ಜೂನಿಯರ್ ಚಾಂಪಿಯನ್ ಪವರ್ ಲಿಫ್ಟರ್ ಯಷ್ತಿಕಾ ಆಚಾರ್ಯ ದಾರುಣ ಅಂತ್ಯ – ಅಭ್ಯಾಸದ ವೇಳೆ 270 ಕೆ.ಜಿ ರಾಡ್ ಬಿದ್ದು ದುರ್ಘಟನೆ!

ರಾಷ್ಟ್ರೀಯ ಜೂನಿಯರ್ ಕ್ರೀಡಾಕೂಟದಲ್ಲಿ ಚಿನ್ನದ ಪದಕ ಗೆದ್ದು ಭವಿಷ್ಯದ ಕ್ರೀಡಾತಾರೆ ಎಂದು ಗುರುತಿಸಲ್ಪಟ್ಟಿದ್ದ 17ರ ಹರೆಯದ ಪವರ್ ಲಿಫ್ಟರ್ ಒಬ್ಬರು ಅಭ್ಯಾಸದ ವೇಳೆ ಆದ ಎಡವಟ್ಟಿನಿಂದಾಗಿ ಪ್ರಾಣ ಕಳೆದುಕೊಂಡಿರುವ ದುರಂತ ಘಟನೆ ಬುಧವಾರ ರಾಜಸ್ಥಾನದಿಂದ ವರದಿಯಾಗಿದೆ. ಉದಯೋನ್ಮುಖ ಮಹಿಳಾ ಪವರ್‌ ಲಿಫ್ಟರ್‌ ಯಷ್ತಿಕಾ ಆಚಾರ್ಯ ಎಂಬವರೇ ಮೃತಪಟ್ಟವರು.
ಬಿಕಾನೇರ್‌ನ ಜಿಮ್‌ನಲ್ಲಿ ಅವರು ಮಂಗಳವಾರ ಅಭ್ಯಾಸ ನಡೆಸುತ್ತಿದ್ದ ವೇಳೆ 270 ಕೆ.ಜಿ ತೂಕದ ರಾಡ್‌ ಕುತ್ತಿಗೆಯ ಮೇಲೆ ಬಿದ್ದು ಅವರು ಮೃತಟ್ಟಿದ್ದಾರೆ. ತರಬೇತುದಾರ ಮಣಭಾರದ ರಾಡನ್ನು ಯಷ್ತಿಕಾ ಮೇಲೆ ಹೊರಿಸುವ ಸಂದರ್ಭ ಈ ಅವಘಡ ಸಂಭವಿಸಿದ್ದು, ರಾಡ್‌ ಬಿದ್ದ ಪರಿಣಾಮ ಅವರ ಕುತ್ತಿಗೆ ಮುರಿದಿದ್ದಾಗಿ ಪೊಲೀಸರು ತಿಳಿಸಿದ್ದಾರೆ. ಈ ಸಂದರ್ಭ ಜತೆಯಲ್ಲಿದ್ದ ತರಬೇತುದಾರರೂ ಗಾಯಗೊಂಡಿದ್ದಾರೆ.
ದುರ್ಘಟನೆ ಸಂಭವಿಸಿದ ತಕ್ಷಣವೇ ಯಷ್ತಿಕಾರನ್ನು ಆಸ್ಪತ್ರೆಗೆ ಒಯ್ಯಲಾಯಿತಾದರೂ, ಆ ವೇಳೆಗಾಗಲೇ ಅವರು ಮೃತಪಟ್ಟಿದ್ದಾಗಿ ಪರೀಕ್ಷಿಸಿದ ವೈದ್ಯರು ತಿಳಿಸಿದ್ದಾರೆ. ಯಷ್ತಿಕಾ ಅವರ ಪಾಲಕರು ಇದುವರೆಗೂ ಪೊಲೀಸ್‌ ದೂರು ದಾಖಲಿಸಿಲ್ಲ ಎಂದು ತಿಳಿದುಬಂದಿದೆ. ಪೋಸ್ಟ್ ಮಾರ್ಟಂ ಬಳಿಕ ಮೃತದೇಹವನ್ನು ಕುಟುಂಬ ವರ್ಗಕ್ಕೆ ಹಸ್ತಾಂತರಿಸಲಾಗಿದೆ ಎಂದು ನಯಾ ಶಹರ್ ನ ಹಿರಿಯ ಆರೋಗ್ಯ ಅಧಿಕಾರಿ ವಿಕ್ರಮ್ ತಿವಾರಿ ಅವರು ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಯಷ್ತಿಕಾ ಆಚಾರ್ಯ ಅವರು ಜೂನಿಯರ್‌ ರಾಷ್ಟ್ರೀಯ ಕ್ರೀಡಾಕೂಟದ ಪವರ್‌ಲಿಫ್ಟಿಂಗ್‌ನಲ್ಲಿ ಚಿನ್ನದ ಪದಕ ಗೆದ್ದುಕೊಂಡಿದ್ದರು. ಘಟನೆಯ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ.