಇಲ್ಲಿ ಆಡಳಿತ ನಡೆಸೋರೇ ಮಹಿಳೆಯರು. ಪುರುಷರು ಇಲ್ಲಿಗೆ ಕಾಲಿಡುವಂತಿಲ್ಲ. ಹಳ್ಳಿಗೆ ಹೋದ್ರೆ ಒಬ್ಬೇ ಒಬ್ಬ ಪುರುಷ ಕಾಣಿಸೋದಿಲ್ಲ. ಉಮೋಜಾ ಉಸೋದಲ್ಲಿ ಪುರುಷರು ವಾಸಿಸುವಂತೆಯೇ ಇಲ್ಲ. ಯಾರಾದ್ರೂ ಗೊತ್ತಿಲ್ಲದೆ ಈ ಹಳ್ಳಿ ಪ್ರವೇಶಿಸಲು ಹೊರಟರೆ ಸ್ಥಳೀಯ ಪೊಲೀಸರೇ ಅವರನ್ನ ಬಿಡೋದಿಲ್ಲ.
ಇದ್ಯಾಕೆ ಹೀಗೆ ಎಂಬ ಪ್ರಶ್ನೆ ನಿಮಗೆ ಹುಟ್ಟಬಹುದು. ಅಂದಹಾಗೇ, ಇಲ್ಲಿ ವಾಸಿಸೋದು ಬುಡಕಟ್ಟು ಸಮಾಜದ ಮಹಿಳೆಯರು. ಇಲ್ಲಿ ಇರೋರೆಲ್ಲ ಅನೇಕರು ಲೈಂಗಿಕ ದೌರ್ಜನ್ಯ ಎದುರಿಸಿ ಓಡಿ ಬಂದವರು. ಕುಟುಂಬದಲ್ಲೇ ಹಿಂಸೆ ಅನುಭವಿಸಿ ಬಂದು ಇಲ್ಲಿಗೆ ಸೇರಿಕೊಂಡವರು. ಬಾಲ್ಯ ವಿವಾಹದಿಂದ ತಪ್ಪಿಸಿಕೊಂಡು ಬಂದವರು..ಹೀಗೆ ನೊಂದವರೆಲ್ಲ ಸೇರಿಕೊಂಡಿರುವ ಹಳ್ಳಿಯಾಗಿದೆ. ಬರುಬರುತ್ತ ಮಹಿಳೆಯರೇ ಇಲ್ಲಿ ಆಡಳಿತ ನಡೆಸಲು ಶುರು ಮಾಡಿದರು. ಪುರುಷರನ್ನ ಬಿಟ್ಟುಕೊಳ್ಳಲೇ ಇಲ್ಲ. ಈಗಲೂ ಸಹ ಅದು ಮುಂದುವರಿದುಕೊಂಡು ಬಂದಿದೆ.