ಕರ್ನಾಟಕದಲ್ಲಿ ಗುಜರಿ ವಾಹನ ನೀತಿಗೆ ಭಾರೀ ನಿರಾಸಕ್ತಿ: 1 ಕೋಟಿ ಹಳೆ ವಾಹನಗಳ ಪೈಕಿ ಸ್ಕ್ರ್ಯಾಪ್ ಆಗಿದ್ದು ಕೇವಲ ಶೇ. 0.07

ಬೆಂಗಳೂರು: ರಾಜ್ಯದಲ್ಲಿ ಗುಜರಿ ವಾಹನ ನೀತಿಗೆ ಸಾರ್ವಜನಿಕರು ನಿರಾಸಕ್ತಿ ತೋರಿದ್ದು, ಕಳೆದ ಎರಡು ವರ್ಷಗಳಲ್ಲಿ ಬೆರಳೆಣಿಕೆಯಷ್ಟು (ಶೇ. 0.07) ಹಳೆ ವಾಹನಗಳನ್ನು ಮಾತ್ರ ಗುಜರಿಗೆ ಹಾಕಲಾಗಿದೆ.ನೋಂದಣಿಯಾಗಿ 15 ವರ್ಷ ಪೂರೈಸಿದ ಹಳೆಯ ವಾಹನಗಳಿಗೆ ಮುಕ್ತಿ ನೀಡುವ ನಿಟ್ಟಿನಲ್ಲಿ ಕೇಂದ್ರ ಸರಕಾರ ದೇಶದೆಲ್ಲೆಡೆ 2023ರ ಏ.1ರಿಂದ ಗುಜರಿ ನೀತಿ ಅನುಷ್ಠಾನಗೊಳಿಸಿತ್ತು.

ರಾಜ್ಯದಲ್ಲೂ ಅಂದಿನಿಂದಲೇ ಗುಜರಿ ವಾಹನ ನೀತಿ ಜಾರಿಯಾಗಿದ್ದು, ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿಗಳ ಸಚಿವಾಲಯವು ರಾಜ್ಯದಲ್ಲಿ ಸರಕಾರಿ ಹಾಗೂ ಖಾಸಗಿ ಸೇರಿದಂತೆ 15 ವರ್ಷ ದಾಟಿದ ಸುಮಾರು 1 ಕೋಟಿ ಹಳೆಯ ವಾಹನಗಳನ್ನು ಗುರುತಿಸಿದೆ.

ಸಾರಿಗೆ ಇಲಾಖೆ ಅಂಕಿ ಅಂಶದ ಪ್ರಕಾರ, ರಾಜ್ಯದ ಇತರೆ ಜಿಲ್ಲೆ ಹಾಗೂ ನಗರಗಳಿಗೆ ಹೋಲಿಸಿದರೆ ರಾಜಧಾನಿ ಬೆಂಗಳೂರಿನಲ್ಲಿ 15 ವರ್ಷಕ್ಕೂ ಹೆಚ್ಚು ಹಳೆಯದಾದ ವಾಹನಗಳ ಸಂಖ್ಯೆ 34 ಲಕ್ಷ ಇದೆ. ಈ ಪೈಕಿ 21 ಲಕ್ಷ ದ್ವಿಚಕ್ರ ವಾಹನಗಳು, 7 ಲಕ್ಷ ಕಾರು ಮತ್ತು 6 ಲಕ್ಷದಷ್ಟು ಇತರೆ ವಾಹನಗಳು ಸೇರಿವೆ. ರಾಜ್ಯದಲ್ಲಿ ಹಳೆಯದಾದ 69 ಲಕ್ಷ ದ್ವಿಚಕ್ರ ವಾಹನಗಳು ಮತ್ತು 15 ಲಕ್ಷ ಕಾರುಗಳಿವೆ.

ಅಧಿಕೃತ ಅಂಕಿ-ಅಶಗಳ ಪ್ರಕಾರ, ರಾಜ್ಯದಲ್ಲಿ 15 ವರ್ಷ ಪೂರೈಸಿದ ಹಳೆಯ ವಾಹನಗಳ ಪೈಕಿ 14 ಲಕ್ಷ ಸರಕಾರಿ ಹಾಗೂ 86 ಲಕ್ಷ ಖಾಸಗಿ ವಾಹನಗಳಿವೆ. ಇಲಾಖೆಯು ಖಾಸಗಿ ಹಳೆಯ ವಾಹನಗಳನ್ನು ಗುಜರಿಗೆ ಹಾಕುವುದನ್ನು ಕಡ್ಡಾಯಗೊಳಿಸಿಲ್ಲ. ಬದಲಿಗೆ ಮಾಲೀಕರು ಇಚ್ಛಿಸಿದರೆ ಮಾತ್ರ ತಮ್ಮ ಹಳೆ ವಾಹನವನ್ನು ಗುಜರಿಗೆ ಹಾಕುವ ಅವಕಾಶ ನೀಡಲಾಗಿದೆ. ಆದರೆ, ಸರಕಾರಿ ವಾಹನಗಳನ್ನು ಗುಜರಿಗೆ ಹಾಕುವುದನ್ನು ಕಡ್ಡಾಯಗೊಳಿಸಲಾಗಿದೆ.

ಹಳೆ ವಾಹನಗಳನ್ನು ನಾಶಪಡಿಸಲು ಬೆಂಗಳೂರಿನ ದೇವನಹಳ್ಳಿ ಹಾಗೂ ತುಮಕೂರಿನ ಕೊರಟಗೆರೆಯಲ್ಲಿ ನೋಂದಾಯಿತ ‘ವಾಹನಗಳ ಗುಜರಿ ಕೇಂದ್ರ’ಗಳನ್ನು (ಆರ್‌ವಿಎಸ್‌ಎಫ್‌) ತೆರೆಯಲಾಗಿದೆ. ಎರಡು ವರ್ಷಗಳಲ್ಲಿ 3 ಸಾವಿರ ಖಾಸಗಿ ವಾಹನಗಳ ಮಾಲೀಕರು ಮಾತ್ರ ತಮ್ಮ ಹಳೆ ವಾಹನಗಳನ್ನು ‘ಆರ್‌ವಿಎಸ್‌ಎಫ್‌’ ಕೇಂದ್ರಗಳಲ್ಲಿ ಸ್ಕ್ರ್ಯಾಪಿಂಗ್‌ ಮಾಡಿದ್ದಾರೆ. ವಿವಿಧ ಇಲಾಖೆಗಳ 4 ಸಾವಿರ ಸರಕಾರಿ ವಾಹನಗಳನ್ನು ಸ್ಕ್ರ್ಯಾಪಿಂಗ್‌ ಮಾಡಲಾಗಿದೆ. ಗುಜರಿಗೆ ಹಾಕಿದ ಹಳೆಯ ವಾಹನಗಳ ಸ್ಟೀಲ್‌ಗೆ ತೂಕದ ಲೆಕ್ಕದಲ್ಲಿ ಹಣ ಕೊಡಲಾಗುತ್ತಿದೆ. ಜತೆಗೆ, ಆರ್‌ವಿಎಸ್‌ಎಫ್‌ಗಳಲ್ಲೇ ಠೇವಣಿ ಪ್ರಮಾಣಪತ್ರ (ಸಿಒಡಿ) ವಿತರಿಸಲಾಗುತ್ತಿದೆ.

ತೆರಿಗೆ ವಿನಾಯಿತಿಯಿದ್ದರೂ ಹಿಂದೇಟು

ಹಳೆಯ ವಾಹನಗಳನ್ನು ಗುಜರಿಗೆ ಹಾಕಿ ಹೊಸ ವಾಹನ ಖರೀದಿಸುವವರಿಗೆ ರಸ್ತೆ ತೆರಿಗೆಯಲ್ಲಿ ವಿನಾಯಿತಿ ನೀಡಲಾಗುತ್ತಿದೆ. ಹಳೆ ವಾಹನಗಳನ್ನು ಗುಜರಿಗೆ ಹಾಕಿದವರು ಹೊಸ ವಾಹನ ಖರೀದಿಸುವಾಗ ಸಿಒಡಿ ತೋರಿಸಿದರೆ ಅವರು ಈ ಹಿಂದೆ ಹಳೆಯ ವಾಹನಕ್ಕೆ ಪಾವತಿಸಿದ್ದ ತೆರಿಗೆಯ ಆಧಾರದಲ್ಲಿ ಸಾರಿಗೆಯೇತರ ವಾಹನಕ್ಕೆ ಶೇ. 25ರಷ್ಟು ಮತ್ತು ಸಾರಿಗೆ ವಾಹನಕ್ಕೆ ಶೇ. 15ರಷ್ಟು ತೆರಿಗೆ ವಿನಾಯಿತಿ ನೀಡಲಾಗುತ್ತಿದೆ.

ಹಳೆಯ ವಾಹನಗಳಿಗೆ ತೆರಿಗೆ ಪಾವತಿಸಿರುವುದಕ್ಕೆ ಸಂಬಂಧಪಟ್ಟ ದಾಖಲೆಪತ್ರಗಳು ಲಭ್ಯವಿಲ್ಲದಿದ್ದರೂ ಹೊಸ ವಾಹನಗಳ ಖರೀದಿ ಮೌಲ್ಯದ ಆಧಾರದಲ್ಲಿ ವಾಹನ ಮಾಲೀಕರಿಗೆ ನೇರವಾಗಿ ರಸ್ತೆ ತೆರಿಗೆ ವಿನಾಯಿತಿ ಕಲ್ಪಿಸಲಾಗಿದೆ. ಹೊಸ ದ್ವಿಚಕ್ರ ವಾಹನಗಳ ಖರೀದಿ ಮೇಲೆ 1 ಸಾವಿರದಿಂದ ಗರಿಷ್ಠ 5 ಸಾವಿರ ರೂ.ವರೆಗೆ ಮತ್ತು ನಾಲ್ಕು ಚಕ್ರದ ವಾಹನಗಳ ಖರೀದಿ ಮೇಲೆ 10 ಸಾವಿರದಿಂದ ಗರಿಷ್ಠ 40 ಸಾವಿರ ರೂ.ವರೆಗೆ ತೆರಿಗೆ ವಿನಾಯಿತಿ ಕೊಡಲಾಗುತ್ತಿದೆ.

ಸಾರಿಗೆ ವಾಹನಗಳ ಖರೀದಿಗೆ 8 ವರ್ಷಗಳವರೆಗೆ ಹಾಗೂ ಸಾರಿಗೆಯೇತರ ವಾಹನಗಳ ಖರೀದಿಗೆ 15 ವರ್ಷದವರೆಗೆ ತೆರಿಗೆ ರಿಯಾಯಿತಿ ಪಡೆಯಲು ಅವಕಾಶ ಕಲ್ಪಿಸಲಾಗಿದೆ. ತೆರಿಗೆ ವಿನಾಯಿತಿ ಹೊರತಾಗಿಯೂ ಸಾರ್ವಜನಿಕರು, ಪರಿಸರ ಮಾಲಿನ್ಯಕಾರಕ ಹಳೆ ವಾಹನಗಳನ್ನು ಗುಜರಿಗೆ ಹಾಕಲು ಮನಸ್ಸು ಮಾಡುತ್ತಿಲ್ಲ.
ಬೆಂಗಳೂರಿನಲ್ಲೇ ಅಧಿಕ

34 ಲಕ್ಷ: ನಗರದಲ್ಲಿರುವ 15 ವರ್ಷ ಮೀರಿದ ವಾಹನಗಳು
21 ಲಕ್ಷ: ದ್ವಿಚಕ್ರ ವಾಹನಗಳು
7 ಲಕ್ಷ: ಕಾರು
6 ಲಕ್ಷ: ಇತರ ವಾಹನಗಳು